Read Komrem RENGHEI INKHATNA 3 Bible Online

RENGHEI INKHATNA 3 - Komrem bible

RENGHEI INKHATNA 3

¹Solomon in Egypt rengpa sanu a nuhmei sik a aloa inmatna aleisyem. Ama’n innpui, Bek-inn khana Jerusalem kurpui bang achaimak kârseng David Khōpuia aka-om sik a amanu kha aheiṭhōia kae.

²RŌNGPU sik a Bek-inn la’nsakmak, khava jâra mipui he’n maichâm hlop-hlop a inthoina tōkna anleitlo ria kae.

³Solomon in RŌNGPU alungset khana apa David mansena kha ajui, tâk ama’m ran athat heia maichâm hlop-hlop a inthoina aleitōk a kae.

⁴Ni khat chu ama Gibeona inthoina katōk leikase ajârchu khana khan rahming inthangpen maichâm kha ka-oma kae. Hiva mak hma ama’n araja raja ro-inthoina aleitlo joa kae.

⁵Khava ning jânchu arahmanga RŌNGPU jōng inlâra ahnenga ader, “Heimo katlo pek sik che namadu?”

⁶Solomon in amasôn, “Kapa David, nasōkpa sik nalungsetna kalen kha namalâr ṭhak khana ama kha nang leh inthlopna shunga akaṭha, ṭong kajui leh malung intheng leikae. Khana tuning chu ama kathlenga vai karôn sik sapa inkhat ahnenga napek a nalungsetna kalen leh akahnet kha ahnenga namalâr injôna kae.

⁷O RŌNGPU Pathen, kei hi naipang lakachang hêr enga heikhonga vai rôn sik mo tia’m lamanhret mak hi eng, a-e’num kapa David kathlenga reng naman chang jo eng.

⁸Hinahin, tei torlo mi katamtak ka-om hei, nami sik a nakadeisōt mipuihei kâra kei ka-om eng.

⁹Hiva jâra namihei chunga kadiktak a vairôntorna sik a khana akaṭha leh akaṭhamak manhretṭhen theina sik a singna kha apek roh. Kha achangmak inchu, nami hingtuk hrep a akatam hei chunga heikhong mo vai karôn tor sik?”

¹⁰Solomon in hivahi ader jâra RŌNGPU kha katlai joa kae,

¹¹khava jâra ahnenga ati, “Nang in nahringkhō sôtna sik, neina sik leh na’nrepuihei thina sik tia adermak chea, kadiktak a vairônna sik singna nader eng jâra,

¹²nang in nader eng kha katlo pek sik che. Ahma inkeia’m hnunga’m aka-om mak sik jo akakhe chet a singna leh manhret theina kha kapek sik che.

¹³Nang in nader mak eng kapha kapek sik che: nahringkhō shunga, reng ralak-hei kanek a karōi leh kajana kapek sik che.

¹⁴Khana nang in nanijui inchu khana kadân leh kaṭong pek, Napa David kapōa, najui inchu hringkhō kasei kapek sik che.”

¹⁵Solomon kha hong inṭhang jo khana arahmanga Pathen in ṭong ahri pek eng kae ti kha amanhret jo. Hivasōa Jerusalema kasea RŌNGPU Intepna Bôm hma kangira RŌNGPU hmaikunga ro-inthoina leh inlôikhôm inthoina atōk a kae. Hivasōa aṭōn karônhei kha revei atlopek hei.

¹⁶Ni khat noti 2 hei Reng Solomon hma kahong hei.

¹⁷Inkhat khan ahri, “Reng Kalûr, nuhmeinu hi leh kei inn inkhat a ka-omsap ung, khana khan ama a-omlai ke’n sapa inkhat kaneia kae.

¹⁸Ke’n sa kaneia ni 2 sōa ama’num sapa inkhat anei. Inna khan keini 2 rōk ka-om ung, milak tûte om mak a kae.

¹⁹Ni khat jân a hin asapa kha adehlona kathi jo.

²⁰Jân a khan ama kathōia, kaje kathi kasira kasapa kha aloa ama jekhuma achoi jo: akathi naidông kha kajekhuma ahongda jo.

²¹Abâna jîngkâra, kaheithōi pha kasa kha netui man-inrong kati pha akathisa kahmu jo. Ke’n kaṭhatak a ka-en pha naidông kha kasa changmak jo.”

²²Tâk-kha nuhmei inkhatnu khan ahri, “Changmak! Akahring naidông hi keita kae, khana akathi naidông hi nangta kae!” Ahma inkei nuhmei khan amasôn, “Changmak! Akathi naidông hi nangta kae, akahring naidông hi keita kae!” Hing’hin rengpa hmaikunga inkhe jo hei.

²³Hivasōa Reng Solomon in ahri, “Nangni 2 et in akahring hi keita, khana akathi hi ama ta inti jo chei.”

²⁴Chemjâm inkhat ava manlo hei, khana anheichoi pha,

²⁵ama’n ati, “Akahring naidông kha aher inhnia hârkhōi ruh khana an-inhnia sempek hei ruh.”

²⁶Anu kadiknu kha, asapa lungsetna kasip a, rengpa hneng ahri, “Reng Kalûr, lungsettak a naipang kha that mak jo roh! Amanu hneng pek jo roh.” Tâk-kha nuhmei inkhatnu khan ahri, “Keini 2 kâra inkhat hnenga apek mak roh; nahrina kha tlosōt roh aher inhnia tuktan roh.”

²⁷Khava pha Solomon in ahri, “Naipang kha that mak ruh! Hma-inkei nuhmei hneng naipang kha pek ruh, amanu kha anu kadiktak kae.”

²⁸Solomon ṭong mathlâk kha Israel mihe’n anthei pha, achunga ankajana kasip jo, ajârchu ṭongdik tantheina Pathen in singna apek jo ti kha anmanhret a kae.