Read Komrem RENGHEI INKHATNA 4 Bible Online

RENGHEI INKHATNA 4 - Komrem bible

RENGHEI INKHATNA 4

¹Solomon kha Israel rakip hei reng kae,

²khana hihei hi aṭōnpui karônhei kae: Thempu: Zadok sapa Azariah

³Reng inna a’nzet hei: Shisha sapahei Elihoreph leh Ahijah Mazetna lekharabu ka-ensui: Ahilud sapa Jehoshaphat

⁴Remi Hlamkakei: Jehoiada sapa Benaiah Thempuhei: Zadok leh Abiathar

⁵Ramṭhen vaikarônhei: Nathan sapa Azariah Rn Innshung Inse: Nathan sapa Zabud thempu

⁶Reng inna sōk-hei ka-ensui: Ahishar Rumhrat a Ṭōn katlohei ka-ensui: Abda sapa Adoniram

⁷Solomon in Israel ram shunga ramṭhen vaikarôn mi 12 akadei hei. Anmani hin anramṭhen karōia inphut reng leh a-innshung sik a sâk antapek sik kae, kum khat shunga thla khat ramṭhen vaikarôn mi inkhat in arôn pek sik kae.

⁸Hihei hi vaikarôn 12 leh anramṭhen rahminghei kae. Benhur: Ephraim tlângram

⁹Bendeker: Makaz, Shaalbim, Beth Shemes, Elon khana Beth Hanan khōpuihei

¹⁰Benhesed: Arubboth leh Socoh, khana Hepher ramṭhen rakip

¹¹Benabinadab: Solomon sanu Taphath ka-ompuipa: Dor ramṭhen seng

¹²Ahilud sapa Baana: Taanak, Megiddo khōpuihei, khana Beth Shan hnenga, Zarethan khōpui hnenga, Jezreel thlang tinga, Abel Mehola khōpui katlunga leh Jokmeam khōpui katlunga ramkei hei seng

¹³Bengeber: Gilead ram a Ramoth khōpui, khana Gilead ram shunga Manasseh sōn, Jair phungṭhen hei khō, khana Bashana Argob ramkei seng, akhenga khō kalenhei 60, rape ankursia ankekot heia sum-êng sungtlōn vânga ankhâr hei.

¹⁴Iddo sapa Ahinadab: Mahanaim ramṭhen

¹⁵Solomon sanu hlop Basemath nuhmeia ka-ompui Ahimaaz: Naphtali ramkei

¹⁶Hushai sapa Baana: Asher ramkei leh Bealoth khōpui

¹⁷Paruah sapa Jehoshaphat: Issachar ramkei

¹⁸Elah sapa Shimei: Benjamin ramkei

¹⁹Uri sapa Geber: Gilead ramkei, Amor Reng Sihon leh Bashana Reng Og vai leirôna Hiva 12 hei tei loa, ram pumpui vaikarôn inkhat leika-om.

²⁰Judah leh Israel mihei kha tui-ôngpuia nêrdi ja kapōa katam hei; ansâk an-ina kahōihei.

²¹Solomon rengram kha Euphrates Tuidunga inphut Philisti leh Egypt ramri katlunga jât rakip inveisa. Ama ahring shung senga anmani hin ramṭhen anpek a amipui kachang hei.

²²Solomon in ni khat a sâk sik amantlukna kha jâmdi kilograme 5,000, sasai kilograme 10,000 kae;

²³a’nvei sehrat kathai 10, ramhânga vei manthai sehrat 20, kemōng 100, hiva chunga shakhi, shangai, keche leh va-âr hei kae.

²⁴Solomon in Euphrates Tuidung tlaitlâk a ram, Euphrates a Tiphsa inphut Gaza khōpui katlung. Euphrates tlaitlâk tinga ka-om reng rakip ama thōia ka-om hei, khana ama leh aram inhnaipui rakip kâra inchamna leikalenga kae.

²⁵Ama hring lai seng, Judah leh Israel ram shunga mihe’n inhuktak a leika-om hei, innshung rakip ama ama et vomhrui rahōn leh theipōng kung annei hei.

²⁶Solomon in gâri kakei shakor rōng 40,000 khana remi shakor 12,000 anei.

²⁷Aram vaikarôn 12 hei khan, inkhat et in thla khat et mannganna dungjuia Reng Solomon leh reng-innpuia akasâk rakip hei tlukna sik a thlai anpek a kae.

²⁸Vaikarôn rakip in gâri kakei shakor leh ramchâr hmun a shakorhei tasâk sik a bunim leh sapôt pek-hlam kasōk kha anheipek a kae.

²⁹Pathen in Solomon kha ahlopdet singna apek jo, khana manhretna kha tetheilo khangtuk hrep akalen kha apek jo.

³⁰Solomon kha nisōtinga mikasinghei leh Egypt mikasinghei kanek a kasingdet a kae.

³¹Ama kha mi rakip kâra akasingpen kae: Ezra mi Ethan kanek a khana Mahol sahei Heman, Calcol, khana Darda hei kanek a’m kasingdet, khana arahming kha ram inhnaipui hei katlunga inthanga kae.

³²Ama’n ṭongchîk 3,000 asyem khana hla 1,000 kakhea aphōa kae.

³³Ama’n thingkung hleikung chungchânga ṭong ahri, Lebanon ram a Cedar thinga inphut a rape chunga kakek kahardông hei katlunga ahri; ama’n shahei, vahei, abok a insôn, khana ngahei chungchânga ṭong ahria kae.

³⁴Raleichung pumpuia reng he’n asingna antheia ahnenga ṭong inngei sik a mi antir hei.