Read Komrem RENGHEI INKHATNA 5 Bible Online

RENGHEI INKHATNA 5 - Komrem bible

RENGHEI INKHATNA 5

¹Tyre Reng Hiram kha David ṭhōn kachang ṭhak, Solomon in apa kathlenga reng kachang jo ti ṭong athei pha ahnenga palai atir hei.

²Solomon in Hiram hnenga hing’hin ṭong aleimanrôn:

³“Kapa David khan akimvea a’nrepui aram inhnaipui hei leh re ale’ntuk ṭhak hei-achang jâra, RŌNGPU apathen kamukna bek-inn kha RŌNGPU’n a’nrepui rakip chunga torna apek mak lai seng leisak tor mak ti kha namanhret a kae.

⁴Tâk-kha tûnchu RŌNGPU ka-Pathen in karamri rakip a mōngna apek jo eng. Inrepui neimak jo eng, thitheina ani kabuhlu sik om mak jo.

⁵RŌNGPU’n kapa David hneng intep a, ‘Nang kahnunga reng kamanchang sik nasapa khan kei sik a bek-inn asak sik kae.’

⁶Khava jâra namihei kha kei sik a Lebanona Cedar thing kaphûr sik a tir hei roh. Kami he’n anmani leh ṭōn antlosap sik, nang in namanṭhat dungjuia namihei kha anhlo kapek sik hei. Nang in kaṭha namanhret kha kae, namihei kapōa kei mihei chu thing phûrthei mak hei.”

⁷Solomon ṭong manrôn kha athei pha Hiram kha inpâk hêra ahri, “Jât kalenhei reng sik a David kathlenga sapa kasing tak apek jâra RŌNGPU kha choi ka-ân chang rasoh.

⁸Hivasōa Hiram in Solomon hneng ṭong hi amanrôn: “Naṭong heimanrôn eng kha kahmu jo khana naderna kha tlo sik a intluk jo eng. Cedar leh hmeila thing kapek sik che.

⁹Kami he’n Lebanona inphut tuipuia thingtlōnhei kha anjōngtôr sik, khana namaduna hmun a tui chunga heitôr theina sik a phôp ansyema ankhit manchun sik hei. Khana khan nami he’n ansōt sik a kha thing hei kha ankim nôk sik hei. Keini langa sik a chu, kamihei sâk leh in kaman pek hnōm che.”

¹⁰Hing’hin Hiram in Solomon tamadu cedar leh hmeila thing kha apek a kae,

¹¹khana Solomon in Hiram hneng gehu ton 2,000 leh olive thai intheng litre 400,000 amihei veina sik a akum katai apek a kae.

¹²RŌNGPU’n a’ntepna anit a Solomon kha singna apek jo. Hiram leh Solomon kâra inchamna ka-oma, inhnōmtōna ansyema kae.

¹³Reng Solomon in Israel pumpuia inphut pase 30,000 rumhrat a ṭōn mantlona sik asyem jo,

¹⁴khana Adoniram kha anka-ensuia amatung. Anmani kha mi 10,000 et a rup thuma aṭhen hei, rup inkhat et kha Lebanona thla khat et vakaphai hei khana thla hni sâm inna he’nle heia ka-om hei.

¹⁵Solomon in mi 80,000 tlângrama hlung kakheng sik, mi 70,000 hlung indom sik aneisa hei,

¹⁶khana ama’n mi 3,300 hlam hmakakei anṭōn ka-ensui sik a ada hei.

¹⁷Reng Solomon ṭongpek dungjuia Bek-inn sik a hlung kalen akaṭha ankheng jo.

¹⁸Solomon leh Hiram mihe’n, khana Biblos khōpuia mihe’n hlung leh thing hei kha Bek-inn sakna sik a anmantluk jo.