Read Komrem SAMUEL INHNINA 3 Bible Online

SAMUEL INHNINA 3 - Komrem bible

SAMUEL INHNINA 3

¹Saul innshung kathlop leh David innshung kathlop hei inrena kha pha kasôttak khanga leika-om. David kha aheihrat chet-chet jâra khan ama indōipuihei kha kadōi chet-chet jo hei.

²David in Hebrona sapa karuk anei hei, an-intetna dungjuia upa naipanghei kha: Ammon, anu chu Jezreel a Ahinoam kae;

³Chileab, anu chu Carmel a Nabal nuhmei renghmeinu Abigail; Absolom, anu chu Geshura Reng Talmai sanu Maacah;

⁴Adonijah, anu chu Haggith; Shephatiah, anu chu Abital;

⁵Ithream, anu chu Eglah. Hiva asapa senghei hi Hebrona anei hei kae.

⁶David remihei leh Saul innshung kajui remihei kha re an-intuk injôn jâra, Saul kahnung kajuihei kâra Abner kha aratha hong kangar chet-chet jo.

⁷Ni khat Saul nuhmei manbo Rizpa, Aiah sanu kha Abner in ajepui atia Saul sapa Ishbosheth in ahri vângveia kae.

⁸Hivahin Abner ahnuk kana hêra kae. Ama’n a-ôngsan, “Ke’n Saul hi kahōn khâk sik tia namandon mo? Judah inzen eng kae tia namandon khet eng mo? Ahma inkeibia inphut napa Saul, asōpuihei leh aṭhōn-arehei kajatak a ṭong kajui eng kae khana David in ator sik chea inphut kahuk che kae; kha’num nuhmei inkhat jâra themmô nalapek eng mo!

⁹RŌNGPU’n Saul leh asōnheia inphut rengram kha alosōt sik a kha, ramri rakir inkhat a inphut inkhat katlunga Israel leh Judah an-inhnibât sik a David kha reng amatung sik jo. Tûnchu hivahi pui kamathluk mak inchu Pathen in avōkthat rasoh!”

¹¹Ishbosheth in Abner kha aṭit hêr joa ṭongrahme inkhatbek hri tor mak jo.

¹²Abner in khava lai Hebrona aka-om David hneng mi atir heia, hinga amanti hei, “Tu’n mo hiva ram hi vai arôn sik? Kei leh inhnōmtōna syem roh, Israel pumpui nalangting an-inṭangna sik ke’n ka’nthōpui sik che.”

¹³David in amasôn, “Kaṭha jo! Ke’n ahlam inkhat a nang leh inhnōmtōna kasyem sik, kei inhmupui sik a nava pha Saul sanu Maichal kha naheiṭhōi nger sik kae.”

¹⁴Khana David in Ishbosheth hneng hinga akahri sik a’m mi atir hei, “Kanuhmei Michal kha apek male roh. Amanu ompuina sik a Philisti mi 100 vun kaleitan kae.”

¹⁵Khava jâra Ishbosheth in amanu puise Laish sapa Paltiela inphut Maichal kha aṭhōisōt jo.

¹⁶Paltiel in amanu kha Bahurim khōpui hlamdunga ajuia, asepuma kaṭap a kae. Tâk-kha Abner in, “Innting inle roh,” ati pha, inle jo.

¹⁷Abner kha Israel hlamkakeihei hneng kasea anhnenga ati, “David hi nanreng manchang sik a pha kasôttak nanlei ngeitō jo.

¹⁸Tunhi nangni sik a pha kaṭha jo kae. RŌNGPU’n, ‘Ke’n kasōk David kahmanga kami Israelhei kha Philistihei leh alak ankadōi rakip heia inphut kamanhuksōt sik hei,’ tia aleihri kha mandonsōt ruh,” ati.

¹⁹Abner in Benjamin phunghei hnenga’m ahri jo, khava sōa Benjamin mihei leh Israel he’n tlo sik tia an-inhnōmna kha David hnenga manthei sik a Hebrona kase jo.

²⁰Abner kha mi 20 leh inṭhōia David hneng anhong jo pha, David in revei atlopek hei.

