Read Komrem SAMUEL INHNINA 4 Bible Online

SAMUEL INHNINA 4 - Komrem bible

SAMUEL INHNINA 4

¹Saul sapa Ishbosheth in Abner kha anthat jo ti athei pha ama kaṭi jo, khana Israel mi pumpui inrim jo hei.

²Ishbosheth in aṭōn karôn 2 re kabuhlua rehlam kakei anei hei, Benjamin phunga Beeroth ram a Rimmon sapahei Baana leh Rechab kae. (Beeroth hi Benjamin ṭhen khat a inteisa.

³Hina aleika-om mihei hi Gittaim a leikatlân heia, khava hmun a khan ka-om thang jo hei.)

⁴Saul sōn leh pâr alak inkhat chu, Jonathan sapa Mephibosheth kha kae, Saul leh Jonathan anleithat lai hei khan kum 5 leikatluk jo. Anmani kathi ṭong kha Jezreel khōpuia inphut anthei jo pha, anai kahngaknu’n ahrut a aleitlânpui jo, tâk inhnot reia amathlâk joa ake inkhôi jo.

⁵Rechab leh Baana kha Ishbosheth inna sik a heikasōk hei khana sûna châm ale’nhnga laitak, sûnṭima heikatlung hei.

⁶Kot kunga ka-om nuhmei inkhat kha agehu maṭheppuma innguia kajethang jo, khana Rechab leh Baana kha innshunga kahlut jo hei.

⁷Vōi khat hlut a Ishbosheth jena den shunga kahlut heia, ajehnger laitak anvathat jo. Khava sōa alu antansōt a, anheirôna jân kathang Jordan phaicham anhei hropui jo.

⁸Anmani’n Hebrona ka-om Reng David hneng alu anvapek a ahnenga anti, “Nang that sik a aleikarei ṭhak na’nrepui Saul sapa Ishbosheth lu kha hin ka-om jo. Tuning chu Saul leh asōn leh pârhei chunga phuhlōna sik Kaja ka-om Reng RŌNGPU’n ahnōm pek jo che.”

⁹David in amasôn hei, “Thinathei heirakip a inphut ani kahuksōt akahring ṭhak RŌNGPU rahminga a’ntep eng kae!

¹⁰Ṭong karônle inkhat in Ziklag a kahnenga kahonga, ṭong kaṭha karôn kae atia Saul kathi ṭong ahong manthei eng. Ama kha kasura kaleithat jo. Aṭong kaṭha rônman kha ke’n khavakha kapek kae!

¹¹Ṭhena kaneimak mi inkhat a-inna aje kathia akatukthat mikaṭhamak heihrep sik a khan heituk a a’nhnak sik mo! Tûn ama nanthat jâra nanchunga ke’n phu kahlō sik kae khana raleichunga inphut kalosōt sik chei kae!”

¹²David in ṭong apek heia, aremi he’n Rechab leh Baana anthat jo hei khana ankut anke antansōt heia Hebron tuikhur hneng anmakhei jo hei. Anmani’n Ishbosheth lu kha anloa Hebrona Abner thlâna anvûm jo.