Read Komrem RENGHEI INHNINA 2 Bible Online

RENGHEI INHNINA 2 - Komrem bible

RENGHEI INHNINA 2

¹RŌNGPU’n Elijah kha marvânting thlisip vânga aṭhōisōt sik kani kha kahong jo. Elijah khana Elisha kha Gal a inphut leikasōk hei

²hlam a khanga anselai Elijah’n Elisha hneng ahri, “Tûn hivahin inhnga jo roh; RŌNGPU’n Bethel a sena sik ṭong apek jo eng.” Elisha’n amasôn, “Akahring ṭhak RŌNGPU leh nang rangei manlûrna chei jâra intep eng, nang dahlon mak che ning.” Khang’khan Bethel katlunga kase jo hei.

³Khana aka-om sânkathem rup khat Elisha hneng kase heia anleider, “Nakapu hi tuning RŌNGPU’n aṭhōisōt sik jo kae ti hi nang namanhret mo?” anti. Elisha’n amasôn heia, “Ôk, kamanhret. Tâk-kha khava chungchânga inbek mak rih,” ati.

⁴Khava pha Elijah’n Elisha hneng ahri, “Tûnchu nang hin leiom jo roh. RŌNGPU’n Jerichoa sena sik ṭong apek jo eng,” ati. Tâk-kha Elisha’n amasôn, “Akahring RŌNGPU leh nang chunga rangei manlûrna chei jâra intep eng, nang masō mak che ning,” ati. Khava jâra Jericho ting kase jo heia kae.

⁵Khava hmun a aleika-om sânkathem rup khat kahong heia Elisha hneng anleider, “Nakapu hi tuning RŌNGPU’n aṭhōitou sik kae ti hi namanhret mo?” Elisha’n amasôn heia, “Ôk, kamanhret. Tâk-kha khava chungchânga inbek mak rih,” ati.

⁶Hivasōa Elijah’n Elisha hneng ahri, “Tûnchu hivahin leiom jo roh, RŌNGPU’n Jordan tuidunga sena sik ṭong apek jo eng.” Tâk-kha Elisha’n amasôn, “Akahring RŌNGPU leh nang rangei manlûrna jâra intep eng, nasōk ke’n masō mak che ning.” Khang’khan anmani khanga kase jo hei,

⁷khana sânkathem 50 he’n Jordan katlung anjui hei. Elijah leh Elisha kha tuidung panga le’nhnga hei, khana sânkathem 50 hei khan bongkhat inkâra kangir hei.

⁸Khava sōa Elijah’n a zakkō inse kha alosōt a akaje jo, khan vâng khan tui kha avōk a lang hnia inthensōt jo, khana ama leh Elisha kha kachârbera tuidung rekhat ting anrakan jo.

⁹Khana khan, Elijah’n Elisha hneng ahri, “Kei hi ṭhōitoua ka-om mak hma hin nang in namantlo hnōm eng heimo ka-om hri jo roh.” Elisha’n amasôn, “Ke’n nakahlang kathleng torna sik nang ratha neina kha chenna nei rong.”

¹⁰Elijah’n amasôn, “Khava khachu akabei mak ngekna kae. Tâk-kha kei ṭhōitoua ka-om pha nang in nahmu tor eng inchu nachentor sik; nang in nahmu tor mak eng inchu chentor mak tin che.”

¹¹Khanga anselai inbek heia kae; manhret manloa shakorhei takei hmei gâri inkhat in ankâra jōng kaṭum jo, khana Elijah kha thlisip in aṭhōitou jo.

¹²Elisha’n khavakha ahmua Elijah abek a “Apa, apa! Torna kanei Israelhei kahrungpa! Nang kase jo che!” Khana ama’n Elijah kha avea hmu nôk mak joa kae. Inrimtak a Elisha’n azakkō inse kha hêr hnia akei hlera kae.

¹³Khava sōa Elijah hnenga inphut ajōng inhlik sōt zakkō inse kha ahrut a inle jo khana Jordan tuidung panga kangir jo.

¹⁴Elijah zakkō inse vânga khan tuia avōk a ahri, “Elijah Pathen, RŌNGPU kha khon mo ka-om jo?” Khava sōa vōi khat nôk tuia zakkō vâng khan avōk pha tui kha alang inhnia inṭhensōt jo, khana ama kha rekhat ting kase joa kae.

¹⁵Jerichoa sânkathem 50 hei kha ama anhmu pha anti, “Elijah ratha neina kha Elisha hnenga kachu jo!” Anmani ama inhmupui sik a leikase hei, ahmai kunga inkun jo hei,

¹⁶khana anmani’n anti, “Keini ratha kahrat rōk pase 50 ka-om ung. Eini se me sona, na-oja kha vajong rih. RŌNGPU rathla’n aṭhōia hmebunga achangmak leh phaicham inkhat a aleidahlon um aya.” Elisha’n amasôn hei, “Changmak, nangni vase hêrmak ruh.”

¹⁷Tâk-kha ama’n ahnōm mak lai seng ankahnot a amanse jo hei. Mi 50 hei khan kase heia ram inshângna leh inhnemna rakip a ni 3 kahlut a anvajong jo, tâk-kha hmutor mak heia kae.

¹⁸Hivasōa Jerichoa anmani leikahngâk a ka-om Elisha hnenga hong inle hei, ama’n anhnenga ahri, “Ke’n vase mak ruh leitimak chei eng mo?”

¹⁹Jerichoa ka-om mi ṭhahrep in Elisha hneng kase heia anhri, “Nang inchu namanhretsa kapōa, oja, hiva khōpui hi akaṭhatak inkhat kae, tâk tui hi ṭhamak naite insetsō bât heia kae.”

²⁰Ama’n ṭong apek heia, “Bephu ther inkhat a chi ajing thōn una heichoi ruh.” Anmani’n khavakha anheichoi,

²¹khana ama’n tuiripût hmun a khan vakasea chi kha amathlâk a ahri, “RŌNGPU ṭonghri kha hi kae: ‘Ke’n tui hi kaman theng jo, thi leh nat khana naidông insetna masōk mak jo ning.’”

²²Khana inphut tui kha Elisha’n ahri kapōa intheng jo.

²³Elisha’n Jericho adahlona Bethel a sik kase jo, khana hlamdunga khōpuia naipang ṭhahrep heikasōk heia anleidei kathok jo, “Lukekpa, hinna inphut sesōt jo roh!” antia leikapeng hei.

²⁴Elisha’n akahnungting ahmai amahea kasang kanga a-en hei, RŌNGPU rahminga pase naihei kha ahâksêr jo hei. Khava sōa kavom apui 2 ratukōk a inphut heikasōk heia pasenai 42 hei kha anhar anhak a ankeihler jo hei.

²⁵Elisha’n Carmel tlânga jōng kakea khana hnunga Samaria a hong inle jo.