Read Komrem RENGHEI INKHATNA 8 Bible Online

RENGHEI INKHATNA 8 - Komrem bible

RENGHEI INKHATNA 8

¹Khava sōa Reng Solomon in phung leh phungṭhen rakip hlamkakei seng, RŌNGPU Intepna Bôm kha David khōpui Ziona inphut Bek-inna anvalo manhlutna sik a ahnenga abek hei.

²Anmani ankhenga thla 7 changna, Ethanim, Murva thla shunga, Rabuk Kût shunga intûp jo hei.

³Hlamkakei rakip kha an-intûp jo pha, thempuhei khan Intepna Bôm kha ankadoma

⁴Bek-inn shunga anthōn manhlut jo. Levihei leh thempuhei khan RŌNGPU omna Pōn-inn kha leh ahmangchâk rakip Bek-inn shunga anchoi jo hei.

⁵Reng Solomon leh Israel mipuihei kha Intepna Bôm hma khan intûp heia kemōng leh sehrat katamtak inthoina antōk jo, teitor emak.

⁶Khava sōa thempu he’n Intepna Bôm kha Bek-inn shunga ankadoma Hmun Inthengpen, mathla kanei ranhringhei hnōia anda jo.

⁷Anmani mathla heizer khan abôm leh akadomna thingtlōnhei kha anmakhusi jo.

⁸Hmun Inthengpen hmatak a akangir tu mo inkhat inchu thingtlōn hmor hei kha anhmu tor sik, hmunlak a inphut chu inhmuthei mak. (Thingtlōnhei kha tûn katlung khana khan laka-om hei.)

⁹Intepna Bôm shunga khan, Israel mipui he’n Egypt a inphut anhei sōksōt laia RŌNGPU’n intepna aleisyem, Moses’n khana khan Sinai Tlânga aleida, hlungpek 2 tei loa heite om mak.

¹⁰Thempuhei khan Bek-inn andahlon pha, manhret manloa sumtuk hongkasip jo

¹¹RŌNGPU omna vâr khan jōng kadi rik-rak jo, khana anmani kha anṭōnhlam tlosōtna sik a avea hlut tor mak jo hei.

¹²Khava sōa Solomon in ader: “RŌNGPU, nang in bōirōk a kani nada, kha’num nang chu sumtuk leh inthim kâra om sik a namadu.

¹³Tûnchu ke’n bek-inn kalentak kasak pek jo che, ahei tik a na-omna sik hmun kha.”

¹⁴Mipui he’n khana khan anngirlai, Reng Solomon in anmani ahnget heia, khana anchunga Pathen mahâmṭhat aderpek heia kae.

¹⁵Ama’n ati, “Israelhei RŌNGPU Pathen choi ka-ân ruh! Kapa David hnenga ale’ntepna kha anit a, hinga aleiti,

¹⁶‘Egypt a inphut kamihei kaṭhōisōtna pha khana inphut, kei kamukna sik a bek-inn sakna sik Israel ram pumpuia khōpui inkhatbek kadei mak eng. Tâk-kha ke’n David, nang kamihei vai karôn sik a kakadeisōt che.’”

¹⁷Khana Solomon in ahrisa a, “Israelhei RŌNGPU Pathen kamukna sik a bek-inn inkhat sakna sik kapa David in aleimantluk,

¹⁸tâk RŌNGPU’n ahnenga ati, ‘Nang in kei sik a bek-inn sak sik namadu kha kadik che,

¹⁹tâk nang in sak hêrmak tin che. Kei bek-inn kasak sik khachu, nasapa, nasapa khet kha kae.’

²⁰“Tûnchu RŌNGPU’n a’ntepna kha anit jo. Israelhei reng kha ke’n kapa kathleng jo, khana Israelhei RŌNGPU Pathen kamukna sik a Bek-inn kha kasak jo.

²¹Egypt a inphut ama’n aheiṭhōisōt lai hei RŌNGPU’n nipusōnhei leh ale’ntepna mazetna hlungpek hei, Intepna Bôm kha dana sik a Bek-inn shunga hmun kasyem jo.”

²²Khava sōa mipuihei hmaikunga solomon kha kasea maichâm hmatak a vakangir, khana khan akut akalânga

²³khana ader jo, “Israelhei RŌNGPU Pathen, marvân chunga leh ralei thōia nang kapō pathen om mak! Namihei leh na-intepna kha nanit khana malung pumpuia nang anjui che pha nalungsetna kha namalârpek hei.

²⁴Kapa David hnenga na-intepna kha nanit; tuning chu ṭongrahme rakip hui katlung jo.

