Read Komrem RENGHEI INKHATNA 17 Bible Online

RENGHEI INKHATNA 17 - Komrem bible

RENGHEI INKHATNA 17

¹Gilead a Tishbea inphut sânkathem arahming Elijah inti khan Reng Ahab hneng ati, “Ke’n karazen, Israelhei akahring Pathen RŌNGPU rahminga, ke’n kamanthei che kae, abâna kum 2 leh 3 hi radaitui leh khō sûrmak ning, ke’n sûr roh katimak hma seng.”

²Khava sōa RŌNGPU’n Elijah hneng ati,

³“Hiva hmun hi dahlon jo roh nisōting se ina Jordan nisōa, Kerith kavadung hnenga va’nthup jo roh.

⁴Kavadung khan in sik a tui apek sik che, khana khan va-âk in bu leh thlai ahei rôn pekna sik che ṭong kapek jo.”

⁵Elijah’n RŌNGPU ṭongpek kha ajuia kasea Cherith kavadung hnenga vaka-om jo.

⁶Ama’n kava dunga inphut tui kha a-in, khana va-âk khan buhlom leh hme jîngkâr leh khōhlei katai ahei rôn pek.

⁷Pha bongkhat sōa kavadung kha khō asûrmak jo jâra hong kachâr jo.

⁸Khava sōa RŌNGPU’n Elijah hneng ati,

⁹“Tûnchu Sidon hnenga, Zarephath khōpuia vase roh, khana khan va-om roh. Nang kavei sik a khana ka-om renghmeinu ṭong kapek jo.”

¹⁰Khava jâra Elijah kha Zarephath a kase jo, khōpui kot a aheitlung pha, meithai inkhat in thing akhôm mantûp aleihmu. Ama’n amanu hneng ati, “Tui in sik a ahei choi pek roh.”

¹¹Khava kalo sik a aselai, ama’n a-ôna, “Buhlom ajing um heichoisa roh,” ati.

¹²Amanu’n amasôn, “Akahring RŌNGPU na-Pathen rahminga a’ntep eng kae, buhlom heite neimak eng. Kanei khachu kōkleia jâmdi kut maja khat leh be shunga olive thai arahme ajingte rōk kha kae. Hinahin thing ahlek akakhôma akahong eng kae, inna kachoi leh ajingte kanei kha kei leh kasapa sik a vasyem rong kati kae. Khavakha keini sik achaina thlai sâk sik kha kae, khava sō leh chu thi katlunga bu kantahngōi sik jo kae.”

¹³Elijah’n ahnenga ati, “Namalung mandong mak roh. Nanei senga inphut buhlom kasintek inkhat ahma inkeia vasyem roh khana kahnenga heichoi roh, khana a’nhleiseng kha nang leh nasapa sik syem jo roh.

¹⁴Ajârchu hivahi RŌNGPU, Israelhei Pathen tati kae, ‘RŌNGPU ke’n khō kamansûr mak kârseng, kōklei kha jâmdi tlangmak ning khana bephu kha thaitui tlangmak ning.’”

¹⁵Renghmeinu kha kasea Elijah tamanthei kapōa avatlo jo, khana anmani ankhenga kani katamtak a antlukna sik thlai annei joa kae.

¹⁶RŌNGPU’n Elijah hnenga a’ntep kapōa, kōklei kha jâmdi tlangmak khana bephu kha thaitui tlangmak a kae.

¹⁷Pha bongkhat sō leh renghmeinu sapa kha kana jo; anat kha kakhôk chet-chet jo, achai-chaina kathi jo.

¹⁸Amanu khan Elijah hneng ati, “Pathen mipa, heisa mo kei hneng hinga natlo? Kei setna Pathen in amandonsōtna sik a hinahin akahong che mo khana kasapa namanthi mo?”

¹⁹Elijah’n ati, “Naipangpa kha kei hneng apek roh.” Amanu bânchunga inphut naipangpa kha ama’n alo jo, chunga a-omna inndenting akepui jo, khana rakhum chunga ada jo.

²⁰Khava sōa kare inhrektak a ader jo, “O RŌNGPU ka-Pathen, heisa mo hiva ṭit ka-om tak hi renghmeinu hneng natlo? amanu hin kei chunga lum alo hêr enga kae, tûnchu nang in asapa nathat pek jo!”

²¹Khava sōa Elijah kha naipangpa chunga vōi 3 inbok a derna anei, “O RŌNGPU ka-Pathen, hiva naipangpa hi manhring nôk roh!”

²²RŌNGPU’n Elijah derna amasôna naipangpa kha kaphuk sân aphut a hongkahring jo.

²³Elijah khan naipangpa kha thōiting anu hneng athōia khana amanu hneng ati, “Enroh nasapa kahring jo!”

²⁴Amanu’n amasôn, “Tûnchu nang Pathen mi che kae khana RŌNGPU’n kadiktak a nahnenga ṭong ahri ti hi kamanhret jo!”