Read Komrem RENGHEI INKHATNA 22 Bible Online

RENGHEI INKHATNA 22 - Komrem bible

RENGHEI INKHATNA 22

¹Abân kum 2 shunga Syria leh Israelhei kâra mōngna leikaleng,

²tâk-kha kum 3 tlukna Judah Reng Jehoshaphat in Israel Reng Ahab inhmupui sik a leikase.

³Ahab in aṭōn karônhei hneng ader hei, “Gilead a Ramoth hi Syria rengpa kut a inphut lo malena sik heite nitlo mak hi heijâra mo? Hivahi einita kae!”

⁴Ahab in Jehoshaphat hneng ader, “Ramoth a re tlona sik a nasepui sik eng mo?” Jehoshaphat in amasôn, “Nang na’ntluk pha, kei intluk sik eng, karemihei, kashakor remi he’m intluk sik hei.

⁵Tâk-kha hmatak a RŌNGPU ṭong der hi rih.”

⁶Hiva Jâra sânkathem 400 kapō hei abek hei, khana ader hei, “Kei akase enga Ramoth kabuhlu sik mo, kabuhlu mak sik mo?” Anmani’n anmasôn, “Buhlu roh. RŌNGPU’n torna apek sik che.”

⁷Tâk-kha Jehoshaphat in ader, “RŌNGPU avea nider theina sik a sânkathem ahlop om mak jo mo?”

⁸Ahab in amasôn, “Imla sapa Micaiah inti inkhat laka-om. Tâk-kha ama chu kahōt, ajârchu ama’n heitikchena kei sik a akaṭha inkhatbek hriphung mak a kae; akaṭhamak rōk aphông.” Jehoshaphat in amasôn, “Khanga nahri mak sik kae!”

⁹Hivasōa Ahab in ṭōnkarôn inkhat abek a Micaiah inrangtak a avakabek sik a amanthei.

¹⁰Reng 2 hei kha rengpōn kalen an-insia, Samaria kur kekot kunga anlen in-ongna an-dônna in-ong hei, anmani ângshunga sânkathem rakip he’n ṭong ansânsōt a kae.

¹¹Ankâra Chenaana sapa Zedekiah’n thir raki inkhat asyema Ahab hneng ahri, “RŌNGPU’n ahri kha hi kae: ‘Hiva vâng hin Syriahei re natlo sik hei kae, khana pui katluk a nator sik hei kae.’”

¹²Sânkathem alakseng inum khanga anhri et jo. Anmani’n, “Ramoth chunga re tlo roh, nang in nator sik. RŌNGPU’n torna apek sik che,” anti.

¹³Khava pha, Micaiah kabek sik a akase ṭōnpui karônpa khan ahnenga ahri, “Sânkathem alakseng in rengpa hmesōna sik anhri et jo, nang um khanga nahria kaṭha jôk sik jo.”

¹⁴Tâk-kha Micaiah’n amasôn, “Akahring RŌNGPU kapan a intep eng ama tahri rōk kha ke’n kahrisōt sik!”

¹⁵Reng Ahab hmaikunga asōk pha, reng in ahnenga ader, “Micaiah, kei leh Reng Jehoshaphat akase unga Ramoth kantabuhlu sik mo, kantabuhlu mak sik mo?” Micaiah’n amasôn, “Kōn ruh! Nangni’n nantor sik. RŌNGPU’n torna apek sik chei.”

¹⁶Tâk-kha Ahab in amasôn, “RŌNGPU rahminga kei hneng nahri pha, akadik hrisōt roh! Heija hrep mo nahnenga khavakha kahri pek sik che?”

¹⁷Micaiah’n amasôn, “Ke’n Israel remihei kha akakhem ka-om mak kemōng kapōa tlâng chunga khin a’nchai kathek sōpet hei kha kahmu. Khana RŌNGPU’N ahri, ‘Hiva mihei hi hlamkakei neimak hei; inna kamōnga se jo hei rasoh.’”

¹⁸Ahab in Jehoshaphat hneng ahri, “Ama hin kei sik a heitik che’num akaṭha hrimak ning tia ke’n kahri pek che changmak mo? Ahei tik a akaṭhamak rōk ahri kae!”

¹⁹Micaiah’n abân ahri nôk a, “Tûn RŌNGPU’n heimo ahri rangei ruh! Ke’n RŌNGPU kha angeva rakip ahnenga kangir heia, marvâna alen in-ongna a’n-ong kha kahmu.

²⁰RŌNGPU’n ader, ‘Ahab kha Ramoth a asena sik leh anhei thatna sik a tu’n mo ahōn sik?’ Ngeva ṭhahrep he’n inkhat anhri, alak he’n ahlop inkhat anhri,

²¹RŌNGPU hmating rathla inkhat kahonga ahri, ‘Ke’n ama kahōn sik.’

²²RŌNGPU’n ader, ‘Heikhonga mo?’ Rathla khan amasôn, ‘Kei kase sik eng, Ahab sânkathem rakip akadik mak kamanhrisōt sik hei.’ RŌNGPU’n ahri, ‘Se roh. vahōn jo roh. Nang in nator sik,’ ati.”

²³Khana Micaiah’n achaina ahri, “Akasōk kha hinga kae. RŌNGPU’n nasânkathemhei hi maleisei amanhrisōt hei kae. Tâk ama khet inchu inrengna nachen sik a ṭong akam jo kae!”

²⁴Khava pha Zedekiah in Micaiah hneng ahnaia angambe akaben pek, khana ader, “Heitik pha khan mo RŌNGPU rathla’n kei adahlon enga nang hnenga ṭong ajōng hri?”

