Read Komrem SAMUEL INHNINA 18 Bible Online

SAMUEL INHNINA 18 - Komrem bible

SAMUEL INHNINA 18

¹Rn David in ami rakip amantûp jo hei; anmani kha 1,000 leh 100 ruprup a asemṭhen hei, anhlam kakei sik ṭōnkarôn ada hei.

²Khava sōa rup thuma amansesōt jo hei, Joab leh anaipa Abishai khana Gath mi Ittai hei hi arup et a hlam amankei jo hei. Reng in amihei hneng, “Katak khet nangni leh inṭhōi sik me,” ati.

³Anmani’n anmasôn, “Nang keini leh sesap mak min, keini seng kanlei inhea kanhei tlân inum khana aṭimkhat anithat jo unga achang inum ni’nrepui he’n inlakdet a anlona sik heite omdek mak; tâk nang chu keini lishing sôm leh a’n-ang che kae. Nang chu khōpuia hin aka-om chea kan-inthōpui sik nahei tir sik kha kaṭhachet sik.”

⁴Rengpa’n amasôn hei, “Nanmandona akaṭhapen kha katlo sik.” Khana amihei 1,000 leh 100 ruprup a anjōng injôksōt lai khan ama kekot sira kangira ka-om.

⁵Ama’n Joab, Abishai khana Ittai hneng ṭong apek hei: “Kei hmai ena rether Absolom kha heisukset mak ruh.” Khana David in hlamkakeihei hnenga ṭong pekna anei kha remi rup rakip in antheipet a kae.

⁶David remihei kha ramhâng ting kasesōt heia Ephraim ratu shunga Israelhei leh re intuk jo hei.

⁷Israelhei kha David mihe’n hmaimôkna anpek jo hei; khavakha ṭit ka-om tak torna re kae, khava ning mi 20,000 anleithat hei.

⁸Re intuk kha aram pumpui katlung jo, khana rehmun a a’nthat hei kanek a ratu shunga kathichet jo hei.

⁹Manhret manloa Absolom in David mi ṭhahrep a’nsuktōpui jo hei. Absolom in shakor muksen inkhat achōnga sasōkung kalentak inkhat hnōia asena thing bâk heia khan alusam a intok a in-ôk inkhei jo. Shakor muksen khachu katlânthang joa Absolom chu chunga inkheia ka-om jo.

¹⁰David mi inkhat in avahmua Joab hneng thang akōia ati, “Apu, Absolom kha sasōkunga a’nkhei kahmu!”

¹¹Joab in amasôn, “Nahmu’nchu heisa mo ahmun a nahei thatmak? Ke’n dangka 10 leh khōnkir inkhat kapek sik che kae.”

¹²Tâk mipa khan amasôn, “Nang in dangka 1,000 napek sik eng inum, rengsapa chunga kakut pâr inkhat um kalâkmak ning. Rengpa’n, ‘Kei hmai en-una rether Absolom kha heitôn mak ruh,’ tia nang leh Abishai khana Ittai hnenga ṭong apek chei kha nithei et a kae.

¹³Khana ke’n rengpa ṭong kha kajuimak a Absolom kha kahei thatbât inchu rengpa’n aheithei sik, ama’n heirakip atheipet, nang in ahuk tor mak tin che.”

¹⁴Joab in ati, “Nang leh pha heite manhmang mak jo ning.” Ama’n kasei 3 aloa, sasōkunga ala’n kheia alakahring ṭhak Absolom ôp a akakho manhlut jo.

¹⁵Khava sōa Joab remi 10 he’n Absolom kha anhnaia anthatsōt jo.

¹⁶Joab in re tuk bângna sik pengkun ṭumna sik ṭong apek jo hei, aremi rup he’n Israelhei manloina inphut he’nle jo hei.

¹⁷Anmani’n Absolom kalōng kha ankadoma ramhâng shunga khur kōk inthûk inkhat a anhlon manhlut a, hlung anbuk khum jo. Israel rakip hei kha an-inna inle jo hei.

¹⁸Absolom in sapa aleinei mak jâra arahming omṭhakna sik a, ahring lai ama mandonsōtna sik inn inkhat Reng Phaichama aleisak a kae. Khava jâra ama’n arahming amanrôna tuning katlunga Absolom Mandon sōtna tia inhret jo.

