Read Komrem RENGHEI INKHATNA 10 Bible Online

RENGHEI INKHATNA 10 - Komrem bible

RENGHEI INKHATNA 10

¹Solomon inthangna kha Sheba Rengnu’n atheia, ṭong intatak derna neia enmansin sik a Jerusalema kahong.

²Ama inthōpui mi katamtak aheiṭhōi hei, khana marim katui, hira-mukta leh sana katamtak karôn sharîngsei rup katamtak aheiṭhōi hei. Amanu leh Solomon an-inhmutō pha, amalunga ka-om ṭongder rakip ader joa kae.

³Amapa’n khahei rakip kha amasôn hei; ama sik a hrimanchên sik a’ntak hêr leiom mak a kae.

⁴Sheba Rengnu’n Solomon singna kha aleithei khana areng-innpui asak hei kha ahmua kae.

⁵Adokhâng chunga thlai antadôn, aṭōn karônhei omna inn, a reng-innpuia ṭōnkarônhei inlôikhômna leh an-invonna, khana reveina ama inzen asōk-hei, khana Bek-inn shunga inthoina atōksōt hei kha amanu’n ahmu hei.

⁶Amanu’n Reng Solomon hneng ahri, “Karam a ka-omlai nachung chânga leh nasingna ṭong kathei kha kadik jo!

⁷Tâk-kha kei honga katak khet in kahmu mak lai seng chu leitaksen mak eng. Tâk ke’n aṭim khatbek um leithei mak jo eng; kei hnenga anta leihripek eng kanek a nanei leh nasingna hin akhechet a kae.

⁸Nanuhmeihei hi heituk a vâng kaṭha hei mo? Na-âng shunga aka-om ṭhak, nasingna ṭong inngeiṭhak a aka-om nasōk-hei hi heituk a vâng kaṭha hei mo?

⁹RŌNGPU na-Pathen kha manpâk a om rasoh! Ama’n nang Israelhei reng amanchangna che chunga heituk a akatlai mo ti amalâr. Ajârchu Israelhei chunga alungsetna hi ahei tik a sik a kae, dân leh akadik kha nahmangna sik a anmani reng amanchang che kae.”

¹⁰Rengnu’n Solomon hnenga kutchoi ahei rôn seng kha apek jo: sana kilograme 4,000 kakhe, marim katui, hira-mukta katamtak. Amanu kutchoi apek marim katui hin pha ralak a aleirahlâng kanek a katampena kae.

¹¹(Hiram rakōng rup, Ophir a inphut sana heikachoi kha’num thing marim katui leh hira-mukta katamtak ahei choisa a kae.

¹²Solomon in thing kha Bek-inn leh reng-innpui vângtinga akhârna ahmang hei, khana hlakasak hei serângdâr leh hmangchâk he’m asyemna hei. Hiva thing marim katui hi Israel shunga anta heichoi manhlut akaṭhapen kha kae; khava kapō kha avea inhmu nôk mak jo.)

¹³Malung kalentak a amanu hneng kutchoi inpek ngaia apek hei kha tei loa, Reng Solomon in Sheba Rengnu kha, ader rakip apek jo. Khava sōa amanu leh a’nṭhōipui hei kha anramting inle jo hei.

¹⁴Akum katai Reng Solomon in sana kilograme 23,000 arahlâng ṭhak

¹⁵hivahi revei katlo he’n anhnemna inphut anta heipek, khana Arab a renghei leh Israel ramṭhen shunga vaikarônhei ramsêrṭhei pekna chunga kae.

¹⁶Solomon in pho kalen 200 asyem, inkhat et kha sana kilograme 7 sâma insyema kae.

¹⁷Ama’n pho kasindet 300 asyemsa, inkhat et a sana kilograme 2 sâma insyem. Hiva pho rakip hei hi Lebanon Ratu Denpuia ada hei.

¹⁸Reng in-ongna kalentak anei. Aṭhen aṭhen a saipui ha vânga akatōm hei khana alakseng kha sana inthengtak vâng akatōm hei.

¹⁹Len in-ongna hi akena kechōnna 6 ka-om, kechōnna hmor rakip a shabakkai lim inkhat et insyem, akhenga shabakkai lim 12 kae. Len in-ongna kahnungting sehratche lu lim inzet, khana abân 2 hei ansira khan shabakkai lim inzet hei. Hiva kapō len in-ongna hi rengram ralak a omtetmak.

²¹Solomon tui inna kōklei, akhenga sana rōk a asyem hei, khana Lebanon Ratua Denpui shunga hmangchâk be leh bûr rakip sana intheng rōk vânga insyem hei. Solomon pha shunga dangka hichu mankatam inkhat a inlomak, hiva jâra dangka chu leihmang mak hei.

²²Hiram rakōng rup leh inṭhōia a’ntôr, Solomon in tui-ôngpuia tôrthei rakōng rup anei hei. Kum 4 akaia athir rakōng he’n sana, dangka, saipui ha, yông kalen leh yôngte anheichoi heia hong inle hei.

²³Reng Solomon hi reng ralak-hei kanek a kahao chet khana kasing chet a kae,

²⁴khana vânhnōi pumpui in ahnenga honga Pathen in singna apek ṭong inngei sik a anmadu.

²⁵Akahong rakip in kutchoi anheichoi pek, dangka neinâk-hei leh sana, pōn, hmangchâk, marim katui, shakor leh shakor kasinhei, akum kum a injônjet.

²⁶Solomon in shakor gâri remi 1,400 leh shakor remi 12,000 asyemsōt hei. Ṭhahrep chu Jerusalema ada hei, alakseng chu khōpui hlop-hlop a ada hei.

²⁷Ama vairônlai Jerusalema dangka hi hlung kapōa man kaneimak kae, khana cedar thing hi’m Judah tlâng kunga theipōng kung kapōa katamtak kahmônga ka-om.

²⁸Rengpa sōk he’n Musri leh Cilicia, inphut shakor ram hlop a antamasōsōṭ hi an-ensui heia kae.

²⁹khana Egypt a shakor gâri ram hlop a anta heitirsōt hi’m an-ensuia kae. Hit leh Syria renghei hneng shakor leh shakor gâri anleipek hei, shakor gâri inkhat a dangka 600 khana shakor inkhat a dangka 150 a anjōra kae.