Read Komrem RENGHEI INHNINA 21 Bible Online

RENGHEI INHNINA 21 - Komrem bible

RENGHEI INHNINA 21

¹Manasseh in Judah reng achang pha akum 12 katluk jo, Jerusalema kum 55 vai arôn. Anu rahming Hephziba anti.

²Ami he’n hmating annam pha, ram a inphut RŌNGPU’n aleimanlōi sōt jo jât-hei omchen kha aleimajôma, Manasseh’n RŌNGPU kadōia setna aleitloa kae.

³Apa Hezekiah in atasuk manhmang limsyem kamukna hei kha ama’n asak nôk heia kae; Baal kamukna maichâm asyem hei khana Ahab taleitlo kapōa Asherah, intinu lim inkhat um aleisyem. Manasseh’n marvân ârsihei um aleikamuk a kae.

⁴RŌNGPU’n ama kamukna sik atina Bek-inna khan limsyem kamukna maichâm asak jo.

⁵Bek-inna sumpuk inhnia khan ârsihei kamukna maichâm asak hei.

⁶Asapa kha ro-inthoina atōksōt. Tlâ sânna leh dôi leh âi inchuna anei khana vâng ka-en hei leh kathi rathla inbek intōna anei hei. RŌNGPU dōina ama’n akaṭhamak ṭōn hingja atlo, khana Pathen hnuk amannat hêr.

⁷Bek-inn shunga Asherah pathennu lim amatung, khava RŌNGPU’n David leh asapa Solomon hnenga hinga aleihrina hmun a khan: “Hiva Jerusalem, hiva Bek-inn hi kei kamukna sik a Israel phung 12 hei ram shunga inphut ke’n kakadeisōt hmun kha kae.

⁸Israel mihe’n kaṭong pek kōiloa anjuia khana kasōk Moses’n apek hei Dân kha anjuipet inchu, anpa anpuhei hneng kaleipek ram a inphut ahei tik a hnongsōt manchang mak hei ning.”

⁹Tâk-kha Judah mihe’n RŌNGPU ṭong juimak hei, khana ami he’n hmating re anheinam pha, RŌNGPU’n aleihnongsōt mihei set-tlo kanek a Manasseh in aṭhōi heia setna antlo chet a kae.

¹⁰RŌNGPU’n asōk sânkathemhei amanhri hei,

¹¹“Reng Manasseh in hiva mater ka-om tak hei hi atlo hei, Canaan mihei tatlo kanek a akaṭhamak chet atlo; limhei leh Judah mihei kha setna ting aching hei.

¹²Khava jâra RŌNGPU Israelhei Pathen ke’n Jerusalem leh Judah hei chunga khava inrengna, akathei rakip hei inhmakna akachang sik kha kamathlung sik.

¹³Samaria hnenga katlo kapōa, Israel Reng Ahab leh asōnhei hneng katlo kapōa, Jerusalem chunga’m karâkna kapek sik. Thleng inkhat sôp manthengpet a malet khup kapōtak a, ke’n Jerusalema amihei kha kaphetsōt pet sik hei.

¹⁴Akathi banghei kha ke’n donmak hei ning, an-inrepuihei hneng, anmani kahlō sik leh anram kasuk inhmang sik hei hneng kapek sōt sik hei.

¹⁵Kamihei chunga hivahi katlo sik, ajârchu kei dōina setna antlo, khana anpu anpahei phat a Egypt ram a anjōng sōk a inphut hiva pha katlunga kahnuk anmannat ṭhak a kae.”

¹⁶Manasseh’n ṭhena kaneimak mi hingja athat heia Jerusalem hlamdung heia thisen amanlōng, hivahi Judah mihei limsyem kamukna aṭhōi hei chungchôna atlosa kha kae, khana RŌNGPU dōina setna amantlo hei kha kae.

¹⁷Manasseh taleitlo ṭōn rakip leh asetna leitlo rakip Judah Renghei Thuhming Rabu a inzet a kae.

¹⁸Ma-nasseh kathia reng-innpuia Uzzah rahōna anhre khana asapa Amon in athlenga reng kachang jo.

¹⁹Amon in Judah reng achang pha akum 22 katluk jo, Jerusalema kum hni vai aleirôn. Anu kha Jotba khōpuia Haruz sanu Meshullemeth kha kae.

²⁰Apa Manasseh kapōa ama’m RŌNGPU kadōia setna aleitlo;

²¹Apa omchen a kachôna, apa takamuk pathenhei kha aleikamuk.

²²Apu apahei RŌNGPU Pathen kha amasō khana RŌNGPU ṭongpek-hei kha leijui mak.

²³Amon ṭōnkarôn he’n lungthim antloa reng-innpui shunga ama kha anleithat jo.

²⁴Judah mihe’n Amon kathat-hei kha anthat heia asapa Josiah kha reng anmanchang jo.

²⁵Amon ṭōn leitlo rakip Judah Renghei Thuhming Rabu rabua inzet inhlut a kae.

²⁶Amon kha Uzzah rahōna thlâna anvûm jo, asapa Josiah khan athlenga reng kachang jo.