Read Komrem SAMUEL INHNINA 2 Bible Online

SAMUEL INHNINA 2 - Komrem bible

SAMUEL INHNINA 2

¹Hivasōa, David in RŌNGPU hneng ader, “Kei akase enga Judah khōpui inkhat so kavahlō sik mo?” RŌNGPU’n, “Ôk,” tia amasôn. David in ader, “Khopen mo?” RŌNGPU’n ati, “Hebron,” ati.

²Khava jâra David in a nuhmei 2 hei: Jezreel ram a Ahinoam leh Carmel ram a Nabal nuhmei renghmeinu Abigail aṭhōi heia kase jo.

³Ama’n amihei leh an-innshung aṭhōi heia, Hebron kimvea khōpui heia hong ka-om jo hei.

⁴Khava sōa Judah mihei Hebrona kava heia David kha Judah reng sik a thai anmanthi jo. David in Gilead ram a Jabesh mihe’n Saul kha anvûm jo ti ṭong athei pha,

⁵ama’n mi ṭhahrep ṭong hi amanrôn heia atir hei, “Nangni’n nanrengpa chunga kajana nanmalâra nanvûm jâra RŌNGPU’n mahâmṭhatna buk chei rasoh.

⁶Tûnchu, RŌNGPU’n nanhnenga maritna leh taksenthei chang jo rasoh. Nanṭōn tlo ṭhat jâra ke’num kaṭhatak a katlo sik jo chei.

⁷Akahrat leh akahrâng chang ruh! Nanrengpa Saul kathi jo, Judah he’n anreng sik a thai anmanthi jo eng.”

⁸Saul remi hlamkakei Ner sapa Abner leh Saul sapa Ishbosheth kha Jordan re kake heia Mahanaima katlânsōt jo hei.

⁹Khana khan Abner in Ishbosheth kha Gilead Asher, Jezreel, Ephraim leh Benjaminhei ram shunga khana Israel pumpui chunga reng amanṭang jo.

¹⁰Ama Israelhei renga ahon’ṭang kha akum 40 katluk jo, ama’n kum 2 vai aleirôn. Tâk-kha Judah phunghei chu, David ṭong jôk anjuia kae,

¹¹khana ama’n kum 7 leh aher Hebrona Judah chunga vai aleirôn.

¹²Abner leh Ishbosheth ṭōnpui karônhei kha Mahanaima inphut Gibeon khōpuia leikase hei.

¹³Zeruiah intinu sapa Joab leh David ṭōnpui karôn he’n tuikhur hnenga intō hei, khana khan ankhenga in-ong hei, rup khat in tuikhurpang khat ting, rup hlop in apang khat ting hmai inhnget a in-ong hei.

¹⁴Abner in Joab hneng, “Alang alang et a rether ṭhahrep masōk hei me sona re man er hei rih,” ati. Joab in, “Kaṭha jo,” tia amasôn.

¹⁵Khava jâra Ishbosheth leh Benjamin phung kahlâng kathlenga, mi 12 he’n David mi 12 leh intuk jo hei.

¹⁶Ama ama ta’ntukpui et kha anchemjâm vâng indôt tō heia, mi 24 hei kha kapûr heia, kathisōm jo hei. Khava jâra Gibeon ram shunga khava hmun kha “Chemjâm hleipuk” tia anphō jo.

¹⁷Khava sōa re inhnaktak intuk hei, Abner leh Israel mihei kha David mihe’n antor jo hei.

¹⁸Khana khan Zeruiah sapa 3 Joab, Abishai leh Asahel ka-om hei. Asahel kha ram shakhi kapōa tlân kahrat,

¹⁹Abner kha ahnong jo, akasur sik a athlûr hrek jo.

²⁰Abner in akahnungting ahei ena ati, “Nang Asahel che mo? “Ôk.” tia ama’n aleimasôn.

²¹Abner in ati, “Amanloi mak roh. Remi inkhat manlōi ina anei kha lopek roh.” Tâk-kha Asahel in amanlōi ṭhak a kae.

²²Ave nôk a Abner in ahnenga ati, “Amanloi mak roh! Heisik a mo nang thatna sik a rumhrat natlo eng? Nasōpuipa Joab hmai heikhong mo ka-entor sik?”

²³Tâk-kha Asahel in masō dekmak; khava jâra Abner in akahnungting akasei vâng ahei sun a, avonlai akathia akhōn ting kathleng joa kae. Asahel kha raleia kapura kathi jo, ama lei-intehnâm jo, akahong rakip inhnga heia kangir hei.

²⁴Tâk Joab leh Abishai inchu Abner kahnung anthlûr manphut jo, kani tlâk pha Gibeon ramhâng sena hlam a Gia nisō intonga Amma tlânga kava jo hei.

²⁵Benjamin phunga mihe’n intûp heia Abner kha ankakekhum nôk jo, tlâng chunga inrin jo hei.

²⁶Abner in Joab kha ahei bek, “Eini hi re a’ntloṭhak sik me mo? A’nchai sik ting heite emak ning, tâk inhōtna kachang sik ti hi manhret mak che mo? Keini naram mi changpui ung kae. Nami he’n antamanloi ung manbângna sik naṭong pekna kha heituk mo alakasôt sik?”

²⁷Joab in amasôn, “Akahring Pathen rahminga a’nhâksêr eng, nang in ṭong hi nahei hrimak inchu, kami he’n ajing jîngkâr katlunga antamanlōi sik che kae.”

²⁸Khava sōa ami he’n Israelhei manlōi anbângna sik a mêrchîkna pengkun Joab in atum jo; re intlo kha kabâng jo hei.

²⁹Abner leh ami he’n jân kathang Jordan Phaicham anpetan jo; Jordan tuidung re kake hei, khana ajîng jîngkâr kalôn heia, Mahanaima heikatlung nôk jo hei.

³⁰Joab in ami manlōi abâng pha, amihei kha ankhenga amantûp hei khana Asahel inveina mi 19 avât jo hei.

³¹David mihe’n Benjamin phunga inphut Abner mi 360 anthat jo hei.

³²Abner leh ami he’n Asahel kalōng kha anrôna Bethlehema a-innshung thlâna anvûm jo. Khava sōa, anmani jân kathang injôk heia, khōvâra Hebron heikatlung nôk jo hei.