²⁵Tûnchu, Israelhei RŌNGPU Pathen, kapa hnenga naleihri pek kha ama’n malung kahluttak a ajui che kapōa ami he’n anjui che’nchu, asōn inkhat in Israelhei reng akachang sik kae tia nalei intepna ralak-hei hi’m nanit sik a derna kanei che.

²⁶Khava jâra tûnchu, O Israelhei Pathen, kapa David, nasōkpa hnenga nale’ntepna rakip kha dik jo rasoh.

²⁷“Tâk, Eh Pathen, nang raleichunga hin aka-om tor khet che mo? Marvân rakip innum akentor mak che kae, khan chu hiva Bek-inn kasak a hin heikhonga mo akatluk tor sik?

²⁸RŌNGPU ka-Pathen, kei chu nasōkpa eng kae. Kaderna athei pek roh, khana tuninga kangekna che hi ahnōm pek roh.

²⁹Hiva nang kamukna sik a nakadeisōt hmun a Bek-inn hi sûn leh jân ahrung pek roh. Ke’n Bek-inn hi kahnget a kader pha athei pek roh.

³⁰Kei derna leh namipui he’n hiva hmun langting anhnget a ander pha athei pek roh. Marvâna na-inna inphut athei pek ina arangei mandam roh.

³¹Mi inkhat in ṭhena anei tia mihlop inkhat amaher pha, ama kha ṭhena neimak tina intepna kanei sik a hiva Bek-inna maichâma anheiṭhōi pha,

³²O RŌNGPU, marvâna inphut heirangei roh khana nasōk-hei kha ṭong tan roh. Ṭhena kaneipa kha arahōi hrep a karâk roh, khana ṭhena kasepa kha mandik roh.

³³“Nami Israel he’n nang kadōia anset jâra, an-inrepui he’n antor hei pha, khana anmalung insir heia hiva Bek-inna hin anhonga rangei mandam ander che pha,

³⁴marvâna inphut theipek hei roh. Namihei setna rangei mandam hei roh, khana anpu sōnhei hneng naleipek ram a khan heiṭhōi male hei roh.

³⁵“Nami he’n anset jâra nang in khō namansûr mak pha, khana anmani’n insir heia hiva Bek-inn hi anhnget a hnasatak a ander pha,

³⁶marvâna inphut theipek hei roh. Rengpa leh Israel mipuihei setna rangei mandam hei roh. Akadik kha antlona sik a manthei hei roh. Khava sōa, O RŌNGPU nang in namihei hnenga ahei tik a ankarōi sik napek jo hei hiva naram shunga hin khō jōng mansûr roh.

³⁷“Ram shunga hin vonṭâm atlâk a, natse atlâk a, thli kalum in sâng leh be akâng manchâra, khâikhu rup he’n ansâk manhmanga, namipuihei an-inrepui he’n anbuhlu heia, khana hrise atlâk a, ankâra natna achōr jo pha,

³⁸anderna che kha rangei pek hei roh. Israel mipuihei kâra tu mo inkhat in, malung kachâmtak a ankut anzera hiva Bek-innting derna annei inchu,

³⁹anderna kha rangei pek hei roh. Marvâna na-inna khan leitheipek hei roh, rangei mandam hei roh, khana inthōpui hei roh. Nang rōk in mihringhei malunga mandonna namanhret a kae. Mi inkhat et rahōi sōkna dungjuia razen hei roh,

⁴⁰nang in kanpu sōnhei hneng naleipek ram shunga an-omlai seng namipui he’n anjuina sik che.

⁴¹“Ramlak mi inkhat, ram kahlatak a aka-om khan narahming inthang leh namihei sik a ṭōn kalen natlona hei kha atheia, khana nang inmuk sik leh ani kader sik a hiva Bek-inna hin ahong pha,

⁴²

⁴³aderna kha rangei pek roh. Na-omna hmun marvâna heithei pek roh khana Israelhei tatlo kapōa, vânhnōia mi rakip in anmanhret chea anjuina sik che ader che kha tlopek roh. Kha achang inchu, hiva ke’n kasaksōt Bek-inn hi nang kamukna hmun kae tia anhong manhret sik jo.

⁴⁴“Anmani inrepuihei kadōia re katuk sik a nang in namihei ṭong napek hei pha, anmani omna hmun a khan ander chea, hiva nakadeisōt khōpuiting leh nang sik a kasaksōt Bek-inn hi anhei hnget pha,

⁴⁵anderna kha rangei pek hei roh. Marvâna inphut theipek hei roh, khana torna kha pek hei roh.

