Read Komrem SAMUEL INHNINA 23 Bible Online

SAMUEL INHNINA 23 - Komrem bible

SAMUEL INHNINA 23

¹Jesse sapa David kha Pathen in alei manlen, Jacob Pathen in renga aleikadei, khana Israelhei sik a hla kahōi tatak aleikaphō kha kae! Hihei hi David ṭonghri achaina hei kha kae:

²RŌNGPU rathla khan keia inphut ṭong ahri; aṭong hri kha kahner heia kachōng.

³Israel Pathen khan ṭong ahri; Israelhei kahrungpa khan kahnenga ati: “Ṭongdik a vaikarôn rengpa kha, Pathen ṭong kajuia vaikarôn kae,

⁴sumtuk kaimakna jîngkâr kani tajōngsat ka-ang, khōsûrsō lim a kani tajōngsat phi kadi rik-rak kapō kae.”

⁵Khang’khan Pathen in kasōn kapâr hei kha vâng apek sik hei, ajârchu ama’n ahei tik chen a sik a a’nteppui jo eng, akakōimak sik inhnōmna, a’nthleng mak sik jo intepna kae. Khavakha kei tamadu kae; khavakha kei retorna kae, khana Pathen in alatlosōt sik kae.

⁶Tâk-kha Pathen neilo hei khachu rahling hlonsōtsa kapō hei kae; tute’num kut hrema tônthei mak hei.

⁷Thir hmangchâk achangmak leh kasei nahmang sik kae; ro-inthoina reng sik hei kae.

⁸David remi rahming inthang hei khachu hihei hi kae: ahma kakeipen kha Takhemon ram a Josheb Basshebeth kae, ama hi “3” hei hlamkakei kae; ama’n akasei vânga mi 800 re adōi heia rehmun khat rōk a ankhenga aleithatpet hei.

⁹Rahming inthang 3 hei kâra 2 tluknapa kha Aho phungṭhena Dodo sapa Eleazar kha kachang. Ni khat ama leh David in Philistihei re katuk sik a a’ntûp hei kha anle’n-erpui hei. Israelhei kha hnungting inle jo hei,

¹⁰tâk ama chu ahmun a khan kangirtlit a akut ahong ngōia achemjâm akalektor mak jo kapha’m a’ntukpui heia kae. Khava ning khan RŌNGPU’n retorna kalentak aneia kae. Re kha a’nchaisō pha, Israelhei kha Eleazar omna hmun a he’nle heia akathihei revon anlosōt pek hei.

¹¹Inthum hei kâra rahming inthang 3 tluknapa kha, Harara Agee sapa Shammah kae. Philistihei kha Lehia be hmôngna hleipuk inkhat a le’ntûp hei. Israelhei kha Philisti heia inphut katlânsōt jo hei,

¹²tâk Shammah chu re intukna hmun hleipuk a kangirtlit a ating heia, Philistihei kha athat hei. RŌNGPU’n khava ning retorna kalentak anei.

¹³Sapâr khôm inphut sik ting, “30 hei” kâra mi 3 kha, Philisti mi rup khat he’n Rephaim Phaichama rekur anmatunglai, David leiomna Adullam hlungkōk a khan kasesuk hei.

¹⁴Khava lai khan David kha rekur intuk khum tlâng inkhat a leika-om, khana Philisti mi rup khat in Bethlehem anhlōa ka-om hei.

¹⁵David in inn arangeia kana joa ati, “Tu mo inkhat in Bethlehem kekot hnenga tuikhura tui kha aniheithe pek a ka-in inchu nu!”

¹⁶Rahming inthang mi 3 he’n Philistihei rephōr anpetana kase heia tuikhura tui kha anheithea David sik a anheichoi pek jo. Tâk ama’n tui kha inmak jo, khava kanek a RŌNGPU hneng inthoina inkhat a asun mathlâk jo

¹⁷khana ati, “RŌNGPU, hivahi intor hêrmak ning! Hivahi mi 3 hringkhō kaphe ngam hei thisen ka-in kapō kachang sik jo!” Khava jâra in sik kha hnōm mak jo. Khavakha remi inthang mi 3 hei invakna ṭōntlo kae.

¹⁸Joab naipa Abishai (annu Zeruiah) kha “A’nthang 30” hei hlamkakei kae. Ama’n akasei vâng mi 300 re alei intukpui hei khana athatsō hei, khava jâra “30” hei kâra a’nthang hongkachang.

¹⁹Ama kha “30” hei kâra a’nthangpen kae, khana anhlam kakei inṭang jo, tâk “3” hei kapōa chu inthangmak.

²⁰Kabzeel a Jehoiada sapa Benaiah kha remi inthang hei kâra inkhat kae; ama’n Moab rekahrat 2 aleithat hei leh inṭhōia ṭōn invakna katamtak aleitlo. Ni khat kavur tlâk ning kōk inkhat a kasesuk a shabakkai inkhat avathat a kae.

²¹Ama’n kasei kachoi Egypt mi kalentak inkhat um aleithat. Benaiah in athingpum inkhat vâng abuhlua Egypt mipa kut a kasei kha akasut a, khan vâng khan athat a kae.

²²Khahei kha, “30” hei kâra inkhat Benaiah ṭōn invak leitlona kha kae.

²³Ama kha ankâra inthang hêr, tâk “3” hei kapōa a’nthang chu changmak. David in ama kha ama kahrunga amanngan jo.

²⁴“30” hei kâra alak mihei kha: Joab naipa, Asahel, Bethlehema Dodo sapa Elhanan Harod a Shammah leh Elika Pelet a Helez Tekoa a Ikkesh sapa Ira Anathoth a Abiezer Hushah a Mebunnai Aho a Zalmon Netophah a Maharai Netophah Baana sapa Heleb Benjamin shunga Gibeah a Ribai sapa Ittai Pirathona Benaiah Gaash hnenga phaichama Hiddai Arabah a Abialbon Bahurima Azmaveth Shaalbon a Eliahba Jashen sapahei Jonathan Harara Shammah Harara Sharar sapa Ahiam Maacah a Ahasbai sapa Eliphelet Giloa Ahithophel sapa Eliam Carmel a Hezro Arab a Paarai Zoba a Nathan sapa Igal Gad a Bani Ammon a Zelek Beeroth a Naharai, Joab revon karônpa Jattira Ira khana Gareb Hit mi Uriah Ankhenga remi inthang 37 leika-om hei.