Read Komrem RENGHEI INKHATNA 1 Bible Online

RENGHEI INKHATNA 1 - Komrem bible

RENGHEI INKHATNA 1

¹Tûnchu Reng David upa kachang hêr jo, asōk he’n pōn insâ anmansi ravânga atak lumtor mak jo.

²Hiva jâra asōk he’n ahnenga anti, “Reng Kalûr, nang ka-ompui leh inzenle sik a nuhngâk inkhat jong rih. Amanu nahnenga kaje sik a kha amanlum sik che.”

³Khava jâra Israel ram pumpuia nuhngâk hme kaṭha anvajonga Shunem shunga Abishag intinu anhmua amanu kha rengpa hneng anheiṭhōia kae.

⁴Amanu hi ahme kaṭha hêr, ama’n rengpa kha ahngâk a a-ensui, tâk rengpa’n amanu kha inchunpui mak.

⁵Tûnchu Absolom kathi jo, David leh Haggith sapa Adonijah in akahring kâra sapa upapen kachang jo. Ama hme kaṭhatak pase inkhat kae. David inum heikhat jâra rasei phung hêrmak, ama hi reng inchang sik a amadua kae. Ama’n shakor gârihei, shakorhei leh akahrungle sik a pase 50 amatungsōt.

⁶

⁷Ama’n Joab (anu Zeruiah) leh Abiathar thempupa ale’nbekpui heia anmani’n inṭangpui sik a leikahnōm hei.

⁸Tâk-kha Zadok thempu, Jehoiada sapa Benaiah, Nathan sânkathem, Shimei, Rei, khana David kahrung senghei chu Adonijah langting inṭang mak hei.

⁹Ni khat Adonijah hin kemōng, sehratchehei, khana sehratte kathai tatak Enrogel tuiripût hnenga Mari Hlungpui chunga inthoina atōk a kae. Reng David sapa ralak khana Judah ram a inphut reng ṭōnkarônhei hiva inthoina reveia hin hme alâk hei,

¹⁰tâk-kha anaipa kasōk Solomon, Nathan sânkathem, Benaiah leh rengpa kahrung seng chu leibekmak hei.

¹¹Hiva pha Nathan in Solomon anu Bathsheba hneng kasea ader, “Haggith sapa Adonijah’n abinga reng inchang jo ti hi theimak che mo? Reng David in heite lamanhret mak a kae!

¹²Nang leh nasapa Solomon hringkhō nahuksōt hnōm inchu, ke’n manse che rong

¹³David hnenga vase ina hinga der roh, ‘Reng Kalûr, kasapa Solomon in nareng changna athleng sik chea ka-ôrtak a ale’ntep che changmak mo? Khan chu heikhonga jo, Adonijah reng hongkachang joa?’”

¹⁴Khana Nathan in ahrisa nôk, “Nang in rengpa hneng ṭong nahrilai kei hongkahlut sik eng khana nang ṭonghei kha akadik kae tia kahri manchên sik.”

¹⁵Khava jâra Bathsheba kha rengpa ka-ena ajena innden a kahlut a kae. Ama kha kater hêr jo, khana Shunema nuhngâk, Abishag in arazen kae.

¹⁶Rengpa hmaikunga Bathsheba kha inkun, khana amapa’n aheider, “Heimo namadu?”

¹⁷Amanu’n amasôn, “Reng Kalûr, nang kahnunga kasapa reng kachang sik tia RŌNGPU na-Pathen rahminga ka-ôrtak a le’ntep che.

¹⁸Tâk-kha tûnchu Adonijah reng kachang joa, nang inchu hivahi heite manhret mak che.

¹⁹Ama’n sehratche, kemōng, sehratte kathai tatak inthoina tōkna atlo jo khana nasapahei leh Abiathar thempu, naremi hlamkakeipa Joab reveia abek jo hei, tâk nasapa Solomon chu bekmak a kae.

²⁰Reng Kalûr, nang kathlenga reng kachang sik mi hi naman theina sik heia Israel mi rakip in anta-en jo che kae.

²¹Kha natlo mak inchu, nang nathisōlim leh nasapa Solomon leh kei chu jât kadōi tia antalo sik ung kae.”

²²Amanu’n khanga ahrilai Nathan sânkathem kha reng-innpuia hong katlung jo.

²³Sânkathem kahong ti kha rengpa hneng anhri pek, Nathan kha innshunga kahlut a rengpa hmaikunga inkuna akamuk a kae.

²⁴Khava sōa ama’n ahri, “Reng Kalûr, Adonijah hin nang bânna reng akachang sik a naphôngsōtna aka-om jo mo?

²⁵Tuningtak hin ama kasea sehratche, kemōng khana sehratte kathai katamtak athat a inthoina tōkna atlo jo. Ama’n nasapahei, naremi hlamkakei Joab khana Abiathar thempupa abek hei, khana tûntak hin revei antloa khana hinga ka-ông hei, ‘Reng Adonijah ahringsei sôt rasoh!’”

²⁶Tâk-kha apu, kei leh Zadok thempu khana Benaiah leh Solomon chu abekmak.

²⁷Hiva rakip hi Reng Kalûr nang in namanṭhat jo mo khana nang kathlenga reng sik kha naṭōn karônhei hneng kapha’m hripeklo hei che mo?”

