Read Komrem RENGHEI INHNINA 19 Bible Online

RENGHEI INHNINA 19 - Komrem bible

RENGHEI INHNINA 19

¹Rn Hezekiah’n anṭong kha atheisō lim a inrim reia apōn akeihler, borapōn a’nsi, RŌNGPU Bek-inna kase jo.

²Ama’n reng-innpui katinta Eliakim leh inlôikhômna ṭong inzet Shebna, khana thempu upahei kha Amoz sapa sânkathem Isaiah hneng atir hei. Anmani um borapōn an-insia kae.

³Isaiah hneng antahri sik a amanthei hei kha hi kae: “Tuning hi inrengna kani kae; eini hi karâkna leh hmaimôkna anpek jo me. Eini hi nupui nai kanei sik inkhat, tâk-kha ratha aneihêr mak jâra sa anei tor mak kapō jo me kae.

⁴Assyria reng kalenpa’n akahring Pathen tuitek kasō sik a aṭōn karônpen kha ahei tir jo. RŌNGPU na-Pathen khan tuitek sōna ṭong hi thei rasoh khana akahri hei kha karâk hei rasoh. Khava jâra nimi alakahring hei sik a Pathen hneng der roh.”

⁵Reng Hezekiah ṭong manrôn kha Isaiah’n athei pha,

⁶hiva ṭong masônna hi ahei tir male, “RŌNGPU’n ahuk tor mak chei ning tia Assyria he’n maṭhitmak chei rasoh tia ama’n ahri.

⁷RŌNGPU’n reng kalenpa kha ṭong inthang inkhat amanthei sik, aramting amanle sik, khana RŌNGPU’n ama athat sik jo,” ati.

⁸Assyria ṭōnpui karônpa’n reng kalenpa kha Lachish adahlona anhnenga ka-om Libnah khōpui dōina re atuk jo ti ṭong hi atheia, inbekpui sik a ahnenga vakase.

⁹Ethiopia Rengpa Tirhakah in Egypt remi ahei thōia anmani re kasō sik kahong jo ti ṭong hi Assyriahei hneng leikatlung jo. Rengkalen khan hiva ṭong hi athei pha ama’n chithi inkhat Judah Reng Hezekiah hneng amanrôn

¹⁰hing’hin ahri, “Nang in nataksen na-Pathen khan nang kha kei kut a tlûmak tin che atipek jo che, tâk-kha khava khan nang hōnmathlâk mak che rasoh.

¹¹Assyria Reng kalenpa’n sukset sik ati ramhei chunga aṭōntlo kha natheisa jo kae. Nang akatlânsōt tor sik chea a’ndon che mo?

¹²Kapa-kapu he’n, Gozan, Haran, khana Rezeph khōpui anleisukset, Telassar a ka-om Betheden mi anleithat hei, an-pathen inkhatbek inum huk tor mak hei.

¹³Hamath, Arpad, Sepharvaim, Hena khana Ivva khōpui kalenhei renghei kha kho jo heihmen?”

¹⁴Reng Hezekiah khan chithi kha ahei karôn heia inphut aloa atei. Khava sōa ama Bek-inna kasea, chithi kha RŌNGPU hma ada a,

¹⁵derna anei, “O RŌNGPU, Israelhei Pathen, ranhring mathla kaneihei chunga reng in-ongna kaneipa, nang rōk vânhnōi rengram rakip chunga vaikarôn Pathen che kae. Nang in ralei leh marvân nasyema kae.

¹⁶Tûn, RŌNGPU, kanchunga heimo akasōk hi enroh. Nang tuitek sena Sennacherib in ahri hei seng hi akahring Pathen, rangei roh.

¹⁷RŌNGPU, keini kankhenga kanmanhret, ti chu Assyria reng kalenpa’n jât katamtak asukset a anramhei amandahlon jo hei,

¹⁸khana pathen akachang hêrmak, mihring kut a ansyem thing leh hlung limhei kha hmei vânga aro pek jo hei.

¹⁹Tûn, RŌNGPU kan-Pathen, vânhnōia jât rakip in nang rōk RŌNGPU Pathen che kae tia anmanhretna sik a, Assyrianheia inphut keini ahuksōt roh.”

