Read Komrem SAMUEL INHNINA 7 Bible Online

SAMUEL INHNINA 7 - Komrem bible

SAMUEL INHNINA 7

¹Rn David kha a-innpuia leika-oma, RŌNGPU’n a’nrepui rakip a inphut ahuk joa kae.

²Khava sōa reng in sânkathem Nathan hneng ati, “Hin cedar thinga a’nsak inna kei chu ka-om eng, tâk Pathen Intepna Bôm chu pōn-inna la’nda a kae!”

³Nathan in amasôn, “Namalunga aka-om kha tlo roh, ajârchu RŌNGPU’n a-ompui che.”

⁴Tâk khava ning jân a khan RŌNGPU’n Nathan hneng ati,

⁵“Se roh kasōkpa David hripek roh, ‘Ka-omna sik Bek-inn kasak sik kha nang changmak che.

⁶Egypt a inphut Israel mipuihei kahuksōt hei laia inphut tûn katlung, Bek-inna la-omphung mak eng; pōn-inna ka-om enga kalônle enga kae.

⁷Israel mipuihei leh kalônlena rakip a ke’n kakadeisōt hlamkakeihei hneng heisa mo cedar thing vânga bek-inn antasakpek mak eng tia derphung tet mak hei eng.’

⁸“Khava jâra kei Chunghnung RŌNGPU’n hinga ati tia kasōk David hneng hripek ruh, ‘Ke’n ramhânga kemōng nakhemna inphut kavaṭhōi che khana kami Israelhei vai karôn sik kamanṭang che kae.

⁹Nasena hmun rakip a ka’nṭhōipui che, nasesōt pha na’nrepui rakip kator pek hei che. Ke’n vânhnōi raleia hlamkakei kalenpen hei kapōa kasyem sik che.

¹⁰Kami Israelhei sik a hmun inkhat, anka-ôt lele omlo, an-omna sik a kakadei pek hei. Anmani’n hiva ram shunga anheihlut a inphut re leh sha indu he’n anbuhlu ṭhak heia kae, tâk hivahi avea sōk mak jo ning. Nakadōi heia inphut inhuk a na-omna sik khana sōn leh pâr pek sik chea intep eng.

¹²Nathi leh napusōn hei leh na’nvûm sōm pha, nasapahei kâra inkhat renga kamatung sik khana arengram kamanhnet pek sik.

¹³Ama kha kei sik a Bek-inn inkhat ahong kasak kachang sik khana areng phung hrui kha ahei tik a kamanjōm pek sik.

¹⁴Kei apa kachang sik eng, ama kasapa kachang sik. Ama’n atloṭhe pha, pa’n sapa akarâk kapōa kakarâk sik.

¹⁵Tâk-kha ke’n nang reng changna sik a Saul chunga katlo kapōa, inkaisōt mak ning.

¹⁶Pha rakip a sōn naneiṭhak sik a kha, narengram ahei tik a kamatung ṭhak sik. Nareng phung hrui inchaitik neimak ning.’”

¹⁷Nathan in Pathen ṭongphông rakip kha David hneng ahri pek jo.

¹⁸Khava sōa Reng David kha RŌNGPU omna pōn-inn shunga kahlut a, in-onga derna anei jo, “Chunghnung RŌNGPU, kei leh ka-innshung chunga nalei tlopekna ung kha kei chu rahōi sōk mak eng.

¹⁹Kha’num Chunghnung RŌNGPU, tûn katlung akakhe chet a nalatlo pek eng; akahong sik pha kasōn leh pârhei sik a intepna nasyempek eng. Khana Chunghnung RŌNGPU, hihei hi mi inkhat hneng nala manhmua kae.

²⁰Nahnenga heimo kala hrisa hi sik! Nasōkpa hi namanhret eng.

²¹Hivahi nalungdo hlam leh tlo sik a namantluk kha leikachang; ṭōn kalen rakip hei hi kei mantheina sik a natlo jo.

²²Chunghnung RŌNGPU, heituk a akalen che mo! Nang kapō tûte om mak; nang rōk Pathen che kae ti hi pha rakip a kamanhret.

²³Israel jât kapōa nami manchang sik a ansōk changna inphut nalei huksōt raleichunga phunglak om mak. Anmani sik a ṭōn kalen leh ṭōn-inlak naleitlo pek hei, raleichung pumpuia narahming inthang. Nang in nahnong sōt hei khan vânhnōi raleia narahming anmanthang. Nami sik a Egypt a inphut namasōsōt hei khan hmating anhei jōn pha, jât-hlop hei leh an-pathenhei kha nahnong sōt pek ri hei.

²⁴Israelhei kha ahei tik chenna namia nasyem jo hei, khana RŌNGPU nang an-Pathen hongkachang che.

²⁵“Khana tûnchu, RŌNGPU Pathen, kei leh kasōn leh pârhei chunga na’ntepna kha pha rakip a hui mathlung jo roh, khana tlo sik nati kha tlo jo roh.

²⁶Narahming rahnak a inthang sik, mipui he’n ahei tik a anti sik, ‘Chunghnung RŌNGPU hi Israelhei Pathen kae.’ Khana nang in pha rakip a ka-innshung hrui nahrungpek sik eng.

²⁷Chunghnung RŌNGPU, Israelhei Pathen! Ke’n hiva derna hi kader ngam che, ajârchu nasōk kei hnenga hiseng hi naphôngpek jo eng, khana kasōnhei reng naman chang sik hei tia namanthei jo eng.

²⁸“Khana tûnchu, Chunghnung RŌNGPU, nang Pathen che kae; pha rakip a na’ntepna hei kha najui, khana hiva intepna inlak hi kahnenga nanei jo.

²⁹Kasōn kapâr he’n nang maritna kha anchenṭhak theina sik a ṭhatthei napek sik heia kahngek che. Chunghnung RŌNGPU, nang in hivahi intepna nanei jo, nang mahâmṭhatna kha kasōnhei chunga ahei tik a ka-om ṭhak sik jo.”