Read Komrem SAMUEL INHNINA 5 Bible Online

SAMUEL INHNINA 5 - Komrem bible

SAMUEL INHNINA 5

¹Khava sōa Israel phung rakip Hebrona David hneng kahong heia anti, “Keini naravōi leh nathisen khet ung kae.

²Tenlai, Saul in Kanreng achanglai kha’num, Israel mipuihei re tlona hlam naleikei hei, nang in amipuihei naching sik hei khana anvaikarôn kachang sik che tia RŌNGPU’n nahnenga ṭongtepna aleinei.”

³Khava jâra Israel hlamkakei rakip Hebrona David hneng kahong jo hei. Ama’n anmani leh akarôn pen inhnōmna inkhat asyem, anmani’n thai anmanthia ama Israelhei reng hongkachang jo.

⁴David in reng ahong inṭanga khan kum 30 katluk jo, khava sōa kum 40 vai arôna kae.

⁵Hebrona Judah hei chunga kum 7 leh aṭim vai arôn, khana Jerusalema Israel leh Judah hei chunga kum 33 vai aleirôn.

⁶Reng David leh ami he’n Jerusalem buhluna sik a anhe’ntôrna pha kha heikatlung jo. Khana aleika-om Jebush he’n David in khōpui kha hlotor mak ning tia anleimandon, khava jâra ahnenga anti, “Nang hiva shunga hlut tor hêrmak tin, hmitkacho leh ke katlek he’num annamsōt tor sik che.”

⁷(Tâk David in Zion kurpui kha ahlō jo, khava jâra “David Khōpui” tia inhret jo.)

⁸Khava kani ning khan David in amihei hneng ati, “Ke’n Jebush-hei kahōt hei kapōa akahōt aka-om chei mo? Ankathat sik a katluk hrep a aka-om chei mo? Kha a-enchu, tui lona tôngdung kha jui una sara hmitkacho ke katlek heiso vasō hei ruh” (Khava jâra “Hmitkacho leh ke katlek in RŌNGPU inna hlutthei mak hei ning” anti.)

⁹David in kurpui kha ahlōsōa, ashunga ka-om jo, khana “David Khōpui” tia inphō jo. Tlânga inphut nisō intonga ram omnasenga khan aphut a, akimvea khan khōpui kha asak jo.

¹⁰RŌNGPU Pathen Akahratpen khan a’nthōpui jâra, pha rakip a kahrat chet-chet jo.

¹¹Tyre ram a Reng Hiram in David hneng invei tlona sik a mi atir hei; areng-innpui sakna sik a Cedar thingpum leh mistrihei leh hlung kakamthei hei apek hei.

¹²Khan chu RŌNGPU’n Israelhei renga amatung kae khana amihei sik a arengram kha amankhangsōt pek kae ti hi David in abinga ahong manhret jo.

¹³Hebrona inphut Jerusalem aheitlung sōa, David in nuhmei leh nuhmei manbo alosa hei, sanu leh sapa aneisa hei.

¹⁴Jerusalema sa anei hei kha; Shammua, Shobab, Nathan, Solomon,

¹⁵Ibhar, Elishua, Nipheg, Japhia,

¹⁶Elishama, Eliada khan Eliphilet hei hi kae.

¹⁷Philistihei kha David in Israel reng inṭang jo tia anhri pek hei, khava jâra ama kasur sik a anremihei kasesōt hei. David in ṭong kha athei pha, kur omna hmun ting kasesuk jo.

¹⁸Philistihei kha Rephaim Phaicham hong katlung heia, anhlō jo.

¹⁹David in RŌNGPU hneng ader, “Philistihei hi kabuhlu sik hei mo? Torna napek sik eng mo?” RŌNGPU’n amasôn, “Ôk, buhlu hei roh! Torna kapek sik che!”

²⁰Khava jâra David in Baal Perazima kasea khana khan Philistihei kha ator jo hei. Ama’n ati, “Ka’nrepuihei kha RŌNGPU’n tuikalen kapōa asuktlen hei.” Khava jâra khava hmun kha Baal Perazim anti jo.

²¹Philistihei kha antlânsōt jo pha, an-syemthulim andahlon hei khana, David leh ami he’n anrôn sōt jo.

²²Khava sōa, Philistihei kha Rephaim Phaichama inle heia anvahlō nôk jo.

²³David in RŌNGPU kha avea ader nôk a ahei masôn, “Khana inphut buhlu mak hei roh, se una, asir khat tinga Balsam thingkung hnenga inphut buhlu sik a inrin ruh.

²⁴Thingkung luchung heia khan injôkna rasa nathei pha leh buhlu hei roh ajârchu Philistihei hmaimôk kapek sik a nahma kei akase sik eng kae.”

²⁵David in Rōngpu ṭongpek kapōa atlo jo. Philisti mihei kha Gaba inphut Gezer jōnna hlam katlung bit a ahnong male jo hei.