Read Komrem SAMUEL INHNINA 9 Bible Online

SAMUEL INHNINA 9 - Komrem bible

SAMUEL INHNINA 9

¹Ni khat David in ader, “Saul innshung mi inkhat tou alakahringa alaka-om mo? A-om inchu, Jonathan jâra achunga lungsetna kamalâr hnōm,” ati.

²Saul innshunga arahming Ziba inti sōk inkhat leika-om, ama kha David hneng akase sik a anleitir. Rengpa’n ader, “Nang Ziba kha che mo?” Ama’n, “Apu, naṭōn katlopa eng kae.” tia amasôn.

³Rengpa’n ahnenga ader, “Ke’n tlosō sik a kale’ntepna, lum lona leh maritna kamalârna sik a Saul innshung mi tu mo inkhat dahlon aka-om tâk mo?” Ziba’n “Jonathan sapa inkhat laka-om hi. Ake katlek kae,” tia amasôn.

⁴Rengpa’n ader, “Ama khon mo aka-om?” Ziba’n amasôn, “Lodebar khōa Ammiel sapa Machir inna ka-om.”

⁵Khava jâra rengpa’n akabek sik mi atir jo.

⁶Saul tupa, Jonathan sapa, Mephibosheth kha ahong tlung pha, David hmaikunga kajatak a inkun jo. David in, “Mephibosheth,” tia abek, khana ama’n amasôn, “Apu, naṭōn katlopa eng kae.”

⁷David in amasôn, “Ṭimak roh, napa Jonathan jâra lungset karôn sik che. Napu Saul tanei ram rakip kapek male sik che, khana pha rakip a kei kadokhânga bu nahong sâk sik a rahlâng che kae.”

⁸Mephibosheth inkun nôk a ati, “Kei chu ui kathisa inkhat kanek a ṭhadet mak jo eng, apu! Heisik a mo hinghrep a kei sik a akaṭha sik che?”

⁹Khava sōa rengpa’n Saul sōk Ziba kha abek a ahnenga ati, “Saul leh a-innshung mihei karōi rakip kha nakapupa tupa Mephibosheth hneng kapek jo kae.

¹⁰Nang, nasapahei khana nasōk he’n, nakapupa Saul innshung sik a ram kha thlō una, nantasâk sik a sapâr heirôn manhlut ruh. Tâk-kha Mephibosheth chu pha rakip a kadokhânga kasâkpui ṭhak sik jo.” (Ziba’n sapa15 leh sōk 20 aleinei hei.)

¹¹Ziba’n amasôn, “Reng kalûr naṭongpek hei akhenga katlo sik.” Khava jâra Mephibosheth in rengsapa inkhat kapōa reng busâkna dokhânga bu asâk jo.

¹²Mephibosheth in sa rether arahming Micah inti inkhat aleinei. Ziba innshung mi rakip Mephibosheth sōk kachang jo hei.

¹³Khava jâra ake inhnibât akatlek jo Mephibosheth chu Jerusalema ka-oma, rengpa busâkna dokhânga thlai aleisâk ṭhak a kae.