Read Komrem RENGHEI INKHATNA 21 Bible Online

RENGHEI INKHATNA 21 - Komrem bible

RENGHEI INKHATNA 21

¹Jezreel a ka-om reng-innpui sira Naboth intipa vomhrui rahōn inkhat anei.

²Ni khat hin Ahab in Naboth hneng ahri, “Navomhrui rahōn hi ke’n nei jo rong; kei innpui hnengtak kae, ke’n anse-hleina rahōn sik a ram hi kamadu. Hiva kathlenga vomhrui rahōn akaṭhachet kapek sik che, achangmak leh namadu’n chu aman katamtak kapek sik che.”

³Naboth in amasôn, “Kapu kapa heia inphut hiva rahōn hi kachen kae. Nang pek sik hi RŌNGPU’n hnōm mak a kae.”

⁴Naboth ṭonghri khan Ahab kha malung hōimakna leh hnuknat pum a a-inna kase jo. Ama rakhuma kajea ahmai bang lang ahnget a, bu sâk mak jo.

⁵Anuhmei Jezebel kha ahnenga kasea ader, “Heisa mo hingtuk hrep namalung akahōi mak? Heisa mo bu nasâk mak?”

⁶Ama’n amasôn, “Naboth in kei hneng ṭong ahri jâra kae. Ke’n avomhrui rahōn rachôk rong achangmak leh hiva kahlang kathlenga inkhat pek rong kava ti, tâk rahōn kha kei taneithei changmak atia kae!”

⁷Jezebel in amasôn, “Nang reng che mo, a-emak leh changmak che mo? Rakhuma inphut thōi roh, kahōitak a om roh, bu sâk roh. Naboth rahōn kha ke’n kamanchen sik che.”

⁸Hivasōa amanu’n chithi ahlek amazet, Ahab rahming asun, reng mêrchîkna kha akatat, khana ṭōnpui karônhei leh Jezreel a hlamkakeihei hneng atir jo.

⁹Chithia khan hinga ati, “Thlai hngōina sik kani inkhat phôngsōt ruh, mipui ankhenga bek hei ruh, khana Naboth kha kajana hmun pek ruh.

¹⁰Ahmai kunga Pathen leh reng kahâksêr che kae tia ama inher sik a mikaṭhamak 2 jongsōt ruh. Khava sōa ama kha khōpuia inphut keisō inna hlung vâng denghlon ruh.”

¹¹Ṭōnpui karônhei leh Jezreel a hlamkakei he’n Jezebel ṭongpek kha antlosōt jo.

¹²Anmani’n thlai hngōina sik kani inkhat anphôngsōt a, mipuihei anbek mantûp hei, khana Naboth kha kajana hmun anpek a kae.

¹³Mikaṭhamak 2 hei khan Naboth kha mipui hma, Pathen leh rengpa ahâksêr hei antia anmaher jo, khava jâra khōpui kalen vângting ama kha ankeisōt a hlung vâng andenghlon jo.

¹⁴“Naboth kha anthat jo” tia Jezebel hnenga ṭong kha anleitir jo.

¹⁵Jezebel in ṭong kha atheilim leh Ahab hneng ahri, “Naboth kathi jo. Tûnchu vomhrui rahōn nahnenga ajōr hnōm mak kha se ina valo jo roh.”

¹⁶Khava phatak a khan Ahab kha vomhrui rahōn kalo sik a kase jo.

¹⁷Hivasōa Tishbea sânkathem Elijah hneng RŌNGPU’n ahri,

¹⁸“Samaria ka-om Reng Ahab hneng se roh. Ama Naboth vomhrui rahōnna navahmu sik, khava kalo sik a a’ntluk kae.

¹⁹RŌNGPU ke’n ahnenga kahei hri kae tia hripek roh, ‘Mipa kha nathatsō leh akarōi kapha nalo sik jo mo?’ Hivahi kei tahri kae tia hripek roh, ‘Naboth thisen ui in amalekna hmuntak a khan, nang thisen um ui in amalek sik kae!’”

²⁰Ahab in Elijah ahmu pha ati, “Ka’nrepui, nang kahnenga akajōng nôk che mo?” Elijah’n amasôn, “Ôk, kei kahong eng, nang in RŌNGPU hmit-enna akadik mak ṭōn tlona sik a nabinga pui katluk a inpek sōt jo che.

²¹Khava jâra RŌNGPU’n nahnenga ṭong hi ahria kae, ‘Ke’n nachunga inhmangna kahei choi sik. Nang leh inkâr sik me khana nang innshunga pase rakip, naipang leh upa ṭhenloa damak jo hei ning.

²²Nang innshung um Nabat sapa Jeroboam innshung leh Ahijah sapa Reng Baasha innshung kapōa hongkachang sik, ajârchu nang in Israelhei kha setna shunga naṭhōi manhlut hei jâra kahnuk namanthak chet-chet a kae.’

²³Khana Jezebel chunga chu RŌNGPU’n ahri, amanu kalōng kha Jezreel khōpuia uihe’n ansâk sik.

²⁴Nang innshung mi, khōpuia akathi rakip uihe’n ansâk sik hei, khana ramhânga akathi rakip hmuthong he’n ansâk sik hei.”

²⁵(RŌNGPU hmit-hmua Ahab kapō akadik mak tlona sik a pui katluk a a’npek sōt tûte inkhat leiom mak, heirakip hi anuhmei Jezebel mathokna jâra kae.

²⁶Israel mipui he’n hma ansong pha RŌNGPU’n ahnong sōt jo hei, Amor mihei omchen kapōa, ama’n limsyem akamuk a inzakpui ka-om tak setna atloa kae.)

²⁷Elijah’n aṭong hri achai pha, Ahab in apōn akei hlera alosōt a, borapōn a’nsi jo. Bu sâk mak jo, borapōn a’nsi pum a kaje jo, malung kanguitak leh inrengtak a kalôn lele jo.

²⁸Sânkathem Elijah hneng RŌNGPU’n ati,

²⁹“Ahab in ka-âng shunga a’nsinsak dân so nahmu mo? Ama’n hinga atlo jâra ama hring kârseng chu inrengna kha achunga mathlung mak jo ning; asapahei hringkhō shunga Ahab innkōhei chunga inrengna kamathlung sik jo.”