Read Komrem SAMUEL INHNINA 13 Bible Online

SAMUEL INHNINA 13 - Komrem bible

SAMUEL INHNINA 13

¹David sapa Absolom in pase lakanei mak hme kaṭhatak asernu arahming Tamar inti inkhat aleinei. David sapa hlop inkhat Amnon in amanu amadua kae.

²Amadu rei jo jâra natna aleinei jo, ajârchu khava nuhngâk ompui sik kha akaethei hêrmak sik kae; nuhngâk intheng alachang jâra amanu kha pase leh manhmu mak heia kae.

³Tâk ama’n ṭhōn inkhat aleinei, ama kha David upa Shammah sapa, ṭhatmak a mikasing tak Jonadab kae.

⁴Jonadab in Amnon hneng ati, “Nang hi rengsapa inkhat che kae, kha’num ni khat ni khat a malung kachâmtak a kahmu che. Ajâr heimo kae?” Ama’n amasôn, “Ke’n kasōpui inkhat kachang Absolom sernu kamadua kae.”

⁵Jonadab in ahnenga ati, “Akana inhlemsak ina jekhuma je roh. Naka-en sik a napa ava pha leh, ahnenga hinga ti roh, ‘Kasernu Tamar kha kahnenga ahong leh thlai aveina sik eng ahei tir pek roh. Ama’n hinahin kahmit hmua thlai amantluk pek enga, ama khet in amansâk sik eng hi kangeitui.’”

⁶Khava jâra Amnon kha akana inhlemsak a jekhuma kaje jo. Reng David kha aka-en sik a kase, khana Amnon in ahnenga ati, “Lungsettak a Tamar kha ahei tir pek roh, hinahin kahmit hmua buhlom ajing syem rasoh, khana ama’n amansâk rasoh.”

⁷Khava jâra David in reng-innpuia ka-om Tamar hneng ṭong amanrôn: “Amnon inna se roh bu leh thlai vamantluk pek roh.”

⁸Amanu kha vakasea khana jekhuma Amnon akaje kha avahmu. Amanu’n jâmdi ṭhahrep aloa, amantluk a, ahmit hmu khet a buhlom ṭhahrep asyem jo. Khana buhlomhei kha akathei jo

⁹khana mansâk sik a buhlomhei kha khângbea inphut athursōt jo, tâk ama’n sâk mak jo. “Mihei kha tirsōt hei ruh,” ati jo, anmani’n andahlon pet jo.

¹⁰Khava sōa ama’n amanu hneng ati, “Buhlomhei kha kajekhuma heichoi ina nangtak in amansâk roh,” ati. Amanu’n buhlomhei kha achoia ahnenga vakase jo.

¹¹Amanu’n buhlomhei kha apek pha, amapa’n asura ati, “Jekhuma varoh jesap rih!”

¹²Amanu’n ati, “Changmak. Khava thōi tlâkna omchen kha tlona sik rumhrat tlomak roh! Khavakha ṭit ka-om tak kae!

¹³Heikhong mo mihei kâra kahmai avea kamalârtor sik? Nang um Israelhei kâra hmeset nachanhêr sik kae. Lungsettak a rengpa hneng va’nder roh, kei hi nahnenga apek nger sik eng tia inhōr eng.”

¹⁴Tâk-kha amanu ṭong rangei pek mak jo; amanu nek a ratha kahrat achang jâra, asurtor joa asetpui jo.

¹⁵Khava sōa chu Amnon in amanu kha ning ache hêr jo. Amak hma aleimadu kanek a tûnchu ning achechet jo. Ama’n, amanu hneng ati, “Sesōt roh!”

¹⁶Amanu’n amasôn, “Changmak, tûntak a natlo kanek a, hinga natirsōt eng hi akalen chet ṭhena kae!” Tâk Amnon in amanu ṭong rangei pek mak a kae;

¹⁷ama’n asōk inkhat abek a ati, “Hiva nuhmei hi kahmit hmua inphut tirsōt roh! Vângting keisōt ina kot kirsi roh!”

¹⁸Asōkpa’n vângting athaksōt a kot akirsi jo. Tamar in khava laia puise lakanei mak reng sanuhei invon ngai, bân kasei zakkō inse inkhat asia kae.

