Read Komrem SAMUEL INHNINA 15 Bible Online

SAMUEL INHNINA 15 - Komrem bible

SAMUEL INHNINA 15

¹Hivasōa, Absolom in shakor gâri inkhat leh shakorhei khana akajuile sik pase 50 amantluk jo.

²Jîngkâr hmatak kathōia kasea khōpui kekot a hlamlena vakangir ria kae. Innâk-inse jâra tu mo inkhat reng in ṭong achaipek sik a indua akahong kha, Absolom in ama kha abek ria, khona inphut a mi mo ader ri. Amapa khan heiphunga ajōng kakōn mo ti kha amantheisō pha

³Absolom in amasôn sik, “Enroh, dân dungjuia chu nang akadik che kae, tâk rengpa kahlânga naṭong inngei sik mi om mak.”

⁴Khana ahrisa nôk a aleiti, “Kei hi ṭongkatan kaleichang inchu, tia kamandon! Tu mo inkhat maherna leh tup kanei kahnenga kahong thei sik khana mandikna kamanchen sik a kae.”

⁵Mipa khan Absolom asora ahmai kunga a’nkun pha Absolom in akut atinga amatua, amajôp ria kae.

⁶Absolom in rengpa hnenga akadik jongna sik akahong Israel rakip hnenga hivahi atlori, khava jâra anmani kajana kha achen a kae.

⁷Kum 4 sōa Absolom in Reng David hneng ati, “Apa, Hebrona se eng sona RŌNGPU hneng ka’ntepna kha vatlo rong.

⁸Syria ram Geshura kalei omlai, ama’n Jerusalema aheiṭhōi male eng inchu, ke’n ama Hebrona kakamuk sik tia le’ntep eng.”

⁹Rengpa’n, “Malung kamōnga se roh,” ati. Khava jâra Absolom Hebrona kase jo.

¹⁰Tâk-kha Israel phung rakip hnenga hinga akahri sik a mi atir hei, “Nangni’n pengkun mahring nanthei pha, ‘Absolom kha Hebrona reng kachang jo!’ tia ôn ruh.”

¹¹Absolom in abek a akahong seng Jerusalema inphut ahe’nṭhōipui pase kha 200 hei kae, anmani’n ashung ṭong manhret phâkloa taksentak a kase inhlut jo hei.

¹²Khana ama’n inthoina atlolai, Gilo khōpuia ka-om David rengpa ṭong-inse hei kâra inkhat Ahithophel kabek sik mi atir hei. Reng dōina ṭōnmantluk kha kangar chet-chet a, Absolom kahnung kajui kha katamsa chet-chet jo hei.

¹³Ṭongkarôn inkhat in David hneng thang akōia, “Israel he’n Absolom ṭong juina sik a intep jo hei,” ati.

¹⁴Khava jâra David in Jerusalema a-ompui aṭōnpui karônhei hneng ati, “Absolom a inphut tlânsōt nimadu’nchu tûntak akasesōt sik jo me kae! Achangmak inchu, hin inrangtak a kahong sik jo khana hmaimôkna apek sik me khana khōpui shunga aka-om rakip athasō sik jo me!”

¹⁵Anmani’n anmasôn, “Ôk, Reng Kalûr, nahri rakip kha tlo sik a intluk jo ung.”

¹⁶Khava jâra reng-innpui kahngâk sik a anuhmei manbo 10 hei tei loa, aṭōnpui karônhei leh a-innshung mi rakip in anjuia, reng kha kasōksōt jo.

¹⁷Reng leh amihei seng in khōpui andahlon pha, vâng intongpen inna inhnga jo hei.

¹⁸Reng kahrunghei kha ahmating an-intôr pha, aṭōnpui karônhei seng kha ahnengtak a kangir hei. Gath a inphut akahnung heikajui remi 600 hei kha’m anjuia intôr jo hei,

¹⁹reng in anhlam kakei Ittai hneng ati, “Heisik a mo keini leh akase sik che? Inle ina rengther hneng va-om roh. Nang ram hlop mi inkhat che kae, narama inphut a ahei katlânsōt che kae.

