Read Komrem RENGHEI INHNINA 11 Bible Online

RENGHEI INHNINA 11 - Komrem bible

RENGHEI INHNINA 11

¹Ahaziah rengpa nu Athaliah’n asapa anthat jo ti ṭong athei pha reng-innpuia ka-om reng innkō rakip thatsōna sik a ṭong apek jo hei.

²Ahaziah sapa Joas rōk kha leikatlânsōt jo. Ama kha alak-hei leh that sik a leika-om, tâk-kha anu kasin Jehosheba, Jehoram rengpa sanu khana Ahaziah sik a anainu kasōk khan aleiṭhōisōt a kae. Amanu khan ama leh ama inzen mi kha Bek-inna rekna den inkhat a Athaliah’n athat makna sik a aleithup.

³Athaliah khan rengnu achanga vai arôn lai Jehosheba’n Joas kha kum 6 anlei ensuia Bek-inna aleithup a kae.

⁴Tâk-kha kum 7 tlukna khan thempu Jehoiada’n mi atira reng innkō hrungna ṭōnpui karôn leh Reng-innpui kahngâk-hei bek-inna anhongna sik a ṭong aleipek hei, khana khan ama ṭōn mantlukna rakip chungchânga intepna leh inṭhōia amanhnōm jo hei. Ama’n Reng Ahaziah sapa Joas kha anhnenga amanhmu hei

⁵khana hiva ṭongpekna hi aleinei hei, “Châmhngat ninga ṭōnkatlo nanhong pha sem thuma sem khat in Reng-innpui nantahngâk sik;

⁶sem khat khan Sur Kot a nantahrunga akangir sik chei, khana sem khat khan kot kahngâk-hei kahnunga nantahngâk a akangir sik chei kae;

⁷Châmhngat ninga ṭōnhlam intumak rup 2 he’n reng hrungna sik a Bek-inn kha antahngâk sik kae.

⁸Nangni’n Reng Joas asena rakip a chemjâm nanmatua nanta-ompui sik kae. Tu achang inum nanhnenga akahong mi kha nantathat sik kae.”

⁹Ṭōnkarônhei khan Jehoiada ṭongpek kha anjuia anmihei, serninga ṭōnhlam intumak hei leh ṭōnhlam intu hei ahnenga anheiṭhōi hei.

¹⁰Ama’n ṭōnkarônhei kha David kasei leh pho Bek-inna antada hei kha aleipek hei,

¹¹rengpa hrungna sik a chemjâm intu mihei kha Bek-inn hmating aman om hei.

¹²Jehoiada’n Joas kha aheiṭhōisōt a reng lukhu amankhu jo khana renghei dân lekha kha apek jo. Khava sōa Joas kha thai ankanoa reng kachang jo tia anphông jo. Mipui he’n ankut ankabena ka-ông heia, “Rengpa ahringsei sôt rasoh,” anti.

¹³Rengnu Athaliah’n kot kahngâk-hei leh mipuihei kapeng rasa aleithei, mipui intûpna Bek-innting inranga kahong.

¹⁴Khana khan Bek-inn hlutna kacho hnenga reng ather inkhat angir kha aleihmu, khavakha tlongai leikae. Ama kha ṭōnpui karônhei leh pengkun katum he’n anleikakebit, khana mipuihei khan inpâktak a ka-ông heia pengkun anleitum. Athaliah khan malung kana tak a apōn akei hlera ka-ôngsōt a, “Reng kadōi! Reng kadōi!” ati.

¹⁵Jehoiada in Athaliah kha Bek-inn vena that sik a leimadu mak, khava jâra ama’n remi hlamkakeihei ṭong apek hei, “Amanu hi remihei kâra ṭhōisōt ruh, khana ama huk rong tia akahong hei kha that hei ruh.”

¹⁶Anmani’n amanu kha ansur jo, reng-innpuiting anṭhōisōt jo, khana Shakor Kekot a khan anthat jo.

¹⁷Thempu Jehoiada’n reng Joas leh mipui ankhenga RŌNGPU mi kachang sik a ṭong amantep hei; khana ama’n mipuihei leh rengpa kâra intepna inkhat amannei hei.

¹⁸Hivasōa mipui he’n Baal bek-inna kase heia khavakha anvōkkhōi jo; khana limsyem leh maichâm andeng khōisō jo hei, khana Baal thempu Mattan kha maichâm hma a anthat jo. Jehoiada’n Bek-inn kahngâk sik mi ada hei,

¹⁹khan chu ṭōnkarônhei, reng innkōhei kahrunghei, khana Reng-innpui kahngâk-hei khan reng kha Bek-inna inphut Reng-innpuiting anheiṭhōi jo, mipui he’n anjui hei. Joas khan Hrungna Kekot a kahlut a ama hmun, reng in-ongna kha ahlō jo.

²⁰Mipuihei kha inpâkna kasip jo hei, khana khōpui kalen kha kadai hnger jo, tûnchu Athaliah kha Reng-innpuia anthat joa kae.

²¹Joas kha kum 7 ajōng tluk pha Judah reng inṭang jo.