²¹Abner in David ahri pek, “Tûn kase sik enga kha, Israel pumpui nang langa an-inṭangna sik a kamanhnōm sik hei. Reng sik a anrahlâng sik che, khana namadu hlamtak kha nachen sik jo, ram pumpuia vai narôn sik jo.” David in Abner kha inhukna sik inngamna apeksōa ahlam a amanjōn jo.

²²Hnunga, Joab leh David ṭōnpui karôn ralak he’n mihei anvachomna inphut neinâk katamtak anheirôna hong inle hei. Achang ravâng, Abner chu David leh Hebrona leiom mak jo hei, ajârchu, David in inhukna sik inngamna ṭong ahri peksōa aleitirsōt joa kae.

²³Joab leh amihei anheitlung pha, Abner kha reng David hneng kahonga khana rengpa’n inhukna sik inngamna ṭong apeksōa aleitirsōt jo tia mihe’n anhri pek jo.

²⁴Khava jâra Joab kha rengpa hneng kasea ahnenga ati, “Heimo natlo jo? Abner nahnenga akahong kha, heisik a mo khang’khan nalei manse jo?

²⁵Ama kha nang kahōn sik leh naṭōntlo rakip leh nase nahongna rakip ka-en sik a hina akahong kae. Kha namanhret kae!”

²⁶David adahlon sōa, Joab in Abner kajongsōt sik a ṭongkarôn atir jo hei, anmani’n Sira tuikhura inphut anheiṭhōi male jo; tâk David in khava chungchânga heite leimanhret mak.

²⁷Abner kha Hebron aheitlung jo pha, Joab in kotting aṭhōisōt, marûk katia inbekpui sik kapōa, khana avonlaia akadôtpek jo. Khanga Abner kha Joab naipa Asahel aleithat jâra aphuhlōna ama kha athat joa kae.

²⁸David in ṭong kha athei pha ama’n ati, “Kei leh kamihei chu Abner anthatna chunga hin ṭhena nei hêrmak ung ti hi RŌNGPU’n amanhret.

²⁹Joab leh a-innshung rakip chunga hiva karâkna hi tlung rasoh! Akhang akhanga an-innshunga pase ṭhahrep anneinâk a, nat kakhôk, vunnat kakhôk, nuhmei ṭōn rōk akatlo tor, rea akathi, achangmak leh vonṭâm kadea omṭhak hei rasoh tia ahâksêr jo hei.”

³⁰Khang’khan, Joab leh anaipa Abishai in, Gibeona rehmun a Abner in annaipa Asahel athatpek jâr heia, achunga phu antahlō jo kae.

³¹Khava sōa David in, Joab leh ami he’n anpōnhei ankeihlera borapōn an-insina sik, khana Abner sik a jai andena sik a ṭong apek hei.

³²Abner kha Hebrona anhre jo, rengpa kha thlâna kare kasōktak a kaṭap jo, khana mipuihei kha’m ankhenga kaṭap jo hei.

³³David in Abner sik a hiva in-ôina hla hi aleisak: “Heisik a mo Abner in mikamo inkhat kapōa akathi sik?

³⁴Akut-hei inkhōpmak, Ake leh kha inkhit mak; Mikaṭhamak-hei mithat kapōa kathi jo!” Mipuihei kha avea kaṭap jo hei.

³⁵David in thlai heikhat asâkna sik a mipui he’n sûn nilun anjôr, tâk ama’n ka-ôrtak a intep jo, “Kani tlâk mak kârseng thlai heikhat kasâk inchu Pathen in kei avōkthat rasoh!” ati.

³⁶Hivahi anmanhret a katlai jo hei. Akadik kae, rengpa ṭōntlo rakip a mipui malung katlaia kae.

³⁷Abner thatna chunga hin rengpa chu inṭang mak ti hi David mihei seng leh Israel rakip in anmanhret jo.

³⁸Aṭōnpui karônhei hneng reng in ati, “Tuning Israel shunga hlamkakei kalen inkhat kathi jo ti hi manhret mak chei mo?

³⁹Pathen takadeisōt reng kachangjen ravâng, tuning chu kamalung katlasam hêr jo eng. Hiva Zeruiah sapahei hi, kei hnenga chu innâk-inse induhêr hei kae. RŌNGPU’n hiva ṭhena kaneihei hi anrahōi kasōk hrep a karâk hei rasoh!”