Read Komrem RENGHEI INHNINA 14 Bible Online

RENGHEI INHNINA 14 - Komrem bible

RENGHEI INHNINA 14

¹Israel reng Jehoahaz sapa Jehoas’n vai arônna kum 2 tlukna Joas sapa Amaziah’n Judah reng kachang

²akum 25 ajōng tluk pha inphut Jerusalema kum 29 reng kachanga vai arôn. Anu kha Jerusalema Jehoaddin intinu kha kae.

³Ama’n RŌNGPU tlaina ṭōn aleitlo, tâk-kha apusōn Reng David kapōhrep a chu leitlo mak; khava kanek a, apa Joas kapōa aleitloa kae.

⁴Khōvelhei kamukna hei kha sukset mak hei, khana mipui he’n an-inthoina leh bero rona antloṭhak a kae.

⁵Amaziah khan ratha kahnet a aneilaitak apa, rengpa kathat ṭōnpui karônhei kha athatsō heia kae.

⁶Kha’num, Moses dân a RŌNGPU mantheina dungjuia ansahei chu leithat mak hei: “Ansahei ṭhena jâra anpahei that sik changmak, khana anpahei ṭhena jâra nasahei that sik hei changmak ning; mi inkhat hi ama khet ṭhena jâra that sik kae,” ati.

⁷Chi phaichama Amaziah’n Edom mi 10,000 athat hei; re shunga Sela khōpui kalen kha ahlō, khana Joktheel tia arahming aphō, rahming kha ka-om thang jo.

⁸Khava sōa Amaziah’n Israel Reng Jehoas hneng re intlona sik a ṭongkarôn atir hei.

⁹Tâk-kha Reng Jehoas in hing’hin ṭong aleimanrôn, “Pha khat a Lebanon Tlâng heia rahlingbuk inkhat in cedar thingkung inkhat hneng, ‘Kasapa hneng nasanu kha ompui sik apek roh,’ ati. Khana ramsha inkhat kahonga rahlingbuk kha achōn rachi jo.

¹⁰Tûnchu Amaziah, nang in Edomhei nator jo hei, khana inlensakna’n kasip jo che. Narahming inthang kha tlaipui inna na-inna omhnâm roh. Nang leh namihei inrengna rōk heikarôn sōt sik a bōina kha heisa mo najong?” ati.

¹¹Tâk-kha Amaziah’n leirangei mak, khava jâra Reng Jehoas in remi aṭhōia Judah a Beth Shemes intia khan re atuk jo.

¹²Amaziah remi kha antor jo hei, aremi rakip an-inn et a katlân jo hei.

¹³Jehoas in Amaziah kha rehringa ahei sur jo, Jerusalema kahonga, metre 200 kapō kasei Ephraim Kekot a inphut Arakir Kekot katlung rape kha anvōkkhōi jo.

¹⁴Ama’n sana dangka ahmu seng kha alo jo, Bek-inn hmangchâk rakip, reng-innpuia karōi rakip achoia Samaria inle jo. Ama’n rehringa surmi he’m aṭhōi hei.

¹⁵Jehoas in aleitlona, Judah reng Amaziah chunga re atlo pha invakna hei kha akhenga Israel Renghei Thuhming Rabu a inzet a kae.

¹⁶Jehoas kha kathia renghei thlân Samaria a anleivûm, khana asapa Jeroboam II khan athlenga reng kachang jo.

¹⁷Israel Reng Jehoas in athisōa Judah reng Amaziah kha kum 15 lakahringa kae.

¹⁸Amaziah’n aleitlo ṭōn rakip Judah Renghei Thuhming Rabu a inzet a kae.

¹⁹Jerusalema Amaziah thatna sik lungthim anleimantluk, khava jâra ama’n Lachish khōpuia leikatlân, tâk-kha a’nrepui he’n anhei hnonga anvathat jo.

²⁰Akalōng kha shakor inkhat chunga Jerusalem katlunga anheirôn male, David khōpuia renghei thlâna anvûm.

²¹Judah mihe’n asapa kum 16 katluk jo, Uzziah kha reng anmanṭanga kae.

²²Uzziah’n apa thisō kahnunga Elath kha alo nôk a asyem manther nôk a kae.

²³Judah reng Joas sapa Amaziah’n vai arônna kum 15 tlukna Israel reng Jehoas sapa Jeroboam in Israel reng hongkachang, khana Samaria a kum 41 vai arôna kae.

²⁴Ama’n RŌNGPU kadōia setna atloa, Israelhei setna hlam leikakei Nebat sapa Jeroboam hlam aleijui.

²⁵Ama’n sak tinga Hamath Rakanna inphut thlang tinga Tuipui Kathi katlung, Israelhei ram aleikae rakip kha ator male heia kae. Hivahi Gath Hephera a ka-om Amittai sapa sânkathem Jonah hnenga Israelhei Pathen RŌNGPU’n intepna aleinei kha kae.

²⁶Israel mihei ṭit ka-om tak inrimna kha RŌNGPU’n aleihmu, anmani inthōpui sik tûte om mak hei.

²⁷Tâk-kha Israel kha ahei tik a manram cher sik khachu RŌNGPU manṭhatna changmak, khava jâra Reng Jeroboam II a inphut anmani ahuk hei.

²⁸Jeroboam II in aleitlo rakip khana ama’n ngarsōtak a re atukna, Damascus leh Hamath kha Israel a amanchun nôkna rakip Israel Renghei Thuhming Rabu a inzet a kae.

²⁹Jeroboam kha kathia renghei thlâna anvûm, khana asapa Zechariah’n athlenga reng kachanga kae.