Read Komrem RENGHEI INKHATNA 15 Bible Online

RENGHEI INKHATNA 15 - Komrem bible

RENGHEI INKHATNA 15

¹Israelhei Reng Jeroboam vai rôna kum 18 tlukna, Abijah khan Judah hei reng kachang jo,

²khana ama’n Jerusalema kum 3 vai aleirôn. Anu kha Absolom sanu Maacah kae.

³Apa set-tlo in-angtlinga ama’num aleitlo khana apu David kapōa RŌNGPU apathen hnenga lum kalotak kha leichang mak.

⁴Tâk-kha David jâra, RŌNGPU apathen in Abijah kha akahnunga Jerusalema vai karôn sik leh heite kōiloa akada sik asapa inkhat apek a kae.

⁵David in ama tlaina sik a ṭōn aleitloa, Hit mi Uriah chungchânga tei loa, aṭongpek rakip heite juiloa a-om mak jâra RŌNGPU’n hivahi atlo jo kae.

⁶Rehoboam leh Jeroboam hei kâra re ale’ntuk hei kha Abijah hringkhō katlung bit a injōmthanga kae.

⁷Khana Abijah in aleitlo rakip Judah hei Thuhming Rabu a inzet a kae.

⁸Abijah kha kathia David khōpuia anhre jo, khana asapa Asa’n arengchang athlenga kae.

⁹Israelhei Reng Jeroboam vairôn kum 20 tlukna, Asa’n Judah hei reng hong kachanga kae,

¹⁰khana ama’n Jerusalema kum 41 vai arôna kae. Api kha Absolom sanu Maacah kae.

¹¹Asa hin apusōn David kapōa, RŌNGPU tlaina aleitloa kae.

¹²Ama’n khōvelhei kamukna hmun a noti katlohei kha aram shunga inphut ahnong sōt hei, khana ahma kakeia renghei taleisyem lim rakip alosōtpet heia kae.

¹³Api Maacah kha rengnu nu achangna hmun a inphut alosōt, ajârchu ama’n mater ka-om, sa leh te khana kara pungna pathen Asherah antinu kha amatungsōt a kae. Asa’n limsyem kha atuktana Kidron phaichama hmei aroa kae.

¹⁴Asa’n bekna khōvelhei kamukna hmunhei kha asuk manhmangsō mak he’num, ahringkhō katlung bit a RŌNGPU taksenthei kachanga kae.

¹⁵Apa’n Pathen hnenga aleitōksōt neinâk rakip, sana dangka neinâk ama’n atōksōt senghei kha leh inthoia Bek-inn shunga ada hei.

¹⁶Judah Reng Asa leh Israel Reng Baasha kha vai anrônlai seng re le’ntuk ṭhak heia kae.

¹⁷Baasha khan Judah ram a re atloa, Rama a khan rekur asyema Judah shunga leh vânga neinâk rônvângvei tingna sik a aleitloa kae.

¹⁸Hiva jâra Reng Asa khan sana leh dangka Bek-inn shunga aka-om rakip kha aloa, aṭōnpui karôn ṭhahrep hei amanchoi heia Damascus a Hezion tupa, Tabrimmon sapa, Syria Reng Benhadad hneng hiva ṭong hi leh inṭhōia atir hei:

¹⁹“Nipahei taleitlo kapōa, eini inthlop rih. Hiva sana leh dangka hi nahnenga kutchoi manrôn che kae. Tûnhin Israel a Reng Baasha’n kei ram shunga aremihei alosōtna sik a nan-inthlop kha bâng roh.”

²⁰Reng Benhadad khan Asa ṭōnmantluk kha kahnōma aremi hlamkakeihei leh anremi seng kha Israel khōpui kabuhlu sik a atir jo hei. Anmani’n Ijon, Dan, Abel Beth Maacah, Galilee Dîr hnenga ramkei seng, Naphtali ram pumpui anhlō jo.

²¹Rn Baasha khan omchen kasōk kha athei pha, Rama a rekur asyem kha kahaia Tirza a kase jo.

²²Khava sōa Reng Asa’n, Rama a Baasha’n rekur syemna aleihmang hlung leh thing hei kha ankadom sōtna sik a Judah ram pumpuia tûte ṭhenna neiloa ṭong amasō jo. Hiva hmangchâk-hei vâng hin Asa’n Mizpah leh Geba, Benjamin ram shunga khōpui akakursina jo hei.

²³Reng Asa’n aleitlo rakip, alung-ngamna aṭhatna ṭōn leh khōpui aleikakur heirakip kha Judah Renghei Thuhming Rabua inzet a kae. Tâkkha ama ahongter pha chu ke nat in abôma inkhôi joa kae.

²⁴Asa kha kathia David khōpuia renghei thlânpuia anhre jo, khana asapa Jehoshaphat in arengchang kha athleng jo.

²⁵Judah Reng Asa vairôn kum 2 shunga, Jeroboam sapa Nadab in Israelhei reng hongkachang, ama’n kum 2 vai aleirôn.

²⁶Ama hma a apa kapōa, ama’n RŌNGPU kadōia setna atloa Israelhei kha setna shunga aṭhōi manhlut hei.

²⁷Issachar phunga Ahijah sapa Baasha khan Nadab chunga lungthim atloa, Nadab leh aremi he’n Philisti Gibbethon khōpui kalen anlei kakekhum lai khan anleithat jo.

²⁸Hivahi Judah Reng Asa vairôn kum 3 changna shunga aleikasōk kae. Khang’khan Baasha’n Nadab rengchang kha athleng joa kae.

²⁹Inrangtak a ama’n Jeroboam innshung rakip kha athatsō jo hei. RŌNGPU’n Shiloa asōkpa Ahijah thempu hnenga aleihri dungjuia, Jeroboam innshung mi seng athatsō jo hei; inkhatbek hringmak hei.

³⁰Jeroboam in setna atloa Israelhei setna amantlo nôk heina vâng khan RŌNGPU hnuk natna achang jâra hivahi akasōk kae.

³¹Nadab in aleitlo rakip Israelhei Thuhming Rabu shunga inzet a kae.

³²Judah Reng Asa leh Israel Reng Baasha kha vai anrôna shung senga re le’ntuk ṭhak heia kae.

³³Judah Reng Asa vairôn kum thum tlukna shunga, Ahijah sapa Baasha khan Israel pumpui reng hongkachang, khana ama’n Tirza a kum 24 vai aleirôna kae.

³⁴Ama hma aleika-om Reng Jeroboam kapōa, RŌNGPU dōina setna aleitloa Israelhei setna ting aleiṭhōi manhlut heia kae.