¹⁹Khava sōa Zadok sapa Ahimaaz in Joab hneng ati, “RŌNGPU’n ama inrepui heia inphut ahuksōt jo ṭong kaṭha kha rôn eng sona rengpa hneng tlân jo rong,” ati.

²⁰Joab in ati, “Changmak tuning chu ṭong kaṭha inkhatbek rôntheimak tin. Kanilak a kasethei sik che, tâk tuning chu changmak, ajârchu rengsapa akathi kae.”

²¹Khava sōa ama’n asōkpa Ethiopia mi hnenga ati, “Nang in nahmuhei kha rengpa hneng vamanthei roh.” Sōkpa kha inkuna katlânsōt jo.

²²Ahimaaz in inngamtak a ahri pek, “Hei-hei asōk inum ôrmo mak eng; lungsettak a ke’num ṭong kaṭha kha rôn rong.” Joab in, “Sapa, heisik a mo ṭong narôn hnōm? Khava sik a inpâkman rahlâng mak tin che,” ati.

²³Ahimaaz in ati nôk, “Hei-achang inum, “Kase hnōm eng.” Joab in ati, “Khan chu se roh.” Khava jâra Ahimaaz kha Jordan Phaichama hlamlen khan katlânsuk a sōkpa kha inrangtak a akhesōt jo.

²⁴David kha khōpui shung intong leh vâng intong kekot-hei kâra hmun karōk a le’n ong. Khō kahngâkpa kha kurbang chunga kaketoua kekot phuchunga kangir; khō athlira mi inkhat rōk ajōng katlân kha ahmu.

²⁵Ama’n rengpa ajōng bek a amanthei, rengpa’n ati, “Ama abing rōk achang inchu, ṭong kaṭha ahei rôn kae.” Ahei katlânpa kha heikahnai det-det jo.

²⁶Khava sōa khō kahngâkpa khan pase hlop inkhat abing rōk a ahei katlân ahmu nôk, kekot kahngâkpa kha ajōng bek a, “Enroh! Pase hlop inkhat heikatlân nôk,” ati. Rengpa’n amasôn, “Khava inkhatpa nôk kha’m ṭong kaṭha ahei rôn kae.”

²⁷Khō kahngâkpa’n ati, “Ahma inkeia ahong katlân so Ahimaaz apōa kahmu!” Rengpa’n ati, “Ama mikaṭha inkhat kae, ama’n ṭong kaṭha ahei rôn kae.”

²⁸Ahimaaz in rengpa hneng inpâkna chibei ahrisōt, ahmai kunga raleia inkuna, ati, “Reng Kalûr nang kadōi mihei chunga torna anikapek RŌNGPU na-Pathen kha manpâk a om rasoh!”

²⁹Rengpa’n ader, “Rether Absolom kha akahring nâk mo?” ati. Ahimaaz in amasôn, “Apu, naṭōn karôn Joab in ahei tir eng lai khan chu, mipui innok a kahmu hei, tâk hei kati mo hri tor mak eng.”

³⁰Rengpa’n ati, “Khana khan ngir roh;” khana ama khana khan kasea vakangir jo.

³¹Khava sōa Ethiopia mi sōkpa kha heikatlunga ama’n rengpa hneng ati, “Ke’n Reng Kalûr sik a ṭong kaṭha kahei rôn! Tuning chu nang dōina aleikatlo rakip hei chunga RŌNGPU’N torna apek jo che!”

³²Rengpa’n ader, “Rether Absolom kha akahring mo?” Sōkpa khan amasôn, “Apu, ama chunga akasōk kapōa, na’nrepui heirakip chunga leh nang dōina re katlohei rakip chunga sōk rasoh kati.”

³³Rengpa kha inrimna’n amakhusi jo. Kekot chunga innden a khan kaketoua kaṭap jo. Akepum a kaṭap a, “O kasapa! Kasapa Absolom! Absolom, kasapa! Nang kathlenga kei macheng kalei thi’nchu tâk-e, kasapa! Absolom, kasapa!” ati jo.