Read Komrem RENGHEI INHNINA 10 Bible Online

RENGHEI INHNINA 10 - Komrem bible

RENGHEI INHNINA 10

¹Samaria khōpuia Ahab sōn leh pâr 70 leika-om hei. Jehu’n chithi inkhat amazet a khōpui vaikarônhei, khōpuia ka-om hlamkakeihei, khana Ahab innkōhei ka-ensui hneng chithi aleitir. Chithi kha hinga kae:

²“Nangni rengpa sōnhei ka-ensui chei kae khana nangni rachamtak a gâri, shakor, hmangchâk, rekur tukkhum khōpui nannei hei. Kha achang jâra chithi hi nanrahlâng lim bât leh

³rengpa sōnhei kâra rahōi kasōk sik inkhat kadei una reng manchang ruh khana ama kha hukna sik a re kha tuk ruh,” ati.

⁴Samaria vaikarôn mihei kha inpir jo hei. Anmani’n anhri, “Heikhong inmo Jehu nidōi tor sik? Reng Joram leh Ahaziah inum antadōi tor mak kae.”

⁵Khava jâra reng-innpuia ṭōnkarônhei leh khōpui kahrunga ṭōnkarônhei khana hlamkakeihei leh anka-ensuihei kha inchun heia hiva ṭong hi anleitir, “Keini hi nasōk ung kae, nahri rakip tlo sik a intluk ung. Khana keini’n tûte inkhat reng manchang mak ning; kaṭhapen sik nati kha intlo roh.”

⁶Jehu’n chithi inkhat amazet nôk a, “Nangni’n kei langa nan-om a, kaṭong pek jui sik a nanti’nchu, ajîng kania hiva phatak a hin Ahab sōn leh pârhei lu hei kha Jezreel a heichoi ruh,” ati. Ahap sōn leh pâr 70 hei kha Samaria mipui hlamkakeihei, ankavei inhring hei ensuina thōia leika-om hei.

⁷Jehu chithi anhmu lim leh Samaria hlamkakeihei khan Ahab sōn leh pâr mi 70 hei kha anthatpet hei, anlu hei kha hraithuk heia anda a Jezreel a Jehu hneng anleimanrôn.

⁸Ahab sōn leh pârhei lu kha anheichoi jo tia Jehu hneng anmanthei pha, ama’n khahei kha buk hnia khōpui sōngkot a amanbuk heia jîngkâr katlunga dana sik a ṭong apek hei.

⁹Jîngkâra ama sōngkot a vakasea khava hmun a ka-om mihei hneng ahri, “Reng Joram dōina ṭōn mantlukna leh ama akathat kha kei eng kae, khava chunga nangnihei rahno chenna sik om mak. Tâk-kha hiva rengsahei hi tu’n mo athat hei?

¹⁰Hivahin RŌNGPU’n Ahab sahei chunga aleihri kha huitlungna manchênna kae. RŌNGPU’n asânkathem Elijah hnenga aleihri seng kha atlosōt jo kae.”

¹¹Hivasōa Jehu’n Jezreel a ka-om Ahab innkōhei seng, aṭōn karônhei, aṭhōnhei, khana thempuhei athatsō jo hei; inkhatbek kahringa damak hei.

¹²Jehu’n Jezreel adahlona Samaria kase jo. Ahongna hin “Kemōng kakhemhei Rephōr” inti hmun ajōng phâk pha

¹³Judah Reng Ahaziah u leh nai ṭhahrep a’ntōpui hei khana ader hei, “Nangni tu chei mo?” Anmani’n anmasôn, “Ahaziah u leh nai ung kae. Keini Jezreel a Rengnu Jezebel sahei khana reng innkōhei hneng kajana kapek sik a akase ung kae.”

¹⁴Jehu’n amihei hneng ṭong apek hei, “Anmani kahringa sur hei ruh!” Anmani’n ansur heia, tuikhur inkhat hnenga Jehu’n athat jo hei. Anmani ankhenga mi 42 hei kae inkhatbek akahringa damak hei.

¹⁵Jehu’n se aleiphut nôk a, ahlam hrona Rechab sapa Jonadab aleiratō. Jehu’n ralamna aneia ahri, “Kei leh nang mandonna in-angtling. Kei nabôm sik eng mo?” Jonadab in, “Kabôm sik che,” tia amasôn. Jehu’n amasôn, “Khan chu nakut ahei pek roh.” Ankut intu heia Jehu’n atolai chunga akei manke jo,

¹⁶khana ati, “Kei leh inṭhōia se rih khana RŌNGPU hnenga heituk a ṭittak a kamalung kapek mo ti kha va-en roh.” An-inhnia Samaria katlunga shakor gâri antôra kase hei.