²⁵Micaiah’n amasôn, “Hiva ṭong hi nang in inchôrtinga den shunga inthupna sik a natlân inhlut pha leh na’nhret sik jo.”

²⁶Reng Ahab in aṭōnpui karôn inkhat hneng ṭong apek a, “Micaiah kha sur roh, khōpui vaikarônpa Amon leh rengsapa Joas hneng ṭhōi roh.

²⁷Kurkhum shunga thōnna sik khana kei kadam a kaho’nle mak kârseng buhlom leh tui rōk anleipekna sik a manthei hei roh,” ati.

²⁸Micaiah’n ka-ônga aphông, “Nang kadam senga nahong inle’nchu RŌNGPU’n kei hneng ṭong ahri mak jo e-nâng!” ati. Ama’n abân ahri, “Mi rakip in kaṭong hri hi rangei ruh,”

²⁹Khan chu Israel Reng Ahab leh Judah Reng Jehoshaphat in Gilead a Ramoth khōpuia re katlo sik a kakōn hei.

³⁰Israel Reng Ahab in Jehoshaphat hneng ati, “Kei chu hme hlop a insyem sik eng, tâk nang chu narengpōn insi ina se roh.” Khang’khan Israel reng kha hme hlop a insyema rehmun a kase jo.

³¹Syria rengpa’n shakor gâri katôr hlamkakei 32 hneng Israel reng tei loa alak-hei hneng re antukmakna sik ṭong apek hei.

³²Achang jâra anmani’n Jehoshaphat anhmu pha, ama kha Israelhei reng kae tia anleilo, re tuk sik a ama langting inhe jo hei. Tâk Jehoshaphat kha ahei-ông pha,

³³anmani’n ama kha Israel reng changmak ti anmanhret a anretuk kabâng jo hei.

³⁴Khava pha shunga, Syria remi inkhat in the inkhat ahei kâpsōt a Ahab rengpa a-ômpho injōmna kâk kavea hong kathlenga akâp masuk jo. Ashakor gâri katôrpa hneng, “Kei intôn jo eng,” tia ka-ông. “Inhe inna rehmun a inphut vângting atôrsōt jo roh,” ati.

³⁵Re kha a’nhnak chet-chet jo pha, Reng Ahab in Syria mihei langting a-en ṭhak a, ashakor gâri chunga ka-oma kae. A’ntônna thisen kalōng khan ashakor gâri chung kha kachōr sōhêr jo, khana khōhleia chu kathi jo.

³⁶Kani atlâk sik jo pha Israelhei hneng ṭongpek inkhat anmanse, “Mi rakip ama ama ram leh khōpui et a inle jo hei rasoh!” anti jo.

³⁷Khang’khan Reng Ahab kathi jo. Akalōng kha Samaria khōpuia anrôna anvûm jo.

³⁸Ashakor gâri kha Samaria tuikhura ansôp, RŌNGPU’n hinga kasōk sik ati kapōa, khana khan uihe’n athisen kha anmalek khana noti he’num insi inthengna jo hei.

³⁹Ahab in aleitlo ṭōn rakip, saiha vânga a-innpui amanret khana khōpui asak rakip, Israel Renghei Thuhming Rabua inzet.

⁴⁰Ahab athi pha ama kathlenga asapa Ahaziah reng kachanga kae.

⁴¹Israel a Reng Ahab vai rôna kum 4 tlukna shunga, Asa sapa Jehoshaphat in Judah reng hongkachang,

⁴²akum 35 achang pha, khana ama’n Jerusalema kum 25 vai arôna kae. Anu rahming Azubah inti, Shilhi sanu kae.

⁴³Ama hma aleika-om apa, Asa kapōa, RŌNGPU hmit-enna akadik atloa kae; tâk-kha kamukna hmunhei chu suk manhmang mak hei, khana mihe’n marim katui rona leh inthoina khana khan antloṭhak a kae.

⁴⁴Jehoshaphat in Israel reng leh inchamna anleisyem.

⁴⁵Jehoshaphat in aleitlosōt rakip, ama kahrâng tak a are tlona hei, Judah Renghei Thuhming Rabua inzet a kae.

⁴⁶Apa, Reng Asa hringlaia aleika-om pase leh nuhmei noti a’nṭang hei, khōvelhei maichâma ṭōn inzenhei kha, ankhenga ama’n damak jo hei.

⁴⁷Khava pha Edom ram a reng leiom mak; Judah rengpa takadeisōt reng kathleng inkhat in vai aleirôn.

⁴⁸Jehoshaphat in Ophir ram a sana valona sik a tôr sik, tui-ôngpuia akalôn rakōng kalen aleisyem hei; tâk khahei kha Eziongeber hmun a kakōi heia katla inhlut heia intôrthang mak jo hei.

⁴⁹Khava pha Israel a Reng Ahaziah’n amihei leh Jehoshaphat mihe’n antôrsapna sik a aleihri, tâk Jehoshaphat in leihnōm mak jo.

⁵⁰Jehoshaphat kathi jo khana David khōpuia renghei thlâna anvûm jo, khana asapa Jehoram in ama kathlenga reng inṭang jo.

⁵¹Judah Reng Jehoshaphat in avai rôna kum 17 atluk kum a Ahab sapa Ahaziah kha Israelhei reng hongkachang, ama’n Samaria a kum 2 reng inṭanga kae.

⁵²Ama’n akaṭhamak apa Ahab, anu Jezebel, khana Israelhei setna shunga a’nṭhōi inhlut Reng Jeroboam omchen kha ajuia, RŌNGPU kadōia setna atloa kae.

⁵³Ama hma a aleika-om apa kapōa, ama’n Baal kha akamuk arazen kae, khana Israelhei Pathen, RŌNGPU hnuk kha amannat chet-chet a kae.