Read Komrem SAMUEL INHNINA 17 Bible Online

SAMUEL INHNINA 17 - Komrem bible

SAMUEL INHNINA 17

¹Sôt lo jen a, Ahithophel in Absolom hneng ati, “Pase 12,000 kadeisōt hei rong, tunjân David kahnong vase rong.

²ama achâmlai tak leh aratha set laitak ke’n kabuhlu sik. Ama ṭit a inper sik khana amihei seng um katlânsōt sik jo hei. Rengpa rōk kha kathat sik

³khana amihei seng chu hmōi inkhat in apuise hnenga ahe’nle kapōa nahnenga kaheiṭhōi male sik hei. Nang in mi inkhat rōk nathat hnōm kae, a’nhleibang mihei seng chu kahring sik hei.”

⁴Hivahi Absolom leh Israel hlamkakei rakip sik a ṭongpek kaṭhatak apō jo.

⁵Absolom in ati, “Tûn Hushai kha bek ruh, heimo ahri sik kha rangei rih.”

⁶Hushai ahong tlung pha, Absolom in ahnenga ati, “Hivahi Ahithophel in mansena anei ung kae, kantajui sik mo? Kha achangmak inchu, heimo tlo sik amanthei roh.”

⁷Hushai in amasôn, “Tûnlaia Ahithophel ṭong pek chei hi akaṭha changmak.

⁸Napa David leh amihei kha re tuk kahrânghei kae ti namanhret, ate antalopek jo kavompui kapōa kahrâng heia kae. Napa hi retloje inhret remi inkhat kae, jân a amihei leh omsap rimak a kae.

⁹Tûntak hin khur kōk achangmak leh hmunlak a ka-om sik. David in namihei chunga abuhlu hei pha, namihei kha antor jo hei tia khava ṭong kathei rakip in anti sik jo.

¹⁰Khava sōa shabakkai kapōa mi kahrânghei kapha, kaṭisō sik jo hei, ajârchu Israel mi rakip in napa hi remi kahrat khana amihei kha retlo kahrat hei kae ti hi anmanhret.

¹¹Kei mansena khachu, tui-ôngpui panga nêrdi rahme katam kapō, ramri inkhat a inphut inkhat katlunga Israel rakip, mantûp hei ina, nataksa khet in re tlona hlam kei hei roh.

¹²David kha khova hmun a a-om inum nihmusōt sik, khana mantlukna hei hi amanhret mak hma nibuhlu sik kae. Ama leh amihei inkhatbek hringmak hei ning.

¹³Khōpui inkhat shunga ahlut inum, nimihe’n hrui anheichoi sik khana phaicham thōiting ankeiphûr bât sik. Hlung inkhatbek um khava hmebung chunga khan indahlon mak ning.”

¹⁴Absolom leh Israelhei seng in anti, “Ahithophel kanek a Hushai ṭongmanthei hi kaṭha jôk.” Absolom chunga insukmona kha atlungna sik a RŌNGPU’n Ahithophel ṭongpek kaṭha kha anjui makna sik a amantluk jo.

¹⁵Khava sōa heiṭong mantheina mo ama hi Absolom leh Israel hlamkakeihei hnenga aleipek hei khana Ahithophel in heiṭong mantheina mo aleipek hei ti kha Hushai in Zadok leh Abiathar thempu hnenga amanthei jo hei.

¹⁶Hushai in ahrisa, “Tûnchu, inrang ruh! Ramhâng shunga tuidung re kena hmun a jân arek makna sik, ama leh amihei ankhenga ansur heia anthatpet makna hei sik inrangtak a Jordan arakanna sik, David hnenga ṭong manrôn jo ruh.”

¹⁷Abiathar sapa Jonathan leh Zadok sapa Ahimaaz in Jerusalem khōpui vâng intonga Enrogel tuiripût hmun a khan anleihngâk hei ajârchu khōpui shunga hlut a mi tahmu sik kha inngammak heia kae. Sōk nuhmei inkhat kase ria ṭōn kasōk hei kha amanthei hei, khava sōa anmani kase heia Reng David anvamanthei ria kae.

¹⁸Tâk ni khat chu pase naipang inkhat in ahmu sōt jo hei, Absolom hneng amanthei jo; khava jâra anmani inrangtak a kasesōt heia Buhurim a pase inkhat inna inthup jo hei. A-inn hnenga tuikhur inkhat anei, khava shunga kahlut jo hei.

¹⁹Mipa nuhmei in, asing khumna inkhat aloa, tuikhur bei kha amakhu jo khana tûte’n anmanhret makna sik a achunga sâng aleiphōi jo.

²⁰Absolom ṭōnpui karônhei kha inna khan kahong heia nuhmeinu hneng, “Ahimaaz leh Jonathan kha khon mo aka-om hei?” tia ander. Nuhmeinu’n, “Anmani tuidung re kake jo hei,” tia amasôn hei. Anmani’n anjong hei tâk hmutor mak heia Jerusalem ting inle jo hei.

²¹Anmani’n andahlon sōa Ahimaaz leh Jonathan tuikhura inphut hong kasōk heia kase jo hei khana Reng David hneng ṭong anva mathlung jo. Anmani’n Ahithophel in ama dōina ṭōn amantluk kha anhri pek jo khana, “Inrangtak a tuidung reke loi ruh,” antipek.

²²Khava jâra, David leh ami he’n Jordan anrakan joa, khō ahong vâr pha ankhenga re kakesō pet jo hei.

²³Ahithophel in aṭong mantheina antajuipek mak kha ahmu sōt pha ashakōrtung achōnga akhōpuiting inle jo. Innshung ṭong leh hla akimsōa, abinga inkheihlon jo. A-innshung thlâna anvûm jo.

²⁴Absolom leh Israel he’n Jordan re anheike pha khan David chu Mahanaim khōpui leikatlung jo.

²⁵(Absolom in Joab kathlenga Amasa kha remi hlamkakei amanṭang jo. Amasa kha Ishmael mi Jether sapa kae; anu kha Joab nu Zeruiah nainu Nahash sanu Abigail kae.)

²⁶Absolom leh ami he’n Gilead ram a rephōr anmatung jo.

²⁷David in Mahanaim aheitlung jo pha, Amnon ram a Rabbah khōpuia inphut Nahash sapa Shobi leh Lodebara inphut Ammiel sapa Machir khana Gilead ram a Ragelima inphut Barzillai hei hin anvaratō.

²⁸Anmani’n David leh amihei sik thlengkam, ralei be, jena pōn, leh David leh amihei sik a thlai: gehu, satun, busâk sik, behmu-kathei, be leh behmu, khōihning, senea ansyem sâk thei, khana seneda leh kemōng ṭhahrep anheirôn pek hei. Anmani’n David leh amihei kha anvon kaṭâm sik, antui kahre sik khana ramhâng thōia kangōi dâk sik jo hei tia anmanhret a kae.