Read Komrem RENGHEI INHNINA 23 Bible Online

RENGHEI INHNINA 23 - Komrem bible

RENGHEI INHNINA 23

¹Rn Josiah’n Judah leh Jerusalema hlamkakeihei abek mantûp hei,

²thempu leh sânkathemhei khana mi rakip sara leh haisa ṭhenloa ankhenga Bek-inna kase hei. Anmani ankhengpet hma kunga, rengpa’n Bek-inna antahmu ṭongtep lekha kha kare inshângtak a atei pek hei.

³Ama kha renghei kacho kung hnenga kangira RŌNGPU juina sik a intepna anei jo, ama dânhei leh ṭongpek-hei juina sik, khana lekha shunga a’nzet kapōa, intepna shunga dân kha tlosōtna sik. Khana mi rakip in intepna kha juina sik a intep jo hei.

⁴Khava sōa Josiah kha Thempu Kalen Hilkiah, ama kabôm thempuhei, kotkung kahrunghei hneng Bek-inna inphut Baal kamukna, Asherah pathennu leh ârsihei kamukna hmangchâk losōtna sik a, ṭong apek hei. Khava neinâk seng kha Jerusalem vângting Kidron phaicham hnenga hmeia aro manvâm hei, khava ravut kha Bethel a ahei choi.

⁵Judah khōpuihei leh Jerusalem hnenga hmun heia khōvelhei maichâm chunga Judah reng he’n inthoina akatōk sik a mantheng sōtna antanei thempuhei kha anṭōn hmun a inphut alosōt hei — Baal, kani, thla, vârpa ârsihei leh ârsihei hneng inthoina katōk hei kha.

⁶Bek-inna inphut Asherah limsyem kha alosōt, khōpui kalena inphut alosōt a Kidron phaichama achoia hmeia aro manvâm, ravut hrep a avōk mannōia mipui thlân heia akathek thlōn hei.

⁷Bek-inn noti hei omna Bek-inn shunga innhei kha asuk manset hei. (Khava inna khan Asherah kamukna pōnhei kha nuhmei he’n anleikhông.)

⁸Judah khōpui heia thempuhei kha Jerusalema aheiṭhōi hei, khana aram shung pumpuia inthoina tōksōtna maichâmhei kha asuk manhmang pek hei. Khōpui vaikarôn Joshua’n kekot hnenga aleisyemsōt maichâm, khōpui anhlut pha veitinga matungsōt ke-ṭai limsyem hnenga tōksōtna hei kha’m aṭhetsō pek hei.

⁹Khava thempuhei kha Bek-inna leimanhlut mak hei, tâk-kha ansap changpui thempuhei sik a che philo buhlom antapek hei khachu ansâk thei sik.

¹⁰Molech inti Pathen hneng tûte inkhat in asanu achangmak leh asapa ro-inthoina aneithei makna sik a, Hinnom Phaichama khōvelhei kamukna Topheth kha Reng Josiah’n asuk manset jo.

¹¹Ama’n Judah reng he’n kani kamukna antatōksōt shakorhei kha’m alosōt heia, khana hiva kamukna anta leihmang Shakor gârihei kha’m hmei aro pek hei (Hihei hi ṭōnpui karôn Nathan Melech omna inna inphut hlarei loa aka-om Bek-inn sumpuk hlutna hnenga anleida hei.)

¹²Reng Ahaz innchunga Judah reng he’n anta leisak maichâm kha, Reng Josiah khan Bek-inn sumpuk inhnia Reng Manasseh in maichâm amatungsōt hei leh inṭhōia aṭhōtsō hei; ama’n maichâmhei kha avōk mannōi hei khana Kidron phaichama ahlon sōt hei.

¹³Jerusalem nisōa khana Olive Tlâng thlânga Reng Solomon in aleisak maichâm, mater ka-om Sidonhei limsyem Astarte, Moab pathen Cemosh, Ammon pathen Molech hei kamukna hei kha asuk manset jo hei.

¹⁴Reng Josiah’n kacho hlunghei kha ahar-ahak a anvōkkhōi hei, Asherah limsyem kha atuk phûr hei, khana khahei leimatungna hmunhei kha mihring saru vâng amakhu hei.

¹⁵Israel setna hlam a aleikaṭhōi Nebat sapa Jeroboam in aleisak Bethel a kamukna hmunhei kha Josiah’n avōkkhōisa hei. Josiah’n maichâm kha akei mathlûk a, ahlunghei kha ahar-ahak a anvōkkhōi hei, asuk mannōia ravut amanchang hei; khana Asherah limsyem kha’m aroa kae.

¹⁶Khava sōa Josiah’n akimvea a-en madip pha ching chunga thlân ṭhahrep ahmu hei; ama’n saru hei kha akhersōt heia maichâm chunga aro hei. Hing’hin tenlai Reng Jeroboam in revei shunga maichâm hnenga angirlai sânkathem in aleihridek kha atlosōt a maichâm kha asuk manset jo heia kae. Reng Josiah khan akimvea khō athlira hiva ṭong aleikasânsōt sânkathempa thlân kha aleihmu.

