Read Komrem RENGHEI INHNINA 20 Bible Online

RENGHEI INHNINA 20 - Komrem bible

RENGHEI INHNINA 20

¹Hiva pha hin, Reng Hezekiah kha kana a akathi sik a ka-om jo. Amoz sapa sânkathem Isaiah kha aka-en sik a kasea ati, “RŌNGPU’n nang amanthei che kae, heirakip kaṭha a hre mantōksō jo roh, ajârchu nanat hi dammak jo tin che. Akathi sik a intlukdek jo roh.”

²Hezekiah kha bangting inhea derna anei jo,

³“Mandon roh, RŌNGPU, ke’n taksentak a naṭong kajuia nasepa katlo, khana namantlo hnōm eng kha ahei tik a tlo sik a intluk eng.” Khana ama kha rathla kasintek a kaṭap joa kae.

⁴Isaiah’n rengpa kha adahlon jo, tâk-kha innpui lâmte arakan mak hma, RŌNGPU’n

⁵RŌNGPU mihei vaikarônpa, Hezekiah hnenga inlena sik khana hing’hin avahrina sik a amanthei jo, “Kei napu David Pathen, RŌNGPU eng kae, naderna kathei jo, nahmit rathli kasōk kahmu jo. Ke’n kaman dam sik che, ni 3 ning Bek-inna kase sik che.

⁶Ke’n nang kum 15 hringkhō kamanseisa pek sik che. Nang leh hiva Jerusalem khōpui kalen hi Assyrian rengkalen a inphut kasensōt sik. Kei kajana sik leh kasōk David hneng ṭong ka’ntepna jâra hiva khōpui kalen hi kahrung sik kae.”

⁷Khava sōa Isaiah’n rengpa inzenhei hneng khan rengpa khōihli kha adamna sik a, theichang vânga ansyem hlei rabekna sik a amanthei hei.

⁸Reng Hezekiah’n ader, “RŌNGPU’n kei amandamna sik eng, khana nithumsō leh Bek-inna kasetorna sik a mêrchîkna kha heimo kae?”

⁹Isaiah’n amasôn, “RŌNGPU’n aṭongtep hui amathlung nger sik tina achîkna inkhat apek sik che. Tûnchu, rahle inkhat in chung kena kechōnna 10, chungting akake sik a-emak leh kechōnna 10, thōiting akaṭum sik kha kho jôk mo namadu.”?”

¹⁰Hezekiah’n amasôn, “Rahle kha hmating kechōnna 10 asesa sik khachu kabei! Hnungting kechōnna 10 manse roh.”

¹¹Isaiah’n RŌNGPU hneng ader, khana RŌNGPU’n rahle kha reng Ahaz taleisyem chung kena kechōnna 10 kahnungting amanle joa kae.

¹²Khava lai khan Babylon reng Baladan sapa Merodakh Baladan khan reng Hezekiah kana ti ṭong atheia, ama’n chithi inkhat leh kutchoi inkhat amanrôn.

¹³Hezekiah’n ṭongkarônhei kha aleiratō hei khana ama’n anei ahao, sana, dangka, maru-marâng, marim katui khana asepei hmangchâk-hei akhenga amalârpek hei. Akarōi den shunga leh arengram shunga hmun amalârpek mak heite leiom mak.

¹⁴Khava sōa sânkathem Isaiah kha reng Hezekiah hneng kasea ader, “Hiva mihei hi khona inphut akahong hei mo, khana nahnenga heimo antahri?” Hezekiah’n amasôn, “Anmani hi ram kahlatak a, Babylona inphut akahong hei kae.”

¹⁵Isaiah’n, “Anmani’n innpui shunga heimo antahmu sōt?” Hezekiah’n, “Anmani’n heirakip anhmu jo. Karōiden heia kamalârpek mak heite om mak jo,” ati.

¹⁶Khava sōa Isaiah’n rengpa hneng ahri, “Chunghnung RŌNGPU’n hinga ahri

¹⁷khachu nareng-innpuia aka-om rakip, napu napa he’n tuning katlunga karōi anta leibuk rakip, Babylon ram a rôn sōtna sik pha kha kahong jo. Heite dahlon mak hei ning.

¹⁸Nangkhet sōn ṭhahrep anṭhōisōt sik hei khana Babylon reng-innpuia sepa katlo sik a antaksa ansyempek sik hei.”

¹⁹Reng Hezekiah’n hiva ṭong hi ama hringkhō shunga chu intōk inchamna ka-om sik tina ting jôk manhretna aleineia, khana ahei masôn, “Nang in RŌNGPU a inphut ṭong napek eng hi kaṭha jo,” ati.

²⁰Reng Hezekiah ṭōntlo rakip, ama invakna ṭōnhei, khana khōpui kalen shunga tui keiman hlutna, tuikhur tuihlam atukna heirakip Judah renghei Thuhming Rabu a inzet a kae.

²¹Hezekiah kathia, asapa Manasseh in apa kahlanga reng kachang jo.