Read Komrem SAMUEL INHNINA 16 Bible Online

SAMUEL INHNINA 16 - Komrem bible

SAMUEL INHNINA 16

¹David in tlângbung bilik kha akhedet pha, manhret manloa Mephibosheth sōkpa Ziba in shakōrtung 2 vâng buhlom 200, vomhrui kachâr abor 100, antavei therbi theibōr 100 leh ju kasiptak shavunpeng inkhat ahei rôna aratō jo.

²Rn David in ahnenga ader, “Khavahei seng kha heimo manlo sik nati?” Ziba’n amasôn, “Shakōrtung hei hi Reng Kalûr, nang reng innshung mihei tachōng sik, buhlom leh theihei hi namihei tasâk sik, khana ju hichu ramhâng shunga anchâm pha anta-in sik kae.”

³Reng in ader, “Nakapu Saul tupa Mephibosheth kha khon mo ka-om?” Ziba’n amasôn, “Jerusalema laka-om, ajârchu Israel he’n apu Saul rengram kha tûnchu anmanhlō sik jo eng tia ahlamrina kae.”

⁴Reng in Ziba hneng ati, “Mephibosheth nei rakip kha nangta jo kae.” Ziba’n amasôn, “Kei nasōkpa eng kae. Ahei tik a Reng Kalûr nang mantlai che rong!”

⁵David rengpa kha Bahurim atlung pha, ama hlam intō sik a Saul innshung mi, Gera sapa Shimei heikasōk, ahong pum a ahei hâksêra kae.

⁶David kha amihei leh akahrung he’n ankakekhum ravâng, David leh aṭōn karônhei kha Shimei in hlung vânga adeng manphut jo hei.

⁷Shimei in ahâksêra ati, “Sesōt roh! Sesōt roh! Mikathatpa! Akaṭhepa!

⁸Nang in Saul rengram nalopek, khana a-innshung mi katamtak nathat hei jâra tûnchu RŌNGPU’n karâkna anei jo che kae. RŌNGPU’n rengram kha nasapa Absolom apek jo, nang insuk inhmang jo che, mikathatpa!”

⁹Zeruiah intinu sapa Abishai in rengpa hneng, “Reng Kalûr, heisik a mo hiva ui hin nang ahâksêr che? Ahnenga vase eng sona alu vatan rong!”

¹⁰Reng in Abishai leh a-upa Joab hneng ati, “Hivahi nangni insalerna sik changmak. RŌNGPU’n kei hâksêrna sik amanthei achang inchu heisa mo atlo tia derna ratha kha tu’n mo anei sik?”

¹¹Khana David in Abishai leh aṭōn karônhei senghei hneng ati, “Kasapa’num that sik a anirei jo eng; heisik a mo hiva Benjamin chunga inlak nasak? RŌNGPU’n hâksêrna sik amanthei kae; kachanga abing rōk a dahlon ruh, khanga tlo rasoh.

¹²RŌNGPU’n ka’nrengna hi amanhret pek enga, khana hiva mipa hâksêrna eng kahlânga ṭhatthei ajingtebek abōkthei enga kae.”

¹³David leh amihei kha hlamlena kase nôk jo hei. Shimei khan tlângsira ajui ṭhak hei; asepuma ahâksêr hei, hlung vâng leh pitlang vâng adeng hei.

¹⁴Reng leh amihei seng kha Jordana antlung pha kachâmneng jo hei, khana khan inhnga jo hei.

¹⁵Absolom leh ama inṭhōipui Israelhei seng kha Jerusalem kahlut jo hei, khana Ahithophel kha’m anmani leh inṭhōi hei.

¹⁶David tataksentak aṭhōnpa Hushai in Absolom kha a’ntōpui pha, “Rengpa hringsôt rasoh! Rengpa hringsôt rasoh!” tia ka-ông jo.

¹⁷Absolom in ama hneng ader, “Naṭhōnpa David chunga lum nalona kha heimo akasōk jo? Heisik a mo ama leh ale’nṭhōi mak che?”

¹⁸Hushai in amasôn, “Heikhong mo katlo tor sik a? Kei chu RŌNGPU leh hiva mipuihei khana Israelhei seng takadeisōt hnengting aka-om eng kae. Kei nanhnenga ka-om sik eng.

¹⁹Hei-achanga, kakapupa sapa teilo tudôm mo karazen sik a? Napa kaleirazen kapōa, tûn nang karazen sik che kae.”

²⁰Khava sōa Absolom in Ahithophel hneng inhea ati, “Tûnchu hin ka-om jo me, heimo tlo sik a namanthei hnōm ung?”

²¹Ahithophel in amasôn, “Se ina napa’n reng-innpui ka-ensui sik a adahlon anuhmeihei so vajepui hei roh. Kha achang inchu napa’n nang hi a’nrepui inkhat a aloche ti kha Israel mi rakip in anhong manhret sik a kha, nakahnung kajui he’n malung mathokna annei hêr sik.”

²²Khava jâra reng-innpui phuchunga khan Absolom sik pōn-inn inkhat anmatung jo, mi rakip hmit-hmua Absolom kahlut a apa nuhmei manbohei kha ajepui jo hei.

²³Khava laia Ahithophel ṭong leipek rakip kha Pathen ṭongpek kapōtak a anleijui, David leh Absolom in anleijuia kae.