¹⁹Amanu’n alua ravut inthek khuma, azakkō inse akei hlera, khan chu akut vânga ahmai amakhusia, ṭappuma kasesōt jo.

²⁰A-upa Absolom in ahmu pha, ader, “Amnon in amaset jo che mo? Kanainu, khava khan namalung mantônhêr mak che rasoh. Ama na-u akasōk kae, khava jâra hiva ṭong hi tûte hneng hrimak roh.” Khava jâra Tamar kha Absolom inna tûte inhmupui loa kachâmtak a ka-om jo.

²¹Rn David in ṭong kasōk kha athei pha ahnuk kana hranghra jo.

²²Khana Absolom khan Amnon kha asernu Tamar rumhrat a asetpui jâra aning ache reia avea inbekpui mak jo.

²³Kumhnisōa Absolom in Ephraim khōpui hnenga Baal Hazor hmun a akemōng hme aleivoa, khava hmun a khan rengsapa rakip abek heia kae.

²⁴Ama David rengpa hneng kasea ati, “Reng Kalûr, ke’n kakemōng hme kavoa kae. Nang leh naṭōnpui karônhei akava cheia rehōia hin avakatla sik chei mo?”

²⁵Rengpa’n amasôn, “Sapa, ethei mak ning. Nisepet inchu nang khōdeng natheirei sik.” Absolom in angek hêr, tâk rengpa’n hnōmpek mak a, Absolom in adahlona sik ahri jo.

²⁶Tâk Absolom in ati, “Khan chu kaṭha jo, kanaipa Amnon bekchu namanhong sik mo?” “Heisik a mo ama akahong sik?” reng in ader.

²⁷Tâk David in Amnon leh asapa lak-hei seng Absolom leh ansesōm sik ahnōm mak lai seng Absolom in angek ṭhak a kae. Absolom in reng inkhat sik a rahōi kasōk revei amantluk jo.

²⁸khana asōk-hei kha ṭong amanthei hei: “Amnon in ju rahnak a ahong in pha kha manhret ruh, ke’n ṭong kahei pek chei pha, that ruh. Ṭimak ruh, kabinga rahno kha karôn sik. Nanvak manṭha ruh, inkei-chio mak ruh.”

²⁹Khana sōk-hei khan Absolom mansenahei kha anjuia Amnon kha anthat jo. David sapa alak-hei seng kha anshakōrtung hei anchōnga katlân jo hei.

³⁰Anmani’n an-inn anjōna anselai, David kha mihe’n anleihri pek: Absolom in nasapahei athatsō pet jo hei, inkhatbek um ṭhenmak jo!”

³¹Rengpa kha kangirsōt jo, malung inrimtak a apōnhei kha akeihler jo, raleia inlet-hlon jo. Khava hmun a asōk he’m anpōn ankeihler jo.

³²Tâk David upa Shammah sapa Jonadab in ati, “Reng Kalûr, nasapa rakip that mak hei. Amnon rōk akathi kae. Absolom na-ena nasânsōt tor sik, Amnon in asernu Tamar rumhrat a asetpuilai khana inphut hiva ṭōn hi tlo sik a aleimantluk jo kae.

³³Khava jâra nasapahei kathipet jo hei ti ṭong kha taksen mak roh! Amnon rōk antathat kae.”

³⁴Khava pha khan Absolom kha katlânsōt jo. Khava sō lim leh remi kot kahngâkpa’n, Horonaim a inphut tlâng hlamlena akajōng suk ahmu jo hei. Ama rengpa hneng kasea ahmu hei kha ava manthei jo.

³⁵Jonadab in David hneng ati, “Ke’n kahri kapōa, akahong heiso nasapahei kae.”

³⁶Ama’n hivahi ahrisō lim leh, David sapahei heikahlut jo hei; ṭap inphut jo hei, David leh aṭōnpui karôn he’m inhnak hêra kaṭap jo hei.

³⁷Absolom chu katlânsōt a Geshur rengpa, Ammihud sapa Talmai hneng kasea khana khan kum 3 vaka-om jo. David in pha kasôttak asapa Amnon sik a jai ade jo;

³⁹tâk-kha Amnon thina kha athōk tor jo pha, asapa Absolom kha arangei hêr joa kae.