Read Komrem SAMUEL INHNINA 21 Bible Online

SAMUEL INHNINA 21 - Komrem bible

SAMUEL INHNINA 21

¹David vairôn shunga, kum 3 set ṭâm inhnaktak leikatla. Khava jâra David in khava chunga RŌNGPU ngekna anei, RŌNGPU’n ati, “Saul leh a-innshung in mi anthat jâra ṭhena annei; ama’n Gibeon mihei aleithat hei.”

²(Gibeon mihei kha Israel changmak hei; anmani kha Israel he’n hrung sik a ale’ntep Amor mi rup katlômtek hei kha kae, tâk Saul in Israelhei leh Judah hei thangtôm puina jâra anmani suk manhmang sik a aleitlo hei.)

³Khava jâra David in Gibeon mihei kha abek heia anhnenga ati, “Ke’n heimo katlo pek tor sik chei? Nangni’n RŌNGPU mihei kha mahâmṭhat nanpek theina sik a nanchunga ṭōnse le’ntlo kha kamandikpek hnōm chei.”

⁴Anmani’n anmasôn, “Keini’n Saul khana a-innshung mihei leh kan-innâk hi sana leh dangka vânga mancham thei um changmak, khana Israel mi inkhat rōk that hnōm mak hei ung.” David in ader hei, “Kha achang inchu heimo katlo pek sik cheia, nanta madu?”

⁵Anmani’n anmasôn, “Saul in keini hi suk manhmang sik leh Israelhei omna hmun rakip a inkhatbek akahringa damak sik ung ti hi amadu kae.

⁶Khava jâra ama sōn leh pâr pase 7 hei kha apesōt roh, keini’n RŌNGPU takadei reng, Saul khōpui Gibeah hnenga RŌNGPU hmaikunga kanmakhei hlon sik hei.” Rengpa’n amasôn hei, “Anmani kahei pek sōt sik chei.”

⁷Tâk ama leh Jonathan in inthengtak a intepna anleinei jâra, David in Jonathan sapa Mephibosheth kha aṭhensōt jo.

⁸Achang ravâng, ama’n Aiah sanu Rizpa leh Saul hei sapa Armoni leh Mephibosheth hei 2 kha aṭhōi jo hei; khana Saul sanu Merab in, Mehola ram mi Barzillai sapa Adriel leh antanei sapa 5 hei kha’m aṭhōi jo hei.

⁹David in anmani kha Gibeon mihei kut a apek sōt jo hei, tlâng chunga RŌNGPU hmaikunga anmakhei jo hei, mi 7 hei kha ankhenga kathisap jo hei. Anmani thatna kha zerthla shunga bunim ât inphut laia kae.

¹⁰Khava sōa Aiah sanu, Saul nuhmei manbonu khan akathi kalōnghei omna hlungpui chunga khan borapōn vâng buk inkhat asyema, sâng khôm anphutbia inphut kajîng thla, khōtui ahongtlâk mak kârseng khana khan ka-om jo. Sûn pha kathi kalōnga vahei kha ahnong sōt hei, jân pha ramsha heia inphut ahrung hei.

¹¹David in Rizpa ṭōntlo kha athei pha,

¹²Gilead ram shunga Jabesh miheia inphut Saul leh asapa Jonathan ru leh chang anvalo jo. (Gilboa Tlâng chunga Saul anthat ning Philisti he’n ankalōng antamakheina, mipui intûpna telai Beth Shan khana inphut anta leimarûk hei kae.)

¹³David in Saul leh asapa Jonathan ruhei kha avaloa mi 7 antamakhei hei ruhei kha leh amantûp jo hei.

¹⁴Khava sōa Saul leh Jonathan ruhei kha Benjamin ramria Zela khōa Saul pa Kish thlâna anvûm jo hei, rengpa ṭongpek-hei kha akhenga antlo jo. Khava sōa Pathen in ram shung sik a anderna hei kha arahlâng pek jo hei.

¹⁵Philistihei leh Israelhei kâra rehlop inkhat kasōk nôk a David leh amihei kha kase heia, Philistihei kha re anvatuk hei. Rehmun inkhat a David kha kachâmneng jo.

¹⁶Mipum kalen arahming Ishbibenob inti inkhat in, sum-êng kasei kilograme 3 leh aṭim kahrik achoi, khana chemjâm katherpet inkhat achoia David kha athat tor sik a amandon.

¹⁷Tâk Zeruiah sapa Abishai kha David inthōpui sik a kava a mipum-kalenpa kha anbuhlua athat jo. Khava sōa, David mihe’n David kha anmani leh re katuk asesōm nôk makna sik a ṭong anmantep jo. Anmani’n, “Nang Israelhei inhōrna che kae, nathi sik madu mak ung,” anti.

¹⁸Hivasōa Gob a Philistihei leh re intlona leika-om, khava lai Hushah mi Sibecai in mipum kalen arahming Saph intipa kha aleithat.

¹⁹Gob a Philistihei leh re intukna vōi khat ka-om nôk, Bethlehema Jair sapa Elhanan in Gath a Goliath athat nôk, ama kasei sung kha pōn khōngna ṭatem kapō kae.

²⁰Khava sōa Gath a re leika-om nôk, khana khan re katlo hnōm mipum kalen inkhat leika-om. Akutpha inkhat a kutpâr karuk et, khana ankepha inkhat a kepâr karuk et aneia kae.

²¹Ama’n Israel mihei kha ahmumasi hei, khana ama kha David naipa Shammah sapa Jonathan in athat jo.

²²Hiva 4 hei hi Gath ram a mipum kalenhei sōn leh pârhei kae, David leh ami he’n anthat heia kae.