Read Komrem SAMUEL INHNINA 19 Bible Online

SAMUEL INHNINA 19 - Komrem bible

SAMUEL INHNINA 19

¹David rengpa kha Absolom sik a kaṭap a jai ade jo ti hi Joab anmanthei jo.

²Khava jâra khava ning David rerup rakip sik a retorna inpâkna kha inrengna kachang jo, ajârchu rengpa’n asapa sik a jai ade jo ti kha anthei jo.

³Anmani rehmun a inphut akatlânsōt remi a’nzak hei kapōa kadai hngera khōpuia hong inle jo hei.

⁴Rengpa’n ahmai amakhua ka-ônga kaṭap jo, “O kasapa! Kasapa, Absolom! Absolom, kasapa!” ati jo.

⁵Joab kha rengpa inna kasea ahnenga ati, “Tuning chu nahringkhō leh nasanu nasapahei khana nanuhmei leh nanuhmei manbohei hringkhō kahuksōt hei, namihei inzak napek jo hei.

⁶Nakahōt hei kha nathlop heia na’nlungset hei kha nadek hei! Naṭōn karônhei leh namihei hi nahnenga heite hnemmak hei tia namalâr jo. Tuning hin Absolom aleihringa, keini seng hi kanleithipet inchu na-om kahōi hranghra sik tia kahmu.

⁷Tûn se ina namihei kha hri kaṭhapek hei roh. Kei RŌNGPU rahminga a’nhâksêr eng kae, khanga natlo mak inchu, ajînga jîngkâra chu anmani inkhatbek inum ompui mak jo hei che ning. Khavakha nahringkhōa akaṭhamak tak nathōk inrengna kha kachang sik.”

⁸Khava sōa rengpa kha kathōisōt a, khōpui kekot hnenga leikasea va’n-ong jo. Ami he’n khana a-om kha anthei jo, khana ankhenga ankimvea intûp hei. Khava pha Israelhei kha an-inn kajōn et a katlân jo hei.

⁹Ram pumpui shunga anmani leh anmani innâk anphut jo. Anmani khat leh khat inbek hei, “Reng David in ni’nrepui heia inphut alei huksōt me kae. Ama’n Philisti heia inphut alei huksōt me, tâk tûnchu ama’n Absolom a inphut katlânsōt a niram adahlon jo.

¹⁰Eini’n Absolom kha nireng sik a thai nimanthi jo, tak ama rehmun a kathi jo. Khava jâra heisik a mo mi ṭhahrep in David rengpa heiṭhōi malena sik antatlo mak?” anti.

¹¹Israel he’n antahrisōt ṭong kha Reng David hneng katlung jo. Khava jâra David in Judah hlamkakeihei hneng avakader sik a Zadok leh Abiathar thempu atir jo hei, “Heisik a mo rengpa kha areng-innpuia ṭhōi malena sik a’nṭhōipui ahnung kakhôrpen kha nangni akachang sik chei?

¹²Nangni ka-innshung, karavōi leh kathisenkhet chei kae; heisik a mo nangni ani kaṭhōi inle ahnung kakhôr akachang sik chei?”

¹³David in Amasa hnenga antahri sik amantheisa hei, “Nang ka-innshung mi che kae. Tûna inphut nang Joab kathlenga remihei ka-ensuia kada sik che kae. Hivahi katlomak inchu Pathen in kei avōk hlon rasoh!”

¹⁴David ṭonghri khan Judah renghei leh mi rakip lum lona kha achensō joa, ama kha aṭōnpui karônhei seng leh anhe’nlena sik a ahnenga ṭong antir jo.

¹⁵Rengpa kha ajōng inle pha, Jordan tuidung mankan nasik a Gilgal a akahong Judah mihei leh Jordan tuidunga intō jo hei.

¹⁶Khava phatak a Bahurima inphut Benjamin mi Gera sapa Shimei kha Jordan tuidunga Reng David hlam intō sik a he’nnot hêra kae.

¹⁷Ama’n Benjamin phunga pase 1,000 ahe’nṭhōi hei. Khana Saul innshung sōkpa, Ziba’num asapa 15 leh asōk 20 leh kava heia, Jordan tuidunga rengpa hmaikunga heikatlung jo hei.

¹⁸Anmani’n rengpa tamadu katlo sik a khana reng innshung mihei kahrunga re inke sik a Jordan tuidung anrakan jo. Rengpa’n re kena sik a a’ntluk pha, Shimei in ahmai kunga inkun joa,

¹⁹khana ati, “Reng Kalûr, nang in Jerusalem nadahlon ninga katloṭhena kha amahngi pek jo roh. Khahei kha kei kadōia amatutlit pek mak roh khana amandon pek nôk mak jo roh.

²⁰Apu, ke’n setna katlo jo tia kamanhret, khava jâra tuning Reng Kalûr inhmupui sik a sak tinga phunghei kâra akahong hma inkeipen inkhat eng kae.”

²¹Zeruiah sapa Abishai in ahei hrisōt, “Shimei hi that hlon sik kae ajârchu RŌNGPU’n reng sik a akadei jo inkhat kha ahâksêra kae.”

