Read Komrem RENGHEI INHNINA 18 Bible Online

RENGHEI INHNINA 18 - Komrem bible

RENGHEI INHNINA 18

¹Israel reng Elah sapa Hoshea vairôn kum 3 tlukna Ahaz sapa Hezekiah’n Judah reng kachang,

²akum 25 leikae, khana Jerusalema kum 25 reng kachanga vai aleirôn. Anu chu Zechariah sanu Abijah kae.

³Ama’n apusōn reng David kapōa RŌNGPU tlaina ṭōn aleitloa kae.

⁴Ama’n jât-hlop hei limsyem kamukna hmunhei aleisukset hei, hlung kachohei anvōkkhōi hei, Asherah pathen limsyem anvōkkhōi. Moses taleisyem Nehushtan inti sum-êng mari kha aher-ahak a aleivōk-khōi. Khava pha katlunga Israel mihe’n limsyem kajana bero anleiro ria kae.

⁵Hezekiah’n Israelhei Pathen RŌNGPU kha ataksen; ama mak hma’m khana akahnung a’m ama kapō reng Judah’n neimak a kae.

⁶Ama’n RŌNGPU kha ataksen hêr khana aṭong juilo leitlo hêrmak, tâk RŌNGPU’n Moses hneng aleipek ṭongpek rakip inrintak a aleijui.

⁷Khava jâra RŌNGPU’n ama a-ompui khana atlona rakip a chung sōkna anei. Ama’n Assyria reng chunga re adōi khana athōia om sik hnōm mak a kae.

⁸Ama’n Philistihei ator hei, khana an-omna, khō kasintek a inphut khō kalen katlung, Gaza leh khava kimvea ka-om ramkei hei re asō hei.

⁹Hezekiah vairôn kum 4 tlukna, Reng Hoshea’n Israel chunga vai arônna kum 7 tlukna Assyria rengkalen Shalmaneser in Israel chunga re aleitloa Samaria akekhum jo.

¹⁰Kum 3 akekhum sōa Samaria kha katlu jo; hivahi Hezekiah vairôn kum 6 tlukna khana Hoshea varôn kum 9 tlukna kha kae.

¹¹Assyria rengkalen in Israelhei kha rehringa asur heia Assyria katlunga aṭhōi hei, khana ṭhahrep chu Hala khōpuia, ṭhahrep in Gozan ramṭhen a Habor Tuidung hneng, ṭhahrep in Media khōpui heia ka-om hei.

¹²Samaria katlu jo ajârchu Israel mihe’n an-Pathen RŌNGPU ṭongpek juimak hei, tâk-kha anmani leh intepna aleisyem kha anvōkkhōi khana RŌNGPU sōkpa Moses hneng aleipek dân rakip kha juimak heia kae. Anmani’n rangei mak hei khana juimak heia kae.

¹³Reng Hezekiah vairôn kum 14 tlukna, Assyria rengkalen Sennacherib in rekur a’ntuk-khum Judah khōpui heia re asōa ahlō jo hei.

¹⁴Hezekiah’n Lachish a ka-om Assyria rengpa hneng ṭong amanrôn: “Kei dikmak kaleitlo jo; lungsettak a nabuhluna hi hai roh, khana nang in nahri rakip kapek sik che.” Rengkalen masônna khachu Hezekiah’n dangka kilograme 10,000 khana sana kilograme 1,000 ahei pek sik kha kae.

¹⁵Hezekiah’n a Bek-inna leh reng-innpuia ka-om dangkahei akhenga atir jo;

¹⁶Bek-inn kot khâr kunga leh kacho heia ama khet in akatōmna sanahei kha akhoksōt hei, akhenga Sennacherib hneng atir jo.

¹⁷Assyria rengkalen in Lachish a inphut remi katamtak Jerusalema Hezekiah kabuhlu sik a atir hei; ama vaikarôn kalenpen 3 he’n hlam amankei hei. Anmani Jerusalem anheitlung pha tlânga tuikhura inphut tui heilōng inthlana tuikōk hnenga, pōn kasyem hei ṭōn tlona hlamlen kha anhlōa ka-om hei.

¹⁸Anmani’n Reng Hezekiah kabek sik a mi antir hei, anmani intōpui sik a reng ṭōnpui karôn 3 kasōksōt hei: reng-innpui katinta Hilkiah sapa Eliakim; inlôikhômna lekha inzet inhlut, Shebna; khana heirakip thuhming inzet inhlut hei ka-ensui Joa sapa Asaph hiseng.

¹⁹Assyria ṭōnkarôn inkhat in anhnenga Hezekiah rengpa hi hei-inmo inngamna amannei ti hi rengkalen in amanhret hnōm tia ahri pek hei.

