Read Komrem RENGHEI INHNINA 13 Bible Online

RENGHEI INHNINA 13 - Komrem bible

RENGHEI INHNINA 13

¹Ahaziah sapa Joas’n Judah reng kachanga vai arônna kum 23 atluk pha, Jehu sapa Jehoahaz in Israel reng leikachang, ama’n kum 17 Samaria vai aleirôn.

²Ama hma a Reng Jeroboam kapōa, ama’n RŌNGPU dōina setna aleitloa Israel kha setna hlam a aleiṭhōi; ahlam hro kaṭhamak kha bâng hêrmak.

³Khava jâra RŌNGPU’n Israel chunga ahnuk kana hêr, khana Syria reng Hazael leh asapa Benhadad he’n ave-avea torna amannei hei.

⁴Khava pha Jehoahaz in RŌNGPU hneng derna anei, Syria reng in khang hrep a Israelhei amanrim hei kha RŌNGPU’n aleihmu joa, aderna kha athei pek jo.

⁵Syria heia inphut ankahuksōt sik RŌNGPU’n hlamkakei inkhat ahei tir pek hei khana Israel kha hma kapōa kamōnga ka-om jo hei.

⁶Tâk-kha Israelhei hlamlea ankaṭhōisōt Jeroboam setnahei khachu masō dekmak hei, antloṭhak a kae. Samaria a Asherah pathennu limsyem kha ka-om ṭhak a kae.

⁷Jehoahaz kha shakor remi 50, gâri 10, ke remi 10,000 tei loa remi neimak jo, ajârchu Syria reng in alakseng chu, vaiphin kapōa achōn rachi heia amanhmang sō jo hei.

⁸Jehoiahaz in aleitlo ṭōn seng khana vak kaṭha a aleitlosōt hei kha Israel Renghei Thuhming Rabu a inzet a kae.

⁹Ama kathia Samaria anvûm, asapa Jehoiash in athlenga reng kachang.

¹⁰Judah Reng Joas in vai arônna kum 37 atluk pha Jehoahaz sapa Jehoas in Israel reng kachang, khana Samaria a kum 16 vai aleirôn.

¹¹Ama’num RŌNGPU dōina setna aleitlo, Israel kha setna shunga akaṭhōi inhlut Reng Jeroboam ṭhatmak hlam hro kha ajuia kae.

¹²Jehoas in aleitlo rakip khana Judah reng Amaziah dōina re shunga a-invakna hei akhenga Israel Renghei Thuhming Rabu a inzet a kae.

¹³Jehoas kha kathia Samaria a renghei vûmna thlâna anvûm jo khana asapa Jeroboam II khan ama kahlanga reng kachanga kae.

¹⁴Sânkathem Elisha kha nat kakhôk inkhat a dammak jo, akathi sik a ajelai khan Israel Reng Jehoas kha akaphâk a vakase. Ama kha kaṭap a “Apa, Apa!” aleitia ka-ông. “Nang chu torna kanei Israel kahrungpa che kae!” ati.

¹⁵Elisha’n ṭong apek a, “Sai inkhat leh the ṭhahrep heichoi roh,” ati. Jehoas in ahei choi,

¹⁶kâpsōtna sik a a’ntlukna sik Elisha’n amanthei. Rengpa kha intluk jo, Elisha’n akut kha rengpa kut chunga aleida.

¹⁷Khava sōa, Sânkathem ṭongpek kha ajuia rengpa’n Syria kahnget thlikot kha amahlang. Elisha’n “Sai kha kâp roh” ati. Rengpa’n sai kha akâp lim bât leh sânkathem khan ati, “Nang hi RŌNGPU the che kae, hivahin Syria re ator sik kae. Nang in Aphek a Syriahei kha re nator mak lai seng natuk sik hei kae.”

¹⁸Khava sōa Elisha’n reng hnenga the ralak-hei vânga ralei hmaia kâpna sik amanthei. Rengpa’n the kha raleia vōi 3 akâpsōa kahai jo.

¹⁹Khava pha Elisha ahnuk kana jo, rengpa hneng ahri, “Vōiranga vōiruk nalei kâp sik kae, khan chu Syriahei chunga nang in pui katluk a re nator sik hei kae; tâk-kha tûnchu vōi 3 rōk re nator sik jo kae,” atipek.

²⁰Elisha kha kathia anvûm jo. Akum katai Moab mihe’n Israel ram a re anleituk.

²¹Vōi khat chu, kathi hrena pha inkhat a, khava rup inkhat anhmu heia, mihe’n akathi kalōng kha Elisha thlânkhura anhlonna katlânsōt jo hei. Akathi kalōng khan Elisha saru hei atônlim leh hong kahringsōt a khana kangir joa kae.

²²Jehoahaz in vai arônna shunga Syria Reng Hazael in Israel sahei kha asuk manrim ri hei,

²³tâk-kha anchunga RŌNGPU’n lungsetna leh maritna anei hei. Abraham, Isaac khana Jacob leh intepna anleinei jâra anmani suk manhmang sik hei kha leihnōm mak a kae. Ama’n amihei kha mahngi hêrmak hei.

²⁴Syria Reng Hazael athisōa asapa Benhadad in reng hongkachang.

²⁵Khava sōa Israel Reng Jehoas in Benhadad kha vōi 3 re aleitor, Jehoas pa Jehoahaz vairôn shunga Benhadad taleilosōt khōpuihei kha avea aleilo male heia kae.