²²Tâk David in Abishai leh anaipa Joab hneng ati, “Nanmandonna kha tu’n mo ader chei? Inrimna mo nantapek sik eng? Tûnchu kei Israelhei reng inkhat jo eng kae, khana tuning Israel mi inthat theimak ning.”

²³Khana ama’n Shimei hneng ati, “Ke’n ṭong kapek jo che nang tûte’n that mak hei tin che.”

²⁴Khava sōa Saul tupa Mephibosheth kha rengpa intō sik a kahong. Rengpa’n Jerusalem adahlona inphut kasesōt a torna leh inṭhōia ahe’nle mak kârseng, ama kha ake sôplo, ahnerhme eploa, khana apōnhei sôplo jo kae.

²⁵Mephibosheth kha Jerusalema inphut rengpa inhmupui sik a aheitlung pha, rengpa’n ahnenga ati, “Mephibosheth, nang chu kei leh leisesap mak jo me. Heisa mo?”

²⁶Ama’n amasôn, “Reng Kalûr, kei hi ke katlek eng kae ti namanhret eng. Ke’n nang leh inṭhōia sena sik a kashakōrtung chōngna sik mantluk roh tia kasōkpa hnenga kamanthei, tâk ama’n anileihōn jo eng.

²⁷Ama’n Reng Kalûr hnenga maleiseia atlo jo eng, tâk nang chu Pathen ngeva kapō che kae, khava jâra kadik nati kha tlo jo roh.

²⁸Kapa innshung mi rakip Reng Kalûr nang in nathat sik a rahōi jo hei kae, tâk nang in nadokhânga bu kasâkna sik a kei hi ratha napek eng. Ke’n hiva kakhea lungsetna Reng Kalûr hneng kangekna sik ratha neimak eng.”

²⁹Rengpa’n amasôn, “Ṭong hrisa sik neimak jo che. Saul karōi kha nang leh Ziba a’nsem sik cheia kamanṭhat jo.”

³⁰Mephibosheth in amasôn, “Ziba’n akhenga chenpet jo rasoh. Kei sik a chu Reng Kalûr in kadam senga nahong inle hi katluk set jo.”

³¹Gilead a, Barzillai kha’m Reng Kalûr in Jordan re akena akahrung sik a Rogelima inphut kajōng.

³²Barzillai kha akaterber kum 80 jo kae, ama mikahaotak kae, reng in Mahanaima aleiomlai ama’n bu leh thlai aleipek a kae.

³³Rengpa’n ama hneng ati, “Kei leh inṭhōia Jerusalema varoh, ke’n nang ka-ensui sik che.”

³⁴Tâk Barzillai in amasôn, “Kei akasôt hringmak jo ning; heisik a mo Reng Kalûr leh Jerusalema alakasesap sik me?

³⁵Kei kum 80 kae dek jo eng, heite’n ningṭhatna apektor mak jo. Kasâk ka-in um akatui akathai manhret tor mak jo eng, khana hlakasak hei rasa he’m theimak jo eng. Reng Kalûr phur hrikna hrep kachang sik jo eng.

³⁶Khang khava tloman kalen kha kei rahōi sōk mak. Khava jâra Jordan rea bongkhat ka’nṭhōipui sik che.

³⁷Khava sō leh inna inle rong khana kanu kapahei thlân hnenga vathi jo rong. Hin kasapa Chimham ka-om, nang anrazen sik che; inṭhōi roh, Reng Kalûr, nang in kaṭha nati kha ama chunga tlopek jo roh.”

³⁸Rengpa’n amasôn, “Ke’n ama kaṭhōi sik khana nang in namaduchen kha katlo pek sik che. Khana nang in nangek eng rakip kha katlo pek sik che.”

³⁹Khava sōa David leh amihei seng in Jordan kha anrakan jo. Ama’n Barzillai kha amajôp a vâng apek jo, khana Barzillai kha innting inle jo.

⁴⁰Judah mihei seng leh Israel mi her khat in anhrunga, Rengpa’n re akesō pha, Gilgal katlunga kase jo, khana Chimham in a’nṭhōipui.

⁴¹Khava sōa Israel mi rakip rengpa hneng kase heia ahnenga anti, “Reng Kalûr, heisik a mo kansōpui Judah he’n nang leh na-innshung mi khan chu namihei Jordan rakanna katlunga ṭhōisōtna sik che ratha kannei tia antamandon?”

⁴²Judah mihe’n anmasôn hei, “Keini’n hivahi kantlona ajârchu Rengpa hi kanmi inkhat kae. Khava jâra heisik a mo hivahin nanhnuk akana sik? Ama’n kanbu leh thlai aman apek ung changmak khana heikhat apek ung um changmak.”

⁴³Israel he’n anmasôn, “David rengpa kha nanmi achang ravâng, nangni kanek a keini ta manchangna sik a ahlam 10 kannei. Heisik a mo hnōi nantase ung? Rengpa vaṭhōi malena sik a ṭongkahri hma-inkei kha keini ung kae!” Tâk Judah mihe’n antâ manchang sik a antahri kha, Israelhei kanek a hnuk kasetak a anhri jo.