²⁰Ama’n ader hei, “Remi themna leh ratha neina hi ṭong rōk in athleng tor tia nantamandon mo? Assyriahei chunga re dōina kha tu’n mo abôm sik chei tia nantamandon?

²¹Nangni’n nankabôm sik a Egypt nan-inngampui, tâk ama chu pengkung khōnghrea hmang kapō kha ka-ang sik, khavakha katlek sik a kha nankut asun kathe sik. Ama hnenga mi inkhat a’nngai pha Egypt rengpa khachu khang hrep a akachang ri kae.”

²²Assyria hlamkakei pa’n ahrisa nôk, “Khana RŌNGPU nan-Pathen chunga nan-in ngaina kha nanta hripek sik eng mo? Jerusalem maichâm rōk a kamukna nei sik kae tia Hezekiah’n amanthei hei pha, Judah ram a aleisukkhōi rakip hei kha RŌNGPU kamukna leh maichâmhei kae.

²³Rengkalen rahminga nangni in-erpuina kanei sik chei. Nankâra shakor katôr thei mi nan-om inchu ke’n shakor 2,000 kapek sik chei!

²⁴Assyria ṭōnkarôn akatlasam pen kapha in-erpui tor mak tin chei, kha’num Egypt in shakor leh gâri anheitir sik a la’nngam chei!

²⁵RŌNGPU inthōpuina inveiloa nanrama hin re kahongsōa kasuk manhmang kae tia nantamandon mo? RŌNGPU khet in re tlona sik leh suk manhmangna sik a amanthei eng kae.”

²⁶Khava sōa Eliakim, Shebna khana Joa’n, ṭōnkarônpa hneng anmanthei, “Oja, Aramaic ṭonga ahri pek roh. Keini’n kanmanhret. Hebrew ṭonga ahri pek mak roh; bang chunga aka-om mi rakip in anrangeia kae.”

²⁷Ama’n amasôn hei. “Reng leh nangni kâra rōk a ṭong akahri sik a rengkalen in kei hi ahei tir eng tia nantamandon mo? Changmak, ke’n rape chunga a’n-ong, nangni leh inṭhōia an-êk kasâk sik leh anmajun ka-in sik hei hneng um hivahi kahri kae.”

²⁸Khava sōa ṭōnkarônpa khan kangirsōt a Hebrew ṭonga ka-ônga ahri, “Assyria rengkalen in nanhnenga ahri hi rangei ruh.

²⁹Hezekiah’n ahōn makna sik chei agîk chei kae. Hezekiah’n nangni huk tor mak tin chei.

³⁰RŌNGPU hnenga inngamna neina sik a jôrmak chei rasoh. RŌNGPU’n nangni ahuk sik chei tia khana Assyria remi he’n nankhōpui hlōna chunga ating sik hei ti hi mandon mak ruh.

³¹Hezekiah ṭonghri rangei mak ruh. Assyria rengkalen in khōpuia inphut heisōk una ahnenga heihlut ruh ati. Nanvomhrui theikunga inphut vomhrui nansâk thei sik, khana theipōng kunga inphut theipōng kara nansâk thei sik, nantuikhur heia inphut tui nan-inthei sik.

³²Rengkalen khan nanram kapōzek ram inkhat a khō amanchōn mak lai seng chei, vomhrui ju anikapek sik vomhrui rahōn leh buhlom syemna sik hmuchi a-om mak lai seng; khavakha olive kekna, olive thai leh khōihning tamna ram kae. Aṭongpek chei kha nanjui inchu thimak tin, tâk-kha kahring sik chei. RŌNGPU’n ahuk sik chei tia Hezekiah’n akamoa syem mak chei rasoh.

³³Jât ralak-hei pathen he’n anram kha Assyria rengkalen kut a inphut antahuksōt tor joa mo?

³⁴Hamath leh Arpad pathenhei kha khon mo aka-om jo hei? Sepharvaim a, Hena, leh Ivva khon mo ka-om hei? Samaria kha tu mo inkhat in ahuk tor a mo?

³⁵Hei pha khan mo hiva ram a pathen he’n anramhei kha kan-Rengkalen kut a inphut antahuktor jo? Khan chu hei-inmo RŌNGPU’n Jerusalem kha ahuk tor sik tia nantamandon?”

³⁶Reng Hezekiah’n ahnenga aleimanthei hei kapōa, anmani sip katia ka-om jo hei, ṭong inkhatbek um hrisōt mak hei.

³⁷Khava sōa Eliakim, Shebna, khana Joa he’n anmalung inrim reia anpōn ankeihlera kasesōt jo hei, Assyria ṭōnkarônpa ṭonghri kha rengpa hneng anvamanthei jo.