Read Komrem SAMUEL INHNINA 24 Bible Online

SAMUEL INHNINA 24 - Komrem bible

SAMUEL INHNINA 24

¹RŌNGPU kha avea Israel chunga ahnuk kana jo, khana David kha ankasu inrim sik a amathok nôk jo. RŌNGPU’n ahnenga ati, “Se in a-Israel leh Judah mi aja tei hei roh.”

²Khava jâra David in a remi hlamkakei Joab hneng ṭong apek a, “Naṭōn karônhei leh se una, ram pumpuia Israel phung rakip aja vatei hei ruh. Mija heija jo mo kamanhret hnōm.”

³Tâk Joab in rengpa amasôn, “Reng Kalûr, RŌNGPU na-Pathen khan tuna aja kanek a Israel mipuihei kha araja araja a mantamsa hei rasoh, khana aṭōntlo kha akahmu sik hring hi roh. Tâk-kha heisik a mo Reng Kalûr in hivahi natlo hnōm?”

⁴Tâk, rengpa’n Joab leh aṭōn karônhei kha aṭongpek amanjui jo heia; ama a-omna kha andahlona Israel mihei katei sik a kase jo hei.

⁵Anmani’n Jordan re kake heia Gad ramri shunga phaicham laiṭim a khōpui, Aroer thlâng ting rekur ansak jo. Khana inphut Jazer sak ting kase hei,

⁶khana Hit mihei ram shunga Gilead leh Kadesh a kase hei. Khava sōa Dan a kase heia, Dan a inphut Sidon tlaitlâk ting kase hei.

⁷Khava sōa kurbang intuk khum Tyre khōpui thlâng intonga kasesuk hei, khana Hiv leh Canaan khōpui rakip a khana achaina Judah thlâng intonga Beersheba a kase hei.

⁸Khava jâra ram pumpui kha avachōna, thla 9 leh ni 20 sōa Jerusalem ting he’nle jo hei.

⁹Anmani’n remia inṭangthei seng pase ankhenga Israel in 800,000 khana Judah’n 500,000 hei kae tia rengpa hneng ṭong anmathlung jo.

¹⁰Tâk David in mija ateisō jo pha, amandon ṭhen theina khan amanrim manphut jo, ama’n RŌNGPU hneng ati, “Ke’n hiva katlona hin ṭit ka-om tak setna katlo jo! Lungsettak a arangei mandam roh. Kamotak a kaleitlo jo.”

¹¹RŌNGPU’n David sânkathempa Gad hneng ati, “Se ina David hneng vamanthei roh, akadei sik a ahlam 3 kapek sik. Akadeisōt inkhat kha katlo pek sik.” Ajîng jîngkâra David aṭhōisōt sōa,

¹³Gad kha ahnenga kasea, RŌNGPU tahri pek hei kha avahri pek jo, khana ader, “Khō jôk mo naman-e hnōm? Naram shunga kum 3 ṭâm tlâk sik, achangmak leh thla 3 na’nrepui heia inphut tlânsōt sik, achangmak leh ni 3 naram shunga hrise katlung sik? Tûn hihei hi mandon roh, khana amanthei roh, hei ṭong masôn mo RŌNGPU hnenga kachoi male sik?”

¹⁴David in amasôn, “Kei inrimtak a ka-om eng! Tâk mihring in karâkna apek sik eng khachu madu mak eng. RŌNGPU ama khet in karâkna anikapek kha chang rasoh, ajârchu ama chu lungset kathem kae.”

¹⁵Khava jâra RŌNGPU’n jîngkâra inphut akani tepna kârseng Israelhei chunga hrise katlung jo. Ram shung rakir inkhat a inphut lang khat ting katlunga Israelhei 70,000 kathi jo hei.

¹⁶RŌNGPU ngeva khan Jerusalem asuk manhmang sik jo pha, RŌNGPU’n ami karâk sik hei kha amalung athleng joa mikathat ngeva hneng “Bâng jo roh! Katluk jo!” ati. Ngeva kha Jebush mi, Arauna saphōr hmun hnenga leika-om.

¹⁷David in mikathat ngeva kha ahmu, khana RŌNGPU hneng ati, “Kei akaṭhe eng kha kae. Akadik mak katlo kha kei eng kae. Hiva misarahei hin heimo antatloa? Kei leh ka-innshung jôk nakarâk sik ung kae.”

¹⁸Khava ning khan Gad kha David hneng kasea ahnenga ati, “Arauna saphōr hmun a vase roh khana RŌNGPU sik a maichâm inkhat vasyem roh.”

¹⁹David in RŌNGPU ṭong ajuia Gad in amanthei kapōa kase jo.

²⁰Arauna khan ahei ena rengpa leh aṭōnpui karônhei ahnenga anhongtou kha ahmu jo. Ama kha David hmaikunga raleia kakhup a,

²¹ader jo, “Reng Kalûr, heisik a mo hin akahong che?” David in amasôn, “Hrise kalâng bângna sik a, naphōr hmun rachôk a RŌNGPU sik a maichâm inkhat sak sik akahong eng kae.”

²²Arauna’n ati, “Inlo roh Reng Kalûr, namadu seng kha RŌNGPU hneng tōksōt roh. Hinahin maichâma inthoina tōksōt sik sehratche ka-om hei; anrîngke hei leh savōkna cheirông hei hmeia ti sik a hin ka-om hei.”

²³Arauna in khahei seng kha akhenga rengpa hneng apek sōt a, khana ahnenga ati, “RŌNGPU na-Pathen in natōksōt inthoina kha rahlâng pek che rasoh.”

²⁴Tâk, rengpa khan amasôn, “Changmak, hiva man hi kapek sik che. Aman kapek mak kha RŌNGPU ka-Pathen hneng inthoina tōksōt mak ning.” Khava saphōr hmun leh sehratche kha dangka 50 vânga arachôk jo.

²⁵Khava sōa ama’n RŌNGPU sik a maichâm inkhat asyema, romanvâm inthoina leh inlôikhômna inthoina tōkna anei jo. RŌNGPU’n anderna arahlâng pek a, Israelhei chunga hrise kalâng kha kabâng jo.