Read Komrem RENGHEI INHNINA 16 Bible Online

RENGHEI INHNINA 16 - Komrem bible

RENGHEI INHNINA 16

¹Israel Reng Remaliah sapa Peka vairôn kum 17 atluk pha, Jotham sapa Ahaz in kum 20 ajōng tluk pha,

²Judah reng hongkachang, khana ama Jerusalema kum 16 vai arôn. Ama’n apu Reng David omchen juimak a, khava kanek a RŌNGPU apathen malung tlai makna ṭōn atloa,

³Israel renghei omchen ajuia kae. Israelhei anhonghlut bia RŌNGPU’n ahnong sōt mihei omchen amajôm a, asapatak kha limsyem hnenga inthoina aneia, ro-inthôi tōksōtna aneia kae, khava mater ka-om tak omchen kha Israel he’n hmating re annam pha RŌNGPU’n ram a inphut ahnong sōt mihei chônngai kha antalo kae.

⁴Jât-hlop hei kamukna hmebunga, thing daihlim rakip thōia, Ahaz in inthoina leh bero ro mankhutna atloa kae.

⁵Syria Reng Rezin leh Israel Reng Peka he’n Jerusalem anbuhlua ankakekhum, tâk-kha Ahaz chu leitor mak hei.

⁶(Hiva phatak a, Edom rengpa’n, Elath khōpui kha avea achen nôk a, khana aleika-om Judah mihei seng ahnong sōt heia kae. Edom mihei khō katla heia, tuning katlung laka-om hei.)

⁷Ahaz in Syria reng kalenpa Tiglath Pileser hnenga hiva ṭong hi leh inṭhōia mi atir hei, “Kei hi naṭong kajui nasōk eng kae. Ani kabuhlu Syria leh Israel reng heia inphut, nang hong inna, ajōng huksōt roh.”

⁸Ahaz in Bek-inna leh reng-innpui karōi dana inphut sana leh dangkahei aloa rengkalen hneng kutchoia amanrôn jo hei.

⁹Tiglath Pileser in Ahaz ngekna kha ahnōm pek a, aremihei leh Damascus a re kakōn heia, anhlō jo, Reng Rezin athat a khana mihei kha rehring sura Kir a ankei heia akhum jo hei.

¹⁰Reng Ahaz in Tiglath Pileser Reng kalenpa inhmupui sik a Damascus a vakase, ama’n maichâm inkhat avahmu khana khava kapōhrep lim inkhat, a-omje rakip kha inchêntak a Uriah thempu hnenga ṭong ahei manrôna kae.

¹¹Khava jâra Uriah khan khava kapō maichâm inkhat asak jo, khana Ahaz ahong inle mak hma aleisyem sō jo.

¹²Damascus a inphut Ahaz ahong inle pha maichâm alei insyemsō kha ahmu jo,

¹³khan chu ama’n khava chunga ranhring inthoina leh hmuchi tōkna anei jo, khana vomhrui theiju inthoina, inlôikhômna inthoina thisen sunna anei jo.

¹⁴Sum-êng maichâm RŌNGPU hnenga a’ntōksōt kha Bek-inn leh maichâm ather kâra ka-om, khava jâra Ahaz in khavakha amaichâm ther sak intongting athonsōt jo.

¹⁵Khava pha ama’n Uriah hneng ṭong apek, “Hiva kei maichâm kalen hi jîngkâr ro-inthoina leh khōhlei hmuchi inthoina hmang roh, rengpa leh mipuihei ro-inthoina leh hmuchi inthoina sik khana mipuihei ju inthoina sik a hmang roh. Tâk-kha sum-êng maichâm khachu kei tlâ sânna sik a da roh,” ati.

¹⁶Reng ṭongpek dungjuia Uriah khan atloa kae.

¹⁷Reng Ahaz in, Bek-inn shunga a’nhmang sum-êng gârihei alosōt a achunga be aka-om hei kha athonsōt hei; khan chu sum-êng sehratche 12 chunga tuikông intung alosōt a hlung chunga amatung jo.

¹⁸Assyria rengkalen malung tlaina sik a, Ahaz in Bek-inna reng in-ongna matungna hmun a thingpek kha alosōt a reng in abinga Bek-inna ahlutna kot kha akhârna joa kae.

¹⁹Ahaz ṭōntlo rakip Judah Renghei Thuhming Rabu shunga inzet a kae.

²⁰Ahaz kha kathia David khōpui kalena reng thlânpuia anhre, khana asapa Hezekiah in athlenga reng kachanga kae.