⁴⁶“Nami he’n nang kadōia anset jo’nchu, setna katlomak inkhatbek an-om mak inchu, nahnuknat a an-inrepuihei namantor he’nchu khana ram hlop a rehringa ansur jo he’nchu, khava ram kha akahlatak achang inum,

⁴⁷namihei derna che kha rangei pek hei roh. Khava ram a an-insira nahnenga derna annei inchu, khangtuk hrep ansetna leh anṭhatmakna kha anphôngsōt inchu, O RŌNGPU anderna kha rangei pek hei roh.

⁴⁸Khava ram a khan kadik leh inthengtak a an-insir inchu, khana hiva kanpu sōnhei hneng naleipek ram, nakadeisōt khōpui, khana ke’n nang sik kasaksōt hiva Bek-innting hin anhmai anhei hnget a ander inchu,

⁴⁹kha achang inchu, anderna kha rangei pek hei roh. Marvâna na-inna khan theipek hei roh khana lungset hei roh.

⁵⁰ansetna leh nang kadōia an-inphinna rakip rangei mandam hei roh, khana an-inrepui he’n anchunga lungset a man-en hei roh.

⁵¹Khava hmei kasuk ratap, Egypt a inphut naheiṭhōisōt anmani kha nami khet hei kae.

⁵²“Chunghnung RŌNGPU, nami Israelhei leh anrenghei chunga lungset a na-en ṭhak hei kha chang rasoh, khana inthōpui sik a anbekna che akaia anderna narangei pek chang rasoh.

⁵³Kanpu sōnhei hi Egypt a inphut naṭhōisōt hei pha, nang in Moses hneng namanthei kapōa, nami kachang sik a mi rakip hei kâra inphut nakadeisōt hei kae.”

⁵⁴Solomon in RŌNGPU hnenga aderna achaisōa, amarkhup athlep a akut akalângna maichâm hma khan kangirsōt jo.

⁵⁵Khava hmun a a’ntûp mi rakip chunga Pathen mahâmṭhat atlungna sik a kare kasōktak a ader jo. Ama’n ati,

⁵⁶“Pek sik ale’ntepna dungjuia, amihei hneng mōngna anikapek RŌNGPU kha choi manshânga om rasoh. Asōkpa Moses hnenga malung kayâng tak a ale’ntepna kha anit joa kae.

⁵⁷RŌNGPU ni-Pathen khan nipusōnhei aleiompui hei kapōa, a-ompui ṭhak me rasoh; eini adahlon hêrmak rasoh khana ahlon sōt mak rasoh;

⁵⁸nikahring sik amadu kapōa nihring theina sik a, khana nipusōnhei hneng aleipek dân leh ṭongpek rakip nijui theina sik a, ama’n aṭong kajui amanchang rasoh.

⁵⁹Hiva ke’n derna leh ngekna ahnenga kanei hi ahei tik a RŌNGPU ni-Pathen in amandonṭhak pek rasoh. Ama’n Israel mipui leh anrenghei chunga, ani tina antarangei dungjuia, lungset ṭhak hei rasoh.

⁶⁰Khang’khan RŌNGPU rōk hi Pathen kae, alak om mak ti hi vânhnōia jât rakip in anhong manhret sik jo.

⁶¹Amipui nangni, tuninga natatlo kapōa, adân leh aṭongpek jui una, ahei tik a RŌNGPU ni-Pathen taksenthei kha chang ruh.”

⁶²Khava sōa Reng Solomon leh khana ka-om mipui rakip in RŌNGPU hneng inthoina antōk jo.

⁶³Ama’n inlôikhômna tōkna kha sehrat lu 22,000 leh kemōng 120,000 inthoina atōk hei. Khang’khan rengpa leh mi rakip in Bek-inn kha a’ntōksōt jo.

⁶⁴Khava ning bât khan reng-innpuia alaiṭim, Bek-inn hmatak a telai, hei kha’m ama’n mantheng sōtna anei jo, khava sōa ahmun a khan apum a ro-inthoina hmuchi, khana inlôikhôm inthoina sik a ranthai hei tōkna anei jo. Ama’n hiva atlona ajârchu sum-êng maichâm kha hiva inthoina sik a kasin reia kae.

⁶⁵Bek-inna khan Solomon leh Israel mipuihei kha Rabuk Kût nitna ni 7 kachōnghei. Khana khan sak tinga Hamath Rakanna inphut thlâng tinga Egypt ramri katlunga hmun kahlatak a mi katamtak intûp hei.

⁶⁶Ni 8 tluk ning Solomon in mihei kha an-inn et a atirsōt jo hei. Ankhenga ama anchoi ka-ân khana mahâmṭhatna rakip RŌNGPU’n asōkpa David leh amipui Israel apek hei jâra inpâktak a innting inle jo hei.