Read Komrem RENGHEI INHNINA 17 Bible Online

RENGHEI INHNINA 17 - Komrem bible

RENGHEI INHNINA 17

¹Judah Reng Ahaz vai rôna kum 12 tlukna, Elah sapa Hoshea in Israel reng hongkachang, ama Samaria a kum 9 vai arôn.

²Ama’n RŌNGPU kadōia setna atlo, tâk-kha ama mak hma Israel vaikarônhei kapōtak a chu changmak.

³Assyria Rengkalen Shalmaneser in achunga re aleisō; ama’n Shalmaneser hnenga kahlut, akumtina ramsêrṭhei apek a kae.

⁴Tâk-kha kum khat chu Hoshea’n Egypt rengpa So hnenga mi atira, inthōpuina aleider, Assyria hnenga akumtina ramsêrṭhei pek bângna sik a aleitlo. Shalmaneser in hiva ṭong hi athei pha, ama’n Hoshea kha asura akhum jo.

⁵Khava sōa Shalmaneser in Israel re asōa Samaria khōpui kha akake khum jo. Kum 3 akake khum shunga,

⁶Hoshea vairôn kum 9 tlukna, Assyria rengkalen khan Samaria kha ahlō jo, Israelhei kha Assyria ting rehringa ankei hei, khana ṭhahrep chu Hala khōpuia, ṭhahrep Gozan ramkeia Habor tuidung hneng, khana ṭhahrep in Media khōpui shunga khō amantlâk jo hei.

⁷Samaria khōpui katlu, ajârchu Israel sahe’n Egypt rengpa inphut ankahuksōt leh Egypt a inphut anhei kaṭhōisōt RŌNGPU an-Pathen dōina setna antloa kae. Anmani’n Pathen ralak ankamuk hei,

⁸ami he’n hmating re anheinam pha RŌNGPU’n ahnong sōt pek mihei omchen kha anjuia, Israel renghei sedân chôndân kha anhmanga kae.

⁹RŌNGPU an-Pathen tahnōm mak ṭōnhei seng Israel he’n anleitloa kae. Anmani’n khō kasina inphut khō kalen rakip a jât-hlop hei kamukna hmun anleisyem heia kae.

¹⁰Anmani’n hmebung rakip leh thingkung daihlim rakip a hlung kachohei khana Asherah pathennu limsyem anmatunga kae,

¹¹khana anmani’n jât-hlop hei maichâm rakip a bero anro, RŌNGPU’n ram a inphut ahnong sōt hei omchen kha anjuia kae. Anmani omchen kaṭhamak seng khan RŌNGPU hnuknat kha anmathok pek

¹²khana RŌNGPU’n ṭongpekna, limsyem kamuk mak ruh ti kha leijui mak hei.

¹³RŌNGPU’n asânkathemhei leh aṭongkarônhei Israel leh Judah hei kagîk sik a ajōngtir, “Nan-omchen kadikmak hlam hro bâng ruh, khana Nanpa-nanpuhei hneng kaleipek Dânrabu shunga aka-om, khava nôk kha kasōk sânkathemhei vânga nanhnenga kajōng mathlung, kaṭong pek kha jui ruh!” ati.

¹⁴Tâk-kha anmani’n aṭong juidek mak hei, anmani RŌNGPU an-Pathen akataksenmak, anpu anpahei kapōa anracham kase.

¹⁵Ama mansena ṭong juihnōm mak hei, anpu anpahei leh ama ṭong intepna kha juimak hei, khana ama gîkna hei kha anmani’n heitea teimak hei. Akahnem mak limsyem ankamuk, anbibinga hnemna kase kachang hei, khana RŌNGPU’n ankimvea jât-hlop hei omchen anmanchu makna sik a ṭong apek hei kha juimak heia, anmani’n jât-hlop hei omchen jôk anjuia kae.

¹⁶Anmani’n RŌNGPU an-Pathen dân rakip ansukkhōi khana kamuk sik sum-êng sehratche 2 ansyem; khana Asherah pathennu limsyem um ansyem, ârsihei ankamuk, khana Baal pathen anrazen.

¹⁷Anmani’n ansapa ansanuhei jât-hlop pathen hnenga ro-inthoina annei hei; khana rahmang kasânhei leh tla kasânhei dertōna annei hei, RŌNGPU hmit-hmua ṭōnse tlona katluk a inpesōt jo hei, ahnuk anmannat pek jo.

¹⁸RŌNGPU kha Israel chunga ahnuk kana, ahmai kunga inphut hmunhlop a ahnong sōt jo hei, Judah rengram rōk aṭhen a kae.

¹⁹Khana Judah mipui he’num RŌNGPU an-Pathen dânhei kha juimak hei; Israelhei chôndân jui kha anmani’n anmanchua kae.

