Read Komrem RENGHEI INKHATNA 19 Bible Online

RENGHEI INKHATNA 19 - Komrem bible

RENGHEI INKHATNA 19

¹Rn Ahab in anuhmei Jezebel hnenga Elijah ṭōntlo khana heikhonga mo Baal sânkathem rakip athatsō hei ti kha aleihri pek.

²Amanu’n Elijah hneng ṭong amanrôn: “Nang in sânkathemhei hneng naleitlo kha in-anghrep a ajîng kania hiva phatak hin nahnenga katlomak inchu pathen he’n avōkthat hei rasoh.”

³Elijah kha kaṭi jo, ahringkhō sik katlân jo; Asōkpa aṭhōia Judah ram a Beersheba a kase jo. Khana khan asōkpa adahlona,

⁴Elijah kha sûn nilun ram thōia leikalôna kae. Ama inhnga a thingkung inkhat hnōia le’n ong khana akathi sik a le’ndona kae. Derna aneia, “Hichu akherei jo, RŌNGPU,” ati. “Kahringkhō hi losōt jo roh; kathi hin kaṭhadet sik jo!”

⁵Thingkung thōia kajea, kaje hnger jo. Manhret manloa ngeva inkhat in atak atôna ati, “Thōi roh khana sâk jo roh.”

⁶Akimvea a-en manvea, aluthlōn ting buhlom inkhat leh tuibete inkhat leika-om. Asâk a a-ina kaje nôk jo.

⁷RŌNGPU ngeva kha he’nlea vōi 2 changna ava mathōia ati, “Thōi ina sâk roh ajârchu nahlam jōn sik hi kasei hêr sik.”

⁸Elijah kha kathōia, asâk a-ina, abusâk khan Sinai, tlâng intheng katlunga ni 40 lôntorna sik a ratha apek jo.

⁹Khana khan jân rekna sik a hlungkhur shunga kahlut jo. Manhret manloa RŌNGPU’n ahnenga ṭong ahri, “Elijah, hin nang heimo natlo?”

¹⁰Ama’n amasôn, “RŌNGPU Chunghnung Pathen, ke’n ahei tik a karazen che, nang rōk. Tâk-kha Israel mipui he’n nang leh nanle’ntepna kha ansukkhōi jo, namaichâm anṭhet maphûr jo, khana nasânkathemhei anthatsō jo hei. Kei rōk kahring jo eng, ke’m that sik a anrei eng!”

¹¹RŌNGPU’n ahnenga ati, “Sesōt roh tlâng chunga kahmai kunga vangir roh.” Khava sōa RŌNGPU kha khava hnenga kathlenga thli inhnaktak ahei tira hmebunghei asem mantlir heia hlunghei amankikkhōi heia kae, tâk thli kâra khan RŌNGPU chu invei mak. Thli kahrâng kha ahaia, lingnu hong innok jo, tâk lingnu kâra khan RŌNGPU chu invei mak.

¹²Lingnu a’nnok sōa, hmei hong kasûk jo, tâk hmei kâra RŌNGPU chu invei mak. Khana hmei bâna khan karesō kadaineng heikasōk.

¹³Elijah’n kha athei pha, azakkō vâng khan ahmai amakhua kasōksōt a hlungkhur hlutna tak a khan kangira kae. Kare inkhat in ahnenga ati, “Elijah, hin nang heimo natlo?”

¹⁴Ama’n amasôn, “RŌNGPU Chunghnung Pathen, ke’n ahei tik a nang rōk karazen che. Tâk-kha Israel mipui he’n nang leh nanle’ntepna kha anvōkkhōi jo, namaichâm anṭhet a anmaphûr jo, nasânkathem rakip anthatsō jo hei. Kei rōk kahring jo eng, ke’m that sik a anrei eng.”

¹⁵RŌNGPU’n ati, “Damascus hnenga ram thōia inle roh, khana khōpui kalen shunga hlut roh khana Hazael kha Syria reng sik thai manthi roh;

¹⁶Nimshi sapa Jehu kha Israel reng sik a thai manthi roh, khana Abel Mehola a inphut Shaphat sapa Elisha kha nang kahlang kathlenga sânkathem kachang sik a thai manthi roh.

¹⁷Hazael mithatna inphut akatlânsōt hei kha Jehu’n athat sik hei, khana Jehu hnenga inphut akatlânsōt hei kha Elisha’n athat sik hei.

¹⁸A-e ravâng Israel shunga Baal hnenga a’nkunmak hei khana alim inmukmak hei, kei lum anikalo mihring 7,000 chu kahringa kada sik hei.”

¹⁹Elijah kha kase jo khana Elisha khan sehratche rup khat vânga hlei aleikhōi kha avahmu jo; ahmating khan rup 11 he’n hlei ankhōi, ama chu hnung kakhôrpen kae. Elijah’n apōn alosōt a Elisha chunga amakhu jo.

²⁰Elisha khan asehratche hei kha adahlon heia, Elijah kahnung ajuia katlân jo, khana ati, “Kanu leh kapa hneng inṭhenna sik vamajôp hei hi rong, khava sōa nang kajui sik che.” Elijah’n amasôn, “Kaṭha jo, inle roh, ke’n ting mak che eng!”

²¹Khava sōa Elisha kha asehratche kop hei kha, athat heia, anhme kha asōnga, anrîngke hei kha hmei mansûkna aneia kae. Anhme kha mipuihei apek heia, ansâk jo. Khava sōa Elijah inthōpui sik a ajui jo.