Read Komrem RENGHEI INHNINA 12 Bible Online

RENGHEI INHNINA 12 - Komrem bible

RENGHEI INHNINA 12

¹Israel Reng Jehu’n vai arôn kum 7 tlukna Joas in Judah reng leikachang khana ama’n Jerusalema kum 40 vai arôna kae. Anu Zibia kha Beersheba khōpuia mi kae.

²Ahringkhō katlung bit a RŌNGPU lungdo aleitlo, ajârchu Jehoiada thempu khan mansena aneia kae.

³Achang ravâng, khōvelhei kamukna hmun chu suk manhmang mak hei, khana mihe’n inthoina leh marim katui rona antlo manjôna kae.

⁴Joas in thempu abek heia bek-inna inthoina tōksōt sêr, intanloa inthoina sik a sêrbat khana anlungdo hrep a kutchoi pekna hei seng kha da mantûpna sik a ṭong aleipek hei.

⁵Thempu he’n ama ama tarazen mihei sêr heichoi kha antatinta sik kae, sêr kha Bek-inn syem mantherna arangei pha hmang sik kae.

⁶Tâk-kha Joas vairônna kum 23 aheitluk katlunga Bek-inn kha leisyem manther mak hei.

⁷Khava jâra Joas in Jehoiada leh aralak thempuhei abek heia ahri. “Heisa mo Bek-inn hi nantasyem manther mak? Tûna inphut chu, nantahmu sêr kha indathei mak tin; syem mantherna kha tlotheina sik a, sêr kha nantapek manhlut sik kae.”

⁸Thempu he’n khavakha anhnōm jo khana Bek-inn anmani’n antasyem manther mak sik kha’m kahnōm jo hei.

⁹Khava sōa Jehoiada’n thingbôm inkhat akhur avit a Bek-innhei hlutna changtinga, maichâm hnenga aleida. Kekot a ṭōnkatlo thempuhei khan kamukna akahong hei tapek sêr kha thingbôm shunga khan anthōna kae.

¹⁰Thingbôm shunga sêr katamtak a-om jo pha reng inna a’nzetpa leh thempu kha kahong sik hei, dangka kha anmanjor sik khana akahrik kha a’nte sik.

¹¹Sêr aja kha anmazet manhlut sō leh Bek-inna ṭōn katintahei hneng anpek sik hei, hivahi thingṭōn katlohei leh inn kasâk hei hneng pek sik kae.

¹²Hlung ṭōn katlohei khana hlung katan he’n, Bek-inn syem mantherna sik a thing leh hlung anrachôk, khana aralak arangei rakip a anpek.

¹³Tâk-kha khava sêr kha dangka kōklei, thlengkam, pengkun, thaihmei detna hmangchâk, khana aralak dangka leh sana neinâk-hei syemna chu hmang hêrmak hei.

¹⁴Khavakha syem mantherna ṭōn katlohei hneng pekna leh syem mantherna sik neinâk rachôkna rōk a hmang sik kae.

¹⁵Khava ṭōn katintahei kha anmalung intheng, khava jâra anchunga sêr leh sum enmansinna sik rangei mak a kae.

¹⁶Neinâk lo malena sêrtōkna leh set-inthoina sêrtōkna hei kha thingbôm shunga damak hei; khachu thempuhei ta kae.

¹⁷Khava pha Syria rengpa Hazael in Gath khōpui kalen chunga re aleitloa alo jo; khava sōa ama’n Jerusalem re tlo nôk sik a le’ntluk a kae.

¹⁸Judah reng Joas in ama hma a aleika-om Jehoshaphat, Jehoram, khana Ahaziah reng he’n RŌNGPU hneng anta leitōk rakip kha alopet a, khava chunga ama khet tōkna leh Bek-inn karōi bukna sana rakip ahapsa a Reng Hazael hneng atir jo, khava sō rōk a Hazael in Jerusalema inphut aremi aṭhōisōt jo hei.

¹⁹Joas in aleitlo ṭōn rakip Judah renghei thuhming Rabu a inzet a kae.

²⁰Rn Joas ṭōnkarônhei khan marûk lungthim antloa, Shimeath sapa Jozakar leh Shomer sapa Jehozabad in Jerusalem nisōtinga ralei pi dengna chunga a’nsak inna, Silla langa sesukna hlam a anthat jo. Joas kha David khōpuia renghei invûmna khan anvûma kae, khana asapa Amaziah’n akahlang athlenga reng kachang jo.