¹⁷Anmani khava hmun kha antlung pha Jehu’n Ahab innkō seng athatpet hei, inkhatbek ṭhenmak hei. Hivahi RŌNGPU’n Elijah hneng hinga hong kasōk sik tia aleihri kha kae.

¹⁸Jehu’n Samaria mi seng abek mantûp heia ahri, “Reng Ahab in Baal kha ajingtehrep arazen kae, tâk-kha kei chu kakhe chet a kakamuk sik kae ati.

¹⁹Baal sânkathem seng heibe hei ruh, Baal inmuk leh thempu rakip heibek hei ruh. Tûte hongmak tlomak hei rasoh. Baal hneng ke’n inthoina rōi kalentak inkhat katlo sik kae, akahongmak mi kha that sik kae.” (Jehu’n hivahi a’nhlemsak a Baal mihei thatpetna sik atlo kae.)

²⁰Hivasōa Jehu’n ṭong amasō, “Baal kamukna sik kani inkhat kha tep ruh!” Kani tepna kha anphôngsōt jo,

²¹khana Jehu’n Israel ram pumpuia ṭong amathlung jo. Baal inmuk rakip kahong jo hei, inkhatbek vâtmak hei. Anmani ankhenga Baal Bek-inna kahlut hei, kasip phet jo hei.

²²Jehu’n a’ntheng pōn leh der katintapa thempu hneng Baal inmuk hei ta’nsi sik ahei keisōna sik ṭong apek.

²³Khava sōa, Jehu kha Rechab sapa Jonadab leh inṭhōia bek-inna kahlut hei khana ahri, “Baal inmuk mihei rōk hiva hmun a aka-om sik hei kae khana RŌNGPU inmuk mi tûte hivahin invei theimak hei ning.”

²⁴Khan chu ama leh Jonadab in inthoina leh roa tōkna sik Bek-inna kahlut jo hei. Ama’n milai 80 hei kha bek-inn vângting ada heia hinga amanthei hei: “Nangni’n hiva mihei hi nantathatsō pet sik hei kae; tu mo inkhat in mi amantlânsōt inchu, khava kahlanga ama hringkhō a’nlo sik kae!”

²⁵Jehu’n inthoina kha achaisō lim leh, kot kahrunghei leh ṭōnkarônhei hneng, “Hlut jo ruh, thatpet jo hei ruh; inkhatbek manphesōt mak hei ruh!” ati. Anmani chemjâm leh kahlut heia anthatpet jo hei, ankathi kalōnghei kha vângting anhei keisō heia kae. Khava sōa anmani bek-inn hmun intheng katlunga kahlut heia,

²⁶kacho intheng kha anheilosōt a hmei vâng anroa kae.

²⁷Khang’khan a’ntheng kacho leh bek-inn kha te sōkna anhmang jo, tûn katlunga laka-oma kae.

²⁸Khang’khan Jehu’n Israel ram shunga Baal kamukna kha alosōtpet a kae.

²⁹Tâk-kha, Bethel leh Dan a sana Sehratte limsyem kamukna Israel sahei setna langting alei kaching Jeroboam rengpa kha ama’n aleimajôma kae.

³⁰RŌNGPU’n Jehu hneng ahri, “Nang in Ahab sahei hneng ke’n kamantlo hnōm che rakip natlosōt jo. Khava jâra kei intep eng khachu nasōn-napâr he’n khang 4 katlunga Israel reng akachang sik hei kae.”

³¹Tâk-kha Jehu’n Israelhei Pathen RŌNGPU ṭongpek kha malung inthenga leijui mak; khava kanek a, Israelhei setna langting aleikaṭhōi Jeroboam omchen kha aleijuia kae.

³²Khava pha RŌNGPU’n Israel ram kha amansin chet jo. Syria Reng Hazael in Israel ramṭhen rakip aleilo jo

³³Jordan nisōa Arnon Tuidung pang, thlang tinga Aroer khōpui — Gad, Reuben khana Nisō Manasseh-hei omna Gilead leh Bashan ramṭhen inveisa a kae.

³⁴Jehu’n aleitlo ṭōn rakip, ama invakna hei, Israel Renghei Thuhming Rabu a inzet a kae.

³⁵Ama kathia Samaria a anvûm jo, khana asapa Jehoahaz in athlenga reng kachang jo.

³⁶Jehu’n Samaria a Israel reng kachanga kum 28 vai aleirôna kae.