Read Komrem SAMUEL INHNINA 12 Bible Online

SAMUEL INHNINA 12 - Komrem bible

SAMUEL INHNINA 12

¹RŌNGPU’n sânkathem Nathan kha David hneng atir jo. Nathan kasea David hneng ati, “Khōpui inkhat shunga pase 2 leika-om hei; inkhat chu kahao khana ahlop inkhat chu sara kae.

²Mikahaopa khan sehrat leh kemōng katamtak anei hei,

³mi Sarapa chu a’nchôksōt kemōng inkhat rōk anei. Ama’n lum alohêra a-innshunga asahei leh ansei amanlensōm hei. Ama khet in abu ṭhahrep apek a, akōklei vâng tui aman in, khana arakō chunga apomria kae. Kemōng kha asanu kapōhrep kae.

⁴Ni khat khōhme inkhat mikahaopa inna hong katlung. Ama’n aranhei kâra inkhat khōhmepa sâk sik a that hnōm mak; khava kanek a, sarapa kemōng kha aloa khōhme katlungpa sik athat a asōng pek a kae.”

⁵David kha mikahaopa chunga ahnuk kana hranghra joa ati, “Akahring RŌNGPU rahminga intep eng, hiva katlo mi kha that sik arahōi!

⁶Khava êngset ṭōn atlo jâra, aleilo aja 4 amale sik kae.”

⁷Nathan in David hneng ati, “Khava mipa kha nang che kae. Israelhei RŌNGPU Pathen tahri kha hi kae, ‘Israelhei reng kamanchang che khana Saul a inphut kahuksōt che.

⁸A rengram leh a nuhmeihei kapek che; Israel leh Judah renga kasyem che. Hiseng hin alatluk mak inum, aja 2 katlunga kalapeksa thei chea kae.

⁹Khan chu, heisik a mo kaṭong pek najuimak? Heisik a mo hiva ṭōn kaṭhamak hi natlo? Nang in Uriah kha rehmun a namanthat hei; Ammonhei namanthat hei, khana anuhmei kha na’nlo?

¹⁰Tûnchu akhang akhanga nasōn leh pârhei ṭhahrep thisea kathi sik hei, ajârchu nang in kaṭong pek nalera Uriah nuhmei kha na-inloa kae.

¹¹Na-innshungtak a inphut mi inkhat in nachunga bōina nakapek sik a kahong masō sik. Nanga inphut nanuhmeihei kalosōt a mihlop kapek pha khan nang in nahmu sik jo; ama’n anmani kha sûnṭim laia rakhum a’nchunpui sik hei.

¹²Nang in marûk a setna naleitlo, tâk ke’n hiva ṭōn hi Israel pumpui tahmu sik a khōvâra kamasō sik kae.’”

¹³David in ati, “RŌNGPU dōina setna katlo jo.” Nathan in amasôn, “RŌNGPU’n arangei mandam che; nang thimak tin che.

¹⁴Tâk-kha nang in khavakha natloa RŌNGPU dōina namalârsōt jâra, nasa hi kathi sik jo.”

¹⁵Khava sōa Nathan kha innting kase jo. RŌNGPU’n David sapa Uriah nuhmei tamatet kha rahnak a amannat pek jo.

¹⁶Naite kha ahringna sik David in Pathen hneng ader. Heite inkhat sâk sik hnōm mak jo, ajân katai a-inn den shunga kahlut a raleia kajea kae.

¹⁷Areng inna ṭōnpui karônhei ama inṭhōisōt sik a ahnenga kase hei, tâk hnōm mak a anmani leh heite leisâk mak a kae.

¹⁸Nisarisōa naite kha kathi jo, David ṭōnpui karônhei khan ahnenga hripek sik kha kaṭi jo hei. Anmani’n anti, “Naite kha ahring lai, ahnenga ṭong nihri kha David in amasôn mak. Khan chu heikhong mo asapa kathi hi nihripektor sik? Abinga insuksetna aneina hrep sik a kae!”

¹⁹David in anmani khat leh khat mitheiloa an-inbek kha athei pha, naite akathi kha amanhret jo. Khava jâra ama’n ader hei, “Naite kha akathi jo mo?” Anmani’n anmasôn, “Ôk, kathi jo.”

²⁰David kha ṭonglaia inphut kathōisōt a, insia, asam akhuia, khana aret hei athleng jo. Khava sōa ama RŌNGPU inna kasea ava kamuk jo. Areng-innpuia ahe’nle pha thlai ader hei khana anheidôn pha asâk jo.

²¹Aṭōnpui karôn he’n ahnenga anti, “Keini manhret theimak jo ung. Naite kha ahring lai chu, ama sik a kaṭap chea heite sâk mak che; tâk ama athisōlim leh kathōi chea bu nasâk bât a kae!”

²²David in amasôn hei, “Kadik, ama ahring lai seng thlai kahngōia kaṭap eng. RŌNGPU’n alungset sik enga kha naite kha manthi mak ning tia kaleimandon.

²³Tâk tûnchu ama kathi jo, heisik a mo thlai kalahngōi sik? Naite kha kamanhring nôk thei sik mo? Ke’m ni khat chu ama omna akase sik eng kae, tâk ama chu kahnenga jo’nle hêrmak jo ning.”

²⁴Khava sōa David in a nuhmei Bathsheba kha lungmōng athlâk a kae. Ajepuia sapa inkhat aneia, ama kha arahming Solomon tia aphō jo. RŌNGPU’n naipangpa kha alungset a,

²⁵sânkathem Nathan hnenga arahming Jedidiah, tia phōna sik ṭong aleipek, ajârchu RŌNGPU’n ama alungset a kae.

²⁶Khava pha Joab in Ammon khōpui karônpen Rabbah hlōna sik a retlo amanjōm nôk a khana ahlōvet jo pha.

²⁷Ama’n David hneng hiva ṭong kahri sik a tirle atir, “Ke’n Rabbah kha re katuk a atui hmun chu kahlō jo.

²⁸Tûn alak remihei kha mantûp hei ina, khōpui kha re sō roh khana nang in va’nlo roh. Hiva ram hlōa rahming ṭhatna chen sik hichu madu mak eng.”

²⁹Khava jâra David in aremihei amantûp heia, Rabbah a kasea re anvatuk a ahlō jo.

³⁰David in Ammonhei limsyem pathen Molech lua inphut sana lukhu kilograme 35 kapō kahrik, ashunga hlung mankatam inkhat ka-om kha alosōt a alu chunga a’nkhu jo. Ama’n khōpuia inphut chomsōt neinâk katamtak um achoisōt,

³¹khana khava mihei kha thing ka-ât, thir chemcha leh thir hreicha kakheng ṭōn amantlo hei, khana rumhrat tak a ṭek amansyem heia kae. Ama’n hing’hin Ammon khōpui rakip a mihei kha ṭōn amantlo hei. Khava sōa ama leh amihei Jerusalema inle jo hei.