²⁰Khava sōa Isaiah in Reng Hezekiah hnenga mantheina ṭong inkhat aleitir, khachu rengpa derna masônna

²¹RŌNGPU’n ahri, “Jerusalem khōpui in, Sennacherib nang amanuisō che, khana heitea teimak che.

²²Nang in nahnōise leh nahmu masi hi tu mo kae tia namandon? Nang in Israel Pathen intheng kei nakaja mak eng kae.

²³Nang in, Lebanon tlâng inshângpen kha nagârihei seng vâng nator hei tia naṭong karôn inkhat nahei tira kei hneng inlensakna namalâra kae. Nang inlensak chea cedar thingkung inshângpen leh Cypress thing kaṭhapen naphûr mathlûk heia ratu inthûkpen nava phâk tor hei tia nahri.

²⁴Nang inlensak chea miram a tuikhur nakhōra tui na-in, khana nasepai he’n Nile Tuidung kachârbera anke vâng anchōn rachi nati.

²⁵“Hivahei seng hi hmalaia inphut kaleimantluk jo kae ti hi theiphung mak che mo? Tûnhin khavakha katlosōt kae. Ke’n nang khōpui kalen kur kahnet hei kha sukkhōi heia akabōk manbuk kapō manchangna sik a ratha kapek che kae.

²⁶Khava hmun a aka-om mihei kha ratha neimak hei, anmani ṭit-inpirna anneia ka-îng jo hei. Anmani kha nisō thli ahong hrâng pha hleipuk a phi kapō khana innphu chunga kakek kahar ka-ang jo hei.

²⁷“Kha’num, nang in heimo natlo, Khon mo akase che, nachungchânga heirakip kaman hretsō che. Nang in kei chunga heituk nahnuk akana mo kamanhret.

²⁸Khava nahnuk akana leh na-inlensakna kha ṭong kalei thei jo, tûnchu ke’n nahnar kavit a kōikim kamakhei sik, nabeia sekamhrui kamando sik, naheihro hlam a khan kakei male sik che,” ati.

²⁹Khava sōa Isaiah in Reng Hezekiah hneng ahri, “Hivahi ahong kasōk sik omchen chîkna inkhat kae. Tûnkum leh abân kum a, ramhânga kakek hmuchi rōk nansâk sik, tâk-kha khava bânna kum a chu nanhmuchi nanvor thei sik, khana kara nankhôm thei sik, vomhrui nanling leh kara nansâk sik.

³⁰Judah ram a alakahring hei kha thingkung rajung inthûktak a kathō akara inra kapōa hong kakhang sik hei.

³¹Jerusalem leh Zion Tlânga akahring mi ka-om sik hei, ajârchu RŌNGPU’n khanga akasōk sik kha amadua kae.

³²“Hivahi RŌNGPU’n Assyria rengkalen chungchânga ahri kha kae: “Ama hiva khōpui kalena hlutmak ning, khana hiva dōina the sangkhat bek kâpsōt mak ning, khōpui hnenga remi inkhatbek aphō achem leh hongmak ning, khana kekhumna manhretna akimvea pi bung deng mak hei ning.

³³Ama hiva khōpui shunga hlut loa ahongna hlam a khan akahnung inle sik. RŌNGPU ke’n kahri jo kae.

³⁴Ke’n khōpui kalen hi, kei rahming kajana sik leh kasōk David hnenga ṭong kale’ntepna jâra khan kaka-unsia kahuk sik kae.”

³⁵Khava jân a khan RŌNGPU ngeva inkhat Assyria rephōra kasea remi 1,85,000 avathat jo hei. Ajînga khō ahong vâr pha anmani ankhenga leikathi heia inthlong jo hei.

³⁶Khava sōa, Assyria rengkalen Sennacherib kha Nineveh ting inle jo.

³⁷Ni khat chu, apathen Nisrokh bek-inna kamukna aneilai, asa pase 2, Adrammelech leh Sharezer in anchemjâm vâng antuk hlona anthat jo, Ararat ramting katlânsōt jo hei. Asapa hlop inkhat Esarhaddon in rengkalen changna kha athleng jo.