Read Komrem SAMUEL INHNINA 20 Bible Online

SAMUEL INHNINA 20 - Komrem bible

SAMUEL INHNINA 20

¹Gilgal a, Benjamin phunga Bikri sapa arahming Sheba inti hnemna kase inkhat leika-om. Ama’n pengkun atuma ka-ông, “David a inphut inkaisōt ruh! Eini’n ama juimak min! Israelhei, inna se jo rih!” ati.

²Khava jâra Israel he’n David kha andahlona Sheba leh kasesap jo hei, tâk Judah he’nchu David kha lum anloa Jordana inphut Jerusalem katlung anjui jo.

³David kha Jerusalema a-innpui ahong tlung pha, ama’n innpui kaensui sik a aleidahlon anuhmei manbo 10 hei kha aṭhōi heia, mikahrunghei thōia ada jo hei. Ama’n antarangei rakip amantluk pek hei, tâk rakhum chu inchunpui mak jo hei. Anmani kha renghmeihei hringkhō hmang kapōa, anhringkhō katlung bit a ka-om hnâm jo hei.

⁴Rengpa’n Amasa hneng ati, “Judah mihei kha bek mantûp et hei ruh, atip sûna anmani leh hivahin he’nle ruh.”

⁵Ankabek sik a Amasa kase jo, tâk rengpa’n atep pek phatak a khan he’nle mak jo.

⁶Khava jâra rengpa’n Abishai hneng ati, “Sheba’n Absolom kanek a inrengna apek chet sik jo me kae. Kami heiṭhōi hei ina vahnong ruh, kha achangmak inchu ama’n khōpui kur kahnet hei ahlō sik a kha einia inphut katlânsōt khâk sik.”

⁷Khava jâra reng kahngâk Joab mihei leh alak remi rakip Abishai leh inṭhōia Sheba kahnong sik a Jerusalem andahlon jo.

⁸Anmani Gibeon hnenga hlungpui kalen hmun kha antlung pha, Amasa’n aleiratō hei. Joab kha re sik a invona, akhonkir leh a’nsur inmat chemjâm apaia athōn. Ahmating avase det pha, chemjâm kha ho’ndoksōt jok jo.

⁹Joab in Amasa hneng ati, “Kaṭhōnpa heimo akachang nâk che?” akabeng majôpna sik a akut changting ahnerhme asurtlitpek jo.

¹⁰Joab in akut inkhat tinga chemjâm achoi kha Amasa’n ôrmona leinei mak, khana Joab in avon akadôtpek jo, khana akari hei kha raleia jōngkatla inthla jo hei. Inrangtak a ama kathi joa, Joab in abâna vōk nôk mak jo. Khava sōa Joab leh anaipa Abishai in Sheba kahnong kase jo hei.

¹¹Joab mi inkhat Amasa kalōng hnenga kangira ka-ônga, “Joab leh David langa a’nṭang rakip in Joab kahnung jui ruh!” ati.

¹²Amasa kalōng kha thisen in akachûm bit a, hlamlen laiṭim a intejen jo. Joab mi inkhat in, akase akahong rakip a’nhngat hei kha ahmu pha, akalōng kha hlamlena inphut ramhâng ting akeisōt a pōn insâ inkhat achunga amakhu jo.

¹³Akalōng kha hlamlena inphut anthonsōtsō pha, mi rakip Sheba kahnong sik a Joab kha anjui jo.

¹⁴Sheba’n Israel phung rakip hei ramri shunga kahlut a khana Abel Beth Maacah inti khōpuia kahong jo, khana Bikri phungṭhena mihei intûp heia khōpui shungting akahnung anjui jo.

¹⁵Joab mihe’n Sheba kha khana khan ka-om jo ti anthei jo, khana khōpui kha ankimve jo. Anmani’n kurbang vâng intong langting khan ralei pi vânga kena sik andenga khana kurbang kha apurna sik abang ṭhōi kha ancho manphut jo.

¹⁶Khōpui shunga khan nuhmei kasing inkhat leika-oma kurbanga inphut heika-ônga ati, “Rangei ruh! Rangei ruh! Joab kha hin ajōngna sik a manthei ruh; ama ka’n bekpui hnōm.”

¹⁷Joab kha kase, khana amanu’n ader, “Nang Joab che mo?” Ama’n, “Ôk, kei eng kae,” tia amasôn. Amanu’n, “Apu, kaṭong hri rangei kaṭha roh,” ati. Ama’n, “Karangei,” tia amasôn.

¹⁸Amanu’n ati, “Tenlai hing’hin mihei leihrina ka-om, ‘Abel khōpuia se ina namadu kha valo roh,’ khang’khan anta leitlo kae.

¹⁹Kankhōpui hi akalen inkhat kae, Israelhei shunga chamna leh taksen ka-ompen inkhat kae. Heisik a mo sukkhōi sik a natlo? RŌNGPU karōi hi nasuk manhmang hnōm mo?”

²⁰Joab in amasôn, “Chang hêrmak! Ke’n nankhōpui hi suk manset mak ning khana suk manhmang hêrmak ning!

²¹Khavakha keini mantlukna changmak. Ephraim tlângrama Bikri sapa arahming Sheba intipa’n David rengpa dōina re atlophut jo. Hiva mipa rōk hi ahei pek sōt ruh, khōpuia inphut kasesōt sik eng.” Amanu’n ati, “Alu kha kurbang chunga inphut kanjōng mathlâk pek sik che.”

²²Khava sōa amanu kha khōpuia mihei hneng khan aṭōn mantluk leh inṭhōia kasea, Sheba lu kha antansōt a, kurbang chunga inphut Joab hneng anmathlâk pek jo. Ama’n, ami he’n khōpui kha andahlonna sik a mêrchîkna pengkun atum jo, khana anmani an-innting inle jo hei. Khana Joab chu Jerusalema rengpa hneng inle jo.

²³Joab kha Israel remihei hlamkakei kae; Jehoiada sapa Benaiah kha David kahngâk sik a nganse kae;

²⁴Adoniram kha rumhrat ṭōnmihei ka-ensuia nganse kae jo. Ahilud sapa Jehoshaphat kha ṭong inzet rabuhei katinta sik a nganse kachang jo;

²⁵Shevah kha ṭongtan rabu inzet sik a; Zadok leh Abiathar kha thempu kachang sik a,

²⁶khana Jair khōpuia Ira kha’m David thempuhei kâra inkhat kachang jo.