²⁰Nang hina na-omna lakahnaitek kae, heisik a mo kei leh inṭhōia kamanlôn lele sik che? Kei sena sik kapha, manhret tor mak eng. Inle roh, naram mihei inṭhōipui hei roh, RŌNGPU’n lungset a rôn che rasoh khana taksenthei chang rasoh.”

²¹Tâk Ittai in amasôn, “Reng Kalûr, khova hmun a nasena, thina hmun achang inum, nang leh inṭhōia kase sik eng tia RŌNGPU rahminga intep eng.”

²²David in amasôn, “Kaṭha jo! Injôk jo ruh!” Khava jâra Ittai leh amihei seng khana ansa a’nte hei seng khanga kase jo hei.

²³David kahnung kajui he’n andahlon jo hei pha, mipuihei kha rahnak a kaṭap jo hei. Rengpa kha ami he’n anjuia, Kidron kavadung anrakan jo, khana ankhenga ramhâng ting kase jo hei.

²⁴Zadok thempu khan leika-oma, ama leh inṭhōia Levi he’n Intepna Bôm intheng ankadom jo. Anmani’n anmaṭhuma anda, khana khōpui kha mipui he’n andahlonsō mak lai seng Intepna Bôm kha kadomsōt nôk mak hei. Abiathar thempu kha’m khana khan leika-om;

²⁵Khava sōa rengpa’n Zadok hneng ati, “Intepna Bôm kha khōpuia rôn male jo ruh. RŌNGPU’n kachunga atlai inchu, ni khat chu Intepna Bôm omna hmun a hin aka-en sik a aniheiṭhōi male sik eng.

²⁶Tâk kachunga atlaimak jo’nchu, heidôm, alungdo kha kachunga tlo jo rasoh.”

²⁷Ama’n Zadok hneng ahri manjōm a, “Enroh, nasapa Ahimaaz leh Abiathar sapa Jonathan ṭhōi hei ina khōpuia kamōnga inle ruh.

²⁸Khava shung senga, ke’n ramhânga tuidung rakanna hmun a nanga inphut ṭong katheimak kârseng kaleihngâk sik che.”

²⁹Khava jâra Zadok leh Abiathar in Intepna Bôm kha Jerusalemting anrôn malea, khana khan vaka-om jo hei.

³⁰David in olive Tlâng kakea kaṭap jo; ake hrempet a kalôn khana inrimna mêrchîkna pōnlu a’nkhua kae. Akahnung kajui rakip he’m pōnlu an-inkhua kaṭap jo hei.

³¹Ahithophel in Absolom re mantlukna kha ajom jo ti ṭong kha David anhri pek jo pha, ama’n derna anei, “RŌNGPU, lungsettak a Ahithophel mansena kha hnemna kase manchang pek roh!”

³²David in kamukna hmun tlâng bilik atlung pha, ataksentak aṭhōn Archite phung Hushai in apōn inhlera, alu chunga vaiphin inno pum a aleiratōa kae.

³³David in ahnenga ati, “Kei leh inthoia nahong inchu, kei hnenga nahnemna om mak ning,

³⁴tâk khōpuia na-inlea Absolom hneng apa hneng taksentak a natarazen kapōa ama narazenna sik navahri pek inchu, khan vâng khan na-inthōpui tor enga kae. Khana Ahithophel in mansena apek kha atingna sik a nator chen a tlo roh.

³⁵Khana khan Zadok leh Abiathar thempu leika-om sik hei; reng-innpuia naṭongthei rakip kha manthei hei roh.

³⁶Anmani’n ansapa Ahimaaz leh Jonathan an-ompui hei, naṭongthei rakip anmani naheimanrôn thei hei.”

³⁷Khava jâra Absolom kha khōpui aheitlung pha khan, David ṭhōnpa Hushai kha khōpuiting inle jo.