Read Komrem SAMUEL INHNINA 14 Bible Online

SAMUEL INHNINA 14 - Komrem bible

SAMUEL INHNINA 14

¹Rn David in Absolom arangei hêr jo ti hi Joab in amanhret,

²khava jâra Tekoa ka-om nuhmei kaliptak inkhat kabek sik a mi atir jo. Amanu aheitlung pha, ama’n amanu hneng ati, “Jai kadea inhlem roh; jaidena pōn invon roh, nasam khuimak roh. Pha kasôttak jai kade jo nuhmei inkhat inhlemsak roh.

³Khava sōa rengpa hneng se ina hri sik a kamanthei che hi vahri roh.” Khana Joab in ahri sik kha amanthei jo.

⁴Nuhmeinu kha rengpa hneng kasea, kajatak a raleia inbok a ati, “Reng Kalûr, a’nthōpui roh!”

⁵Amanu hneng ader, “Heimo namadu?” “Apu, kei misara renghmei inkhat eng kae,” tia amasôn. “Kapuise kathi jo.

⁶Apu, sapa 2 kaneihei, ni khat an-inhnia ramhânga innâk hei, ankaṭhen sik om mak a, inkhat in inkhatpa kha athat jo.

⁷Khana tûnchu apu, ka-innshung mi rakip in kei andōi jo eng, kasapa’n asōpuipa aleithat jâra ama kha thatna sik a ankut chunga pek sik a anngek jo eng. Hivahi antlo jo’nchu sapa neiloa ka-om sik jo eng. Anmani’n ka’nhōrna ansuk manhmang sik jo khana kapuise kha arahming omṭhakna sik sapa neiloa anda sik jo.”

⁸Rengpa’n amasôn, “Na-innting inle roh, hiva ṭong hi ke’n ka-ensui sik.”

⁹Amanu’n ati, “Reng Kalûr, hei enum natlo rakip chunga themmô kha kei leh ka-innshung in kanrôn sik; nang leh reng innshung chu ṭhenakase chei kae.”

¹⁰Rengpa’n amasôn, “Tu mo inkhat in amaṭhit che’nchu, kahnenga heiṭhōi roh, ama’n avea suk manbōi mak tin che.”

¹¹Amanu’n ati, “Reng Kalûr, kasapa thi chunga phu kahlō sik a aka-om ka-innkō he’n kasapa inkhatpa kha anthat nôk a akakhe chet ṭhena kha antlo makna sik a lungsettak a RŌNGPU na-Pathen hnenga der roh.” David in amasôn, “Akahring RŌNGPU rahminga intep eng, nasapa kha heite intônmak ning.”

¹²Nuhmei khan ati, “Reng Kalûr, lungsettak a ṭong vōi khat hri nôk rong.” Ama’n amasôn, “Kaṭha jo, hri roh.”

¹³Amanu’n ahnenga ati, “Heisik a mo Pathen mihei chunga ṭōn kanimak natlo? Nasapatak kha hnongsōtna inphut ahe’nle sik a phemak che, khava jâra tûntak a naṭong hri khan nang themmô a’npek che kae.

¹⁴Eini nikhenga lakathi et sik me; raleia tui inlei inthla nilōkthei nôk mak kapō me kha kae. Pathen inum akathisa jo kha manhring nôk mak, tâk rengpa’n chu mihring inkhat hnongsōtna inphut ṭhōimale nôkna sik a ahlam asyemthei.

¹⁵Tûnchu, Reng Kalûr, nahnenga honga hri sik katina ajârpen chu, mihe’n anmaṭhit eng, khava jâra kangekna che hi natlopek sik eng tia inhōrna kaneia, nahnenga kahong hri kae.

¹⁶Kaṭong narangei pek sik eng khana kei leh kasapa kathat sik hei leh Pathen in amihei apekna ram a inphut anikalosōt sik heia inphut nanihûk sik ti kamandon.