¹⁷Ama’n ader, “Khi khi tu thlân mo?” Bethel a mihe’n anmasôn, “Hivahi Judah inphut akahong sânkathem inkhat khana tuning nang in hiva maichâma natlo rakip aleikasân sōtpa thlân kae.”

¹⁸Josiah’n ṭongpek amasōa, “Hivahi hinga om rasoh. Ama saru hei kha thonmak sik kae.” Khava jâra ama saru hei khana Samaria inphut akahong sânkathemhei ruhei kha thonmak jo hei.

¹⁹Israel khōpui rakip a khōvelhei kamukna hmun rakip, Israel renghei taleisyem, khana inphut RŌNGPU hnuknat anta manhnakna hei kha Reng Josiah’n asuk mathlâk pek jo hei. Bethel a aleitlo kapōa khava maichâm rakip heia atlo jo.

²⁰Khōvel thempu rakip ansepa tlona et maichâm chunga athat hei, khana maichâm rakip a mihring ru arona jo hei. Khava sōa Jerusalema hong inle jo.

²¹Rn Josiah’n mipuihei kha intepna lekha shunga aka-om dungjuia RŌNGPU an-Pathen kajana Rakan Kût antlona sik ṭong apek hei.

²²Hiva kapō Rakan Kût hi, ṭongkatanhei vairôn laia inphut Israel achangmak leh Judah reng he’n heitlo phungmak hei.

²³Tûnpek hin, Josiah vairônna kum 18 tlukna hin Jerusalema Rakan Kût antlo joa kae.

²⁴Thempu Kalen Hilkiah’n Bek-inna atahmu sōt lekharabu a’nzet hei kha manse theina sik a Reng Josiah’n, Jerusalema leh Judah ram a kathi rathla kabe hei leh tla kasânhei, innshung pathen rakip leh limhei, khana khōvelhei takamuk neinâk rakip alosōt jo hei.

²⁵Khana khan ama kapōa amalung, amandona, aratha neina rakip a RŌNGPU sepa katlo, Moses dân rakip kajui chu ama mak hma reng inkhatbek leiom mak; khana ama kahnunga’m inkhatbek leiom mak.

²⁶Tâk-kha Reng Manasseh ṭōn leitlo jâra RŌNGPU’n Judah chunga ahnuknat kha amanhnak hêr, tûn katlung ahnuknat kha lachammak a kae.

²⁷RŌNGPU’n ati, “Israel chunga kaleitlo kapōa Judah chunga’m katlo sik: Judah mihei hi kahmit en rekhat a kada sik hei, khana ke’n kakadeisōt khōpui Jerusalem khana kei kamukna sik a hmun kalei ti jo Bek-inn kha kahlonsōt sik hei.”

²⁸Josiah taleitlo rakip Judah Renghei Thuhming Rabu a inzet a kae.

²⁹Josiah’n vai arôn lai Egypt reng, Reng Neko khan Assyria rengkalen inthōpui sik a Euphrates Tuidung katlunga remi aheiṭhōi hei. Reng Josiah’n Egypt remihei kha Megiddo a aleikhâr hei khana ama kha anleithat jo.

³⁰Ama ṭōnkarôn he’n akalōng kha gâri chunga anhei kadoma Jerusalema anheichoi, khana khan renghei thlâna anhre jo. Judah mihe’n Josiah sapa Joahaz ankadeia reng sik a thai anmanthi jo.

³¹Joahaz in Judah Reng achang pha kum 23 katluk jo, Jerusalema thla 3 vai aleirôn. Anu chu Libnah khōpuia Jeremiah sanu Hamutal inti.

³²Ama apu apahei chôndân ajuia ama’n RŌNGPU dōina setna aleitlo.

³³Ama vairôn hi Egypt a Reng Neko’n Hamath ram a Ribla a kurkhum a ama kha aleida pha khana inphut le’nchai jo, khana Judah kha kum khat a dangka kilograme 3,400, sana kilograme 34 ramsêrṭhei aleimanpek a kae.

³⁴Reng Niko’n Josiah kathlenga Josiah sapa Eliakim amanṭang khana arahming kha Jehoiakim tia aphō. Joahaz kha Reng Neko’n Egypt a aṭhōia khava hmun a leikathi jo.

³⁵Jehoiakim in Egypt rengpa maduna dungjuia ramsêrṭhei pekna sik a mipuiheia inphut annei anhaona dungjuia keiṭheina aneia kae.

³⁶Jehoiakim in Judah reng achang pha akum 25 katluk jo, khana Jerusalema kum 11 vai aleirôn. Anu kha Ruma khōpuia Pedaiah sanu Zebida kae.

³⁷Apu apahei omchen ajuia, Jehoiakim in RŌNGPU dōina setna aleitlo.