Read Komrem RENGHEI INHNINA 24 Bible Online

RENGHEI INHNINA 24 - Komrem bible

RENGHEI INHNINA 24

¹Jehoiakim in reng achanglai Babylon rengpa Nebuchadnezzar in Judah a re aheitlo, kum 3 Jehoiakim kha athōia aleiman-om; khava sōa re aleidōi jo.

²RŌNGPU’n asōk sânkathemhei hneng atlosōt sik a aleihri hei kha Babylon, Syrian, Moab, Ammon remi rup-hei Jehoiakim kadōia Judah manhmangna sik ahei tir heia kae.

³Reng Manasseh set tlona jâra, ahmit hmu rekhat a Judah mihei kha tirsōtna sik heia, hivahi RŌNGPU ṭongpek dungjuia kasōk jo,

⁴kakhôk pena ama’n ṭhenakase mi aleithat hei seng jâra kae. Khava sik a RŌNGPU’n Manasseh kha rangei mandam tor mak a kae.

⁵Jehoiakim in aleitlo hei seng kha Judah Renghei Thuhming Rabu a inzet inhlut a kae.

⁶Jehoiakim kathi joa asapa Jehoiachin in athlenga reng kachang jo.

⁷Egypt rengpa leh aremihei kha avea Egypt a inphut vâng sōk mak jo hei, ajârchu Euphrates Tuidunga inphut sak tinga Egypt ramri katlunga ramṭhen rakip Babylon reng thōia ka-om joa kae.

⁸Jehoiachin in Judah reng ahongchang pha akum 18 katluk jo, ama’n Jerusalema thla 3 vai aleirôn. Ama nu kha Jerusalema Elnathan sanu Nehushta kae.

⁹Apa omchen aloa Jehoiachin in RŌNGPU dōina ṭōnse aleitlo.

¹⁰Ama vairôn shunga Babylon remi, Reng Nebuchadnezzar ṭōnpui karônhei hlamkeina thōia, Jerusalem dōina injôk hei khana ankakekhum jo.

¹¹Ankake khumlai hin Nebuchadnezzar ama khet Jerusalema kahonga kae,

¹²Rn Jehoiachin in anu, asapahei, aṭōn karônhei leh inṭhōia Babylonhei hneng kahlut jo hei. Nebuchadnezzar vairôn kum 8 tlukna Jehoiachin kha resura aleiṭhōi jo

¹³khana Bek-inna leh Reng-innpuia ka-om nei leh hao akhenga anrônpet jo. RŌNGPU’n hmatak a aleisânsōt kapōa Reng Solomon in Bek-inna hmang sik a aleisyem be leh bûr hei ahar-ahak a avōk khōipet hei.

¹⁴Nebuchadnezzar in Jerusalem mihei, reng sapahei, hlamkakeihei seng, ankhenga 10,000 rehring sura aṭhōi hei. Khana ama’n ṭōntlo kathem seng thir kakheng hei inveina aṭhōisa hei, saraberhei chu Judah ram a adahlon hei.

¹⁵Nebuchadnezzar in Jehoiachin, anu, a nuhmeihei, ama ṭōnkarônhei, khana Judah hlamkakeihei leh inṭhōia Babylona aṭhōi jo hei.

¹⁶Nebuchadnezzar in Babylona mikalûr mikalen rakip aṭhōi hei kha mi 7,000 hei kae, kut kathem mi 1,000 hei, khava kâra thirkhêng kathem invei hei, ankhenga remia a’nṭangthei taksa kahrat rōk hei kae.

¹⁷Nebuchadnezzar in Jehoiachin pahngâk Mattaniah kha Judah Reng amanchang khana arahming Zedekiah tia athleng pek.

¹⁸Zedekiah’n Judah reng achang pha ama kum 21 katluk jo, Jerusalema reng kachanga kum 11 vai arôn. Ama nu kha Libnah khōpuia Jeremiah sanu Hamutal inti.

¹⁹Reng Jehoiakim taleitlo kapōa Zedekiah’n RŌNGPU dōina setna aleitlo.

²⁰RŌNGPU’n Jerusalem leh Judah mihei chunga ahnuk kana reia ahmit hmua inphut ahnong sōt jo hei.