¹⁷Apu, na’ntepna khan, anihûk sik kati, ajârchu reng hi Pathen ngeva kapō kae, akaṭhamak leh akaṭha aṭhentora kae. RŌNGPU na-Pathen in ompui che rasoh!”

¹⁸Rengpa’n amasôn, “Ke’n ṭong inkhat der che rong, akadiktak kha nahri pek sik eng kae.” Amanu’n amasôn, “Reng Kalûr, hei a-enum ader roh.”

¹⁹“Joab in hiva sik a ada che mo?” tia ader jo. Amanu’n amasôn, “Reng Kalûr, inthengtak a a’nhâksêr eng kae, naṭongder eng hi masôn makna sik a ahlam om mak jo. Hivahi naṭōn karôn Joab in tlo sik leh hri sik hei hi amanthei dek eng kae.

²⁰Tâk-kha hiva ṭōn hi suk mandikna sik a atlo kae. Reng Kalûr nang chu Pathen ngeva kapō che kae khana akasōk rakip namanhret a kae.”

²¹Hnung leh chu rengpa’n Joab hneng ati, “Namadu kha tlo sik a intluk eng. Se roh, Absolom rether kha vajongsōt ina hin heiṭhōi male roh.”

²²Joab kha David hmaikunga kajatak a raleia inkuna ati, “Reng Kalûr, Pathen in ṭhatthei pek che rasoh! Kangekna nalopek jâr enga, kachunga namalung katlai ti hi kamanhret.”

²³Khava sōa ama kangirsōt a Geshura kasea Absolom kha Jerusalema avaṭhōi male jo.

²⁴Achang ravâng, rengpa’n Absolom kha reng-innpuia a-om makna sik a ṭong apek. Rengpa’n, “Ke’n ama hmuhnōm mak eng,” ati. Khava jâra Absolom kha a-inna ka-oma rengpa hmaikunga inlârmak a kae.

²⁵Israelhei shunga Absolom kapōa hme kaṭha ale’nthang inkhatbek leiom mak; alua inphut ankepha katlung heite avât om mak.

²⁶Asam kaṭha hêr, ahongseia ahrikrei pha kum khat shunga vōi khat rōk avori. Renghei tenadân dungjuia asam kha kilograme 2 kakhea kahrik.

²⁷Absolom in sapa 3 leh hme kaṭhatak sanuhngâk arahming Tamar inti inkhat anei hei.

²⁸Absolom kha Jerusalema kum 2 rengpa hmutet loa leika-om.

²⁹Khava sōa Absolom in rengpa hnenga kase sik a Joab kabek mi atir; tâk Joab kha hongmak. Mi inkhat atir nôk, hnōmpek nôk mak.

³⁰Khava pha, Absolom in asōk-hei hneng, “Enruh, Joab hlei kha kei hlei bântak a ka-om, bunim butun kakek. Se una varoṭhut ruh,” ati. Khava jâra kase heia hlei kha anvaroṭhut jo.

³¹Joab kha Absolom inna kasea ader, “Heisik a mo nasōk he’n kahlei antavaroṭhut?”

³²Absolom in amasôn, “Ajârchu nakabek a mi kahei tirlai vamak chea kae. Nang reng hnenga nase leh kei sik a hinga nader sik a kamadu che: ‘Heisik a mo Geshur kahei dahlona hiva hmun a akava eng? Sona ka-om kha kei sik a akaṭha jôk sik kae.’” Khana Absolom in ahrisa, “Rengpa kahmu theina sik a namantluk pek sik eng hi kamadu, ṭhena kanei inchu amanthat bât roh.”

³³Khava Jâra Joab in David rengpa hneng kasea Absolom in ahri hei kha ava manthei jo. Reng in Absolom ava manbek hei, Absolom kasea reng hmaikunga raleia inkun jo. Reng in amajôp a arahlâng jo.