Read Komrem SAMUEL INHNINA 6 Bible Online

SAMUEL INHNINA 6 - Komrem bible

SAMUEL INHNINA 6

¹David in Israel remi kaṭhapen abek mantûp nôk hei, ankhenga pase 30,000,

²Judah ram a Baalah a aṭhōi hei, khana inphut mathla kanei ranhringhei chunga alen in-ongna a’n-ong, Akahrat chunghnung RŌNGPU rahming karôn, Pathen Ṭongtep Bôm kha valona sik a atlo jo.

³Tlânga Abinadab inna inphut anvalosōt a sehrat gârither inkhat a anhap jo. Gâri kha Abinadab sapa Uzzah leh Ahio he’n an-ensui,

⁴Ahio in ahmating kase.

⁵David leh Israelhei seng in RŌNGPU kajana kalâm heia ankare kapenga hla ansak a kae. Anmani ṭingṭang, serângdâr, khōng, sumkutben, mahring kanei anmanhringa kae.

⁶Nakon saphōr hmun anheiphâk a khan sehratche kha inpai inthlûk jo khana Uzzah’n intepna Bôm kha amatu jo.

⁷Khava phatak a Uzzah chunga Pathen ahnuk kana jo khana ṭit leh kajana aneimak jâra athat jo. Uzzah kha Intepna Bôm hnenga khan kathi jo,

⁸khava jâra khava hmun kha Perez Uzzah inti jo. RŌNGPU’n Uzzah kha hnuk kana tak a akarâk jo jâra David ahnuk kana hêr jo.

⁹Khava sōa David in RŌNGPU kha aṭit joa ati, “Tûn heikhong mo Intepna Bôm kha ke’n karôn tor sik?”

¹⁰Khava jâra Jerusalema rôn manhlut makna sik a intluk jo; khava kanek a, ahlam kha inhesōt a Gath khōpuia mi Obed Edom innting arôn manhlut jo.

¹¹Khana khan thla thum ka-om, RŌNGPU’n Obed Edom leh a-innshung mihei kha mahâmṭhat apek jo hei.

¹²Intepna Bôm jâra Obed Edom innshung leh anei rakip chunga RŌNGPU’n ṭhatthei abōk jo ti ṭong Reng David in athei jo, khava jâra Obed inna inphut Jerusalema rôn manhlutna sik a inpâkna rehōi atlo jo.

¹³Intepna Bôm karôn mihei khan ankethon vōiruk anthon pha, David in amanhngat heia sehratche inkhat leh ate kathai inkhat RŌNGPU hneng inthoina atōk jo.

¹⁴David kha, hruipōn innem akhōna asuia, ratha kahroktak a RŌNGPU kajana kalâm jo.

¹⁵Hing’hin, David leh Israel mi rakip in inpâk kare-ôn leh pengkun tumpuma Jerusalem katlunga anrôn jo.

¹⁶Intepna Bôm kha khōpuia anhei manhlut jo pha, Saul sanu Michal in thlikot a inphut ahei ena Reng David in a’ntheng lâmna shunga akalâma a’nchôm kha ahmua a’njapui jo.

¹⁷Anmani’n Intepna Bôm kha anhongrôna David in adana sik tia Pōn-inn aleisakna shunga anda jo. Khava sōa ama’n RŌNGPU hneng inthoina leh inlôikhômna tōkna anei jo.

¹⁸Ama’n inthoinahei kha atōksō pha, mipuihei kha Chunghnung RŌNGPU rahminga ṭhatthei abōk jo hei

¹⁹khana ankhenga hnenga thlai asempek jo hei. Ama’n Israel shunga pase leh nuhmeihei kha buhlom pheng inkhat leh a’nrosa hme atlang khat leh vomhrui kachâr ṭhahrep apek et hei. khava sōa an-ina kase et jo hei.

²⁰Khava kahnunga, David in a-innshunghei chibei kapek ase pha, ama intōpui sik a Michal kha heikasōk. Amanu’n ati, “Tuning chu Israel reng in abinga arahming inchoi inshâng jo! Ama’n aṭōnpui karônhei sōk nuhngâk-hei hmit-hmua mi invet inkhat kapōa inlârsōt jo!”

²¹David in amasôn, “Kei hi napa leh a-innshung kahlâng kathlenga amipui Israelhei hlam kaṭhōi sik a ani-indei RŌNGPU kajana akalâm eng kae. Khana RŌNGPU kajana kalâm ṭhak sik eng,

²²khana hiva kakhea kabinga hmeset la’npek sik eng. Nang inchu kei hi heite kaemak a namandon thei eng, tâk nuhmeihei khan chu inshângtak a anlo sik eng!” ati.

²³Saul sanu Michal kha, sa inkhatbek neimak jo.