Read Komrem RENGHEI INHNINA 15 Bible Online

RENGHEI INHNINA 15 - Komrem bible

RENGHEI INHNINA 15

¹Israel reng Jeroboam II khan kum 27 reng kachanga vai arôn lai, Amaziah sapa Uzziah’n akum 16 atluk a,

²Judah reng hongkachang, khana Jerusalema ama’n kum 52 vai aleirôn. Anu hi Jerusalema Jecoliah kae.

³Ama’n apa omchen amajôm a RŌNGPU tlaina ṭōn aleitlo.

⁴Tâk-kha ama’n limsyem kamukna hmun chu suk manhmang mak hei, khana mihe’n khava hmun a inthoi-insân leh bero rona antlo manjōm a kae.

⁵RŌNGPU’n Uzziah kha taksa kaphâr inhnaktak vânga avōk jo khavakha athi katlunga aravei jo. Ama kha a-inna khanga inkhum jo, asapa Jotham in ram kha vai arôn lai ama chu ṭōn rakip a inphut inhnga jo.

⁶Uzziah’n aleitlo rakip Judah Renghei Thuhming Rabu a inzet inhlut a kae.

⁷Uzziah kha kathia David khōpuia renghei thlânpuia anhre jo, khana asapa Jotham in apa kathlenga reng kachang.

⁸Judah Reng Uzziah’n kum 38 reng ahong changna, Jeroboam II sapa Zechariah’n Israel reng hongkachang, ama’n Samaria a thla 6 lim vai aleirôn.

⁹Ama’n amak hma hei kapōa RŌNGPU dōina setna aleitlo. Ama’n Israelhei setna hlam a ankaṭhōipa, Nebat sapa Reng Jeroboam, ṭhatmak omchen kha ajuia kae.

¹⁰Jabesh sapa Shallum in reng Zechariah dōina marûk a ṭōn amantluk a Ibleam hmun a athat jo, areng hmun athleng jo.

¹¹Zechariah ṭōntlo rakip Israel Renghei Thuhming Rabu a inzet inhlut a kae.

¹²Khava jâra RŌNGPU’n Reng Jehu hnenga ale’ntepna: “Nasōn-napâr he’n, khang 4 katlunga Israel reng hongkachang sik hei,” tina kha hui katlunga kae.

¹³Judah Reng Uzziah’n avai rônna kum 39 tlukna shunga, Jabesh sapa Shallum in Israelhei Reng hongkachang, khana ama Samaria a thla khat vai aleirôn.

¹⁴Gadi sapa Menahem kha Tirza inphut Samaria a kasea, Shallum kha avathat, khana areng hmun kha athleng jo.

¹⁵Shallum ṭōntlo rakip, ama thatna sik a lungthim tlona hei Israel Renghei Thuhming Rabu a inzet inhlut a kae.

¹⁶Menahem kha Tirza inphut ahei sōk pha Tappuah khōpui leh khana aka-om mihei khana akimvea ramṭhen rakip kha pui katluk a asuk manhmang jo hei, ajârchu ahnenga leihlut mak heia kae. Ama’n nuhmei a’nraihei rakip anvon atuk mazerpek heia kae.

¹⁷Judah Reng Uzziah’n avai rônna kum 39 atluk shunga, Gadi sapa Menahem in Israel reng hongkachang, khana ama Samaria a kum 10 vai aleirôn.

¹⁸Ama’n Pathen kadōia setna aleitlo, ajârchu Nebat sapa Reng Jeroboam, athimak hma seng Israel setna hlam a ankaṭhōipa omchen kaṭhamak kha ama hin athi katlunga ajuia kae.

¹⁹Tiglath Pileser, Assyria Reng kalenpen khan Israel chunga re aleitlo, khana Menahem in ram shunga aratha neina sik, ama hnōm pekna chenna sik a dangka kilograme 34,000 aleipek.

²⁰Menahem in khava sêr kha Israelhei kâra akahao akaneiheia inphut 50 sâm rumhrat a aṭheisōt a kae. Khan chu Tiglath Pileser kha aramting inle jo.

²¹Menahem ṭōntlo rakip Israel Renghei Thuhming Rabu a inzet inhlut a kae.

²²Ama kha kathia anhre jo, khana asapa Pekahiah in athlenga reng kachang jo.

²³Uzziah’n Judah vai arônna kum 50 tlukna, Menahem sapa Pekahiah in Israel reng hongkachang, Samaria a kum 2 reng leikachang.

²⁴Ama’n RŌNGPU dōina setna aleitlo, Israel setna hlam a ankaṭhōi Nebat sapa Jeroboam ṭhatmak omchen kha ajuia kae.

²⁵Pekahiah remihei rehlam kakei, Remaliah sapa Peka khan Gilead a mi 50 leh marûk a intluk heia Samaria innpui shunga rekur shunga Pekahiah kha ahlōa athat jo, ama’n reng hmun athleng jo.

²⁶Pekahiah ṭōntlo rakip Israel Renghei Thuhming Rabu shunga inzet a kae.

²⁷Judah Reng Uzziah vairôn kum 52 atluk pha, Remaliah sapa Pekahiah in Israel reng hongkachang, Samaria a kum 20 reng leikachang.

²⁸Ama’n RŌNGPU dōina setna aleitlo, Israelhei setna tinga ankaṭhōi Nebat sapa Reng Jeroboam kahnung ajuia kae.

²⁹Peka rengchang laia kae, Assyria reng kalenpa Tiglath Pileser in Ijon khōpuihei, Abel Beth Maacah, Janoa, Kedesh, khana Hazor khan chu Gilead ramṭhen, Galilee, khana Naphtali a mihei kha rekahringa asur heia Assyria ram a aṭhōi hei.

³⁰Judah Reng Uzziah sapa Jotham vairônna kum 20 atluk pha, Elah sapa Hoshea in Reng Peka kadōia marûk a amantluk a athat jo, areng hmun athleng jo.

³¹Peka ṭōntlo rakip Israel Renghei Thuhming Rabu a inzet a kae.

³²Israel Reng Remaliah sapa Peka vairôn kum 2 tlukna khan Uzziah sapa Jotham in akum 25 atluk pha,

³³Judah reng leikachang, Jerusalema kum 16 vai aleirôn. Ama anu kha Zadok sanu Jerusha kae.

³⁴Apa, Uzziah omchen kahnung ajuia Jotham, RŌNGPU tlaina ṭōn aleitloa kae.

³⁵Tâk-kha ama’n limsyem kamukna hmunhei leisukset mak, khana mihei khan inthoina bero rona ṭōn khanga anleitlo ṭhak a kae. Jotham in Bek-inn Sak tinga Kekot kha asyemsōt a kae.

³⁶Jotham ṭōntlo rakip Judah Renghei Thuhming Rabu shunga inzet a kae.

³⁷Ama reng changlai hin RŌNGPU’n ahma inkeia Syria reng Rezin leh Israel reng Peka kha Judah re kasō sik a aleitir heia kae.

³⁸Jotham kathia David khōpui kalena renghei thlânpuia anhre jo, khana asapa Ahaz in akahlâng athlenga reng kachang jo.