²⁰RŌNGPU’n Israelhei seng kha hnōm mak jo hei, karâkna apek hei, êngkase inrepuihei kut a apek sōt hei, achaina chu ahmai kunga inphut ahnong sōt jo hei.

²¹RŌNGPU’n Israelhei kha Judah inphut aṭhensōt hei pha, Israel he’n Nebat sapa Jeroboam kha anreng anmanchang. Jeroboam in RŌNGPU kha amandahlon jo hei, setna inhnaktak tlonating aching jo hei.

²²Anmani’n Jeroboam anjuia ama setna tlo rakip kha antloṭhak joa kae.

²³Achaina chu RŌNGPU’n atlo sik seng kha, asōk sânkathemhei vânga aleigîk dek hei kapōa, ahmai kunga inphut ahnong sōt jo hei. Khava jâra Israel mipuihei kha Assyria ting rekahringa ankei jo hei, khana khan tuning katlung laka-om hei.

²⁴Assyria rengkalen in, Babylon, Kuth, Ivva, Hamath, khana Sepharvaim khōpui heia inphut mi aṭhōi heia Samaria khan rehring sur Israelhei kahlang kathlenga khō amanhlō jo hei. Anmani’n khōpuihei hi anhlō jo heia khana khan ka-om jo hei.

²⁵Anmani khana khan an-ombia khan RŌNGPU kha leikamuk mak hei, khava jâra ama’n shabakkaihei atir, mi ṭhahrep anthasōt hei.

²⁶Assyria rengkalen hneng, ama’n Samaria khōpuia aman om mihei khan khava ram pathen kamuk dân manhret mak hei, khava jâra RŌNGPU’n shabakkai ahei tir heia anmani amanthat hei kae, tia anhri pek.

²⁷Khava jâra rengkalen khan ṭong apek hei: “Eini’n rehringa niheiṭhōi hei kâra anthempu inkhat tir male ruh, sova ram a pathen dân kha mipui inthei sik a sona son va-om rasoh.”

²⁸Khava jâra Samaria inphut rehringa antakei Israel thempu inkhat kasea Bethel a vaka-om jo, RŌNGPU kamuk sik dân amanthei hei.

²⁹Achang ravâng Samaria ka-om hei khan anbinga lim ansyem manjôn ṭhak a kae, khahei kha Israelhei kamukna hmun syemsa heia anda heia kae. Rup hlop-hlop et in an-omna khōpui heia, lim ansyem et hei:

³⁰Babylon he’n Sukkoth Benoth inti pathen lim ansyem; Kuth he’n Nergal lim ansyem; Hamath he’n Ashima lim ansyem;

³¹Ivva he’n Nibhaz leh Tartak lim ansyem; khana Sepharvaim he’n an-pathen Adrammelech leh Anammelech hneng ansahei ro-inthoina annei hei.

³²Hiva mihei hin RŌNGPU kha’m ankamuk khana limsyem kamukna hmun inzen sik a thempu ankadei khana inthoina tōkna anneia kae.

³³Khang’khan RŌNGPU kha ankamuk, khan chu anmani anhongna ram pathenhei, andân dungjuia ankamuksa heia kae.

³⁴Tuning katlung an-omchen marō kha anlatlo ṭhak a kae. Anmani’n RŌNGPU kha kamuk mak hei, khan chu ama’n Israel tia rahming aleiphō Jacob sōn leh pârhei hnenga aṭongpek-hei kha’m juimak hei.

³⁵RŌNGPU’n anmani leh intepna inkhat asyem khana ṭong hinga apek hei, “Pathen hlop kamuk mak hei ruh, anhma inkun mak ruh, razen mak hei ruh, khana inthoina tōkmak ruh.

³⁶Nangni’n Egypt a inphut invak leh kahrattak a nanhei kaṭhōisōt RŌNGPU, kei nantajui sik eng kae; nangni kei hneng a’nkun sik chei, khana inthoina nantatōk sik kae.

³⁷Ke’n nangni sik a kaleimazet dânhei leh kaṭong pek hei kha ahei tik a nantajui sik kae. Nangni pathen lak-hei nanta juimak sik kae,

³⁸khana nangni leh intepna kasyem kha nantamahngi mak sik kae.

³⁹Nangni’n RŌNGPU nan-Pathen, kei ṭong nantajui sik kae khana ke’n nan-indōipui heia inphut kahuksōt sik chei kae.”

⁴⁰Tâk-kha khava mihei khan aṭong rangei mak hei, khana an-omchen marō kha khanga anjuiṭhak a kae.

⁴¹Khava jâra mihei khan RŌNGPU kha anleikamuk, tâk-kha anmani limhei kha’m ankamuksa; tuning katlung khana antu-ansa he’n khang’khan anlatlo ṭhak a kae.