²⁸Reng David in ahri, “Bathsheba kha aheihlut malena sik a hripek ruh,” amanu kahonga ahmating hongkangir.

²⁹Khava sōa ama’n amanu hneng ati, “Khōdeng theina rakip a ani kahuksōt akahring RŌNGPU rahminga nahnenga intep eng,

³⁰khachu RŌNGPU, Israelhei Pathen rahminga nahnenga kale’ntepna kha tuning kanit sik kae, khachu nasapa Solomon in kei bânna reng akachang sik kae.”

³¹Bathsheba khan inkuna ahri, “Kakapu rengpa kha ahei tik a hringṭhak rasoh!”

³²Rn David in Zadok, Nathan, leh Benaiah kabek sik a mi atir hei. Anmani seng anhong pha,

³³anhnenga ati, “Kei innpuia ṭōnkarôn heiṭhōi hei ruh; kasapa Solomon in kashakōrtung chōng rasoh, khana Gihon tuiripût katlunga thōi ruh,

³⁴khana khan Zadok leh Nathan in reng sik a ama thai antamanthi sik kae. Khava sōa pengkun tum ina ông ina, ‘Reng Solomon ahringsei sôt rasoh!’ ti ruh.

³⁵Kareng in-ongna a’n-ong sik a hiva katlunga nangni’n akahnung heijui male ruh. Ama’n kei rengchang athleng sik eng kae, ajârchu Israel leh Judah reng sik a kakadei kha ama hi kae.

³⁶Benaiah’n amasôn, “Hivahi intlo sik, RŌNGPU na-Pathen in ahnōm kha chang rasoh.

³⁷RŌNGPU’n Reng Kalûr a’nthōpui kapōa, Solomon um inthōpui rasoh, nang kanek a ama vairôn akakhangdet manchang rasoh.”

³⁸Khang’khan Zadok, Nathan, Benaiah leh reng kahrunghei seng khan Solomon kha David reng tachōngri shakōrtung anmanchōnga Gihon tuiripût ting anṭhōi jo.

³⁹Zadok in RŌNGPU omna Pōn-inna inphut ahei choi olive thaikōk kha aloa Solomon kha amanthi jo. Anmani’n pengkun antum, khana mipui seng in ka-ông heia, “Reng Solomon ahringsei sôt rasoh,” anti.

⁴⁰Khava sōa ankhenga anheijui male nôk a, inpâk a ka-ông hei khana bunglir antuma ralei ankatlir leoa leika-ông hei.

⁴¹Adonijah leh atabek mi rakip in revei kha a’nchai pha, rasa kasōk hi anthei jo. Pengkun mahring kha Joab in athei pha, ader hei, “Khōpui shunga rasa kasōk so, heitina jo mo?”

⁴²Ama’n aṭong hri lachailo laia, Abiathar thempu sapa Jonathan kha heikatlung, Adonijah’n ati, “Heihlut roh. Nang chu mikaṭha inkhat che kae, ṭong kaṭha nahei rôn nger sik.”

⁴³Jonathan in amasôn, “Kei ṭitna neimak eng. Reng Kalûr David in Solomon reng amanchang jo.

⁴⁴Ama’n Zadok, Nathan, Benaiah khana reng kahrunghei Solomon kaṭhōile sik a atir hei. Anmani’n reng tachōngri shakōrtung amanchōng,

⁴⁵Zadok leh Nathan in ama kha reng changna sik a Gihon tuiripût a thai amanthi jo. Khava sōa anmani khōpuia kahlut hei, inpâk a ka-ông hei, khana mipui heiso tûnchu ka-ông kapeng jo heia kae. Nangni tathei kha anmani rasa kae.

⁴⁶Tûnchu Solomon hi reng jo kae.

⁴⁷Hiva chung nôk a, reng-innpuia ṭōnkarôn he’n ankajana malârna Reng Kalûr David hnenga kahlut heia anti, ‘Na-Pathen in Solomon kha nang kanek a arahming manthang rasoh khana Solomon vairôn kha nang kanek a mankhang chet rasoh.’ Khava pha, Reng David in arakhum chunga inkuna kamukna aneia

⁴⁸derna aneia, ‘Tuning kareng chang ani kathleng kasōn kâra inkhat ani kasyem pek, khana khava hmutheina ani inhring Israelhei Pathen, RŌNGPU kha choi ka-ân rih!’ ati.”

⁴⁹Adonijah hmelâk-hei kha kaṭi jo hei, kangirsōt heia kase jo hei, anhlam et a inṭhen jo hei.

⁵⁰Adonijah hin Solomon aṭit hêr joa, RŌNGPU omna Pōn-inna kahlut a maichâm raki amatua ka-om jo.

⁵¹Rn Solomon hneng hinga anhri pek khachu Adonijah’n rengpa aṭit hêra maichâm raki amatua ahri, “Ahma inkeipena, Reng Solomon in kei hi athat mak ning tia a’ntep sik kamadu.”

⁵²Solomon in amasôn, “Ama ṭong kajui mi achang inchu asam rajang inkhatbek intônmak ning; kha achangmak inchu akathi sik kae.”

⁵³Reng Solomon in mi atira Adonijah kha maichâma inphut anheiṭhōi jo. Adonijah kha reng hnenga kasea ahmai kunga inkun, khana reng in ahnenga ati, “Na-inna kasethei sik jo che.”