Read Komrem RENGHEI INHNINA 25 Bible Online

RENGHEI INHNINA 25 - Komrem bible

RENGHEI INHNINA 25

¹Zedekiah in Babylon rengpa Nebuchadnezzar dōina re aleitlo; khava jâra Zedekiah vairônna kum 9 tlukna thla 10 a ni 10 tluk ning Babylon rengpa Nebuchadnezzar in aremi rakip leh Jerusalema re aleitlo. Anmani’n khōpui vângting rephōr ansak a khōpui kekhumna akimvea bang ansak a kae,

²Zedekiah’n vai arôn kum 11 katlunga khōpui kha ankakur khuma kae.

³Khava kum a thla 4 tlukna ni 9 ning vonṭâm atlâk a sâk sik heite a-om mak jo pha,

⁴khōpui bang kha anvōkkhōi jo. Babylon he’n khōpui kha ankakekhum jo tâk inum, Judah remi rakip jâna katlânsōt jo hei. Anmani reng rahōnna inphut kasōksōt hei, bang 2 inmatna kekot a kathlenghei, khana Jordan phaicham langting katlânsōt hei.

⁵Tâk-kha Babylon he’n reng Zedekiah kha anhei hnong, Jericho phaicham hnenga ansur, aremi rakip in andahlon jo.

⁶Zedekiah kha Ribla khōpuia ka-om Reng Nebuchadnezzar hnenga anṭhōi jo, khana khan achunga ṭong tanna annei jo.

⁷Zedekiah hmit-hmua, asahei kha anthatpek hei; khava sō leh Zedekiah hmit ankhersōtpek a hruia ankhit a Babylon ting ankei jo.

⁸Babylon Reng Nebuchadnezzar vairôn kum 19 tlukna thla 5 tlukna ni 7 ning rengpa rehlam kakeipa, rengpa mansena kaneipa, Nebuzaradan in Jerusalema leikahlut a kae.

⁹Ama’n Bek-inn, reng-innpui, khana Jerusalem apui karôn mihei inn akhenga hmeia arosō hei,

¹⁰aremi he’n khōpui bang kha anvōk khōisō.

¹¹Khōpuia antadahlon mihei, kut kathem mihei khana Babylon heia inphut akatlânsōt hei kha Nebuzaradan khan Babylona aṭhōi nôk heia kae.

¹²Tâk-kha, saraberhei, karōi kaneimak ṭhahrep chu vomhrui thei rahōn heia leh hleipuk heia ṭōn katlo sik a Judah ram a aleidahlon hei.

¹³Babylonhei kha’n Bek-inna ka-om sum-êng kacho leh gârihei, khana sum-êng tuirakōng hei kha ahar-ahak a anvōkkhōi hei, khana sum-êng rakip Babylona anchoisō hei.

¹⁴Anmani’n Bek-inna maichâm mantheng sōtna vutlōk leh ravut kōkleihei, thaihmei mansûkna hmangchâk-hei, inthoina thisen madona, bero rona kōkleihei, khana bek-inn shunga ṭōn tlona sum-êng hmangchâk rakip hei kha anchoipet hei.

¹⁵Anmani’n sana dangka vânga antasyem neinâk rakip, inṭhōia hmeira-ê choina kōklei tete leh khâng hei anchoipet hei.

¹⁶Reng Solomon in Bek-inn sik a aleisyem hmangchâk-hei, kacho 2, gârihei, khana tuirakōng kalentak hei khachu kahrik rei heia inte theimak heia kae.

¹⁷Thing kacho 2 khachu in-angtling hei: inkha-khat in metre 8 ṭim inshâng hei, anchunga sum-êng lubur ansyem, metre 1.3 inshâng. Kacho inkhat et lubur kha ahmor kimve anmansong det a ankake khumbit khana khava chunga sum-êng kapothei lim vâng ret ansyem.

¹⁸Hiva chunga, Nebuzaradan, rehlam kakeipa’n, Thempu Kalen Seraiah, khana ama hnōibât a Zephaniah thempu, khana Bek-inna ṭōnkarôn 3 hei rehring sura aṭhōi jo hei.

¹⁹Khōpuia inphut remi rup-hei hlamkakei ṭōnkarônhei kha aṭhōi hei — khōpuia alaka-om ṭhak rengpa mansena kanei 5 hei, rehlam kakeipa inṭhōpuipa, remihei lekharabu akatintapa, khana apui karôn mi 60 hei seng.

²⁰Nebuzaradan in Hamath ramṭhen a Ribla khōpuia ka-om Babylon rengpa hneng

²¹anmani aṭhōi heia kae. Khana khan rengpa’n anmani avōk heia athat heia kae. Khang’khan Judah mihei kha anrama inphut miram a anṭhōi jo heia kae.

²²Babylon Reng Nebuchadnezzar in Shaphan tupa, Ahikam sapa Gedaliah kha Judah vaikarôn amanṭang jo, khana Babylona ṭhōilo hei, dahlon hei, chunga ankatinta sik a ada jo.

²³Mithōia alakahlut mak Judah ṭōnkarônhei leh remihei khan ṭong kha anthei pha, anmani Mizpah a Gedaliah hneng kahong hei. Khava ṭōnkarônhei kha Nethaniah sapa Ishmael, Kahrea sapa Johanan, Netophah khōpuia inphut Tanhumeth sapa Seraiah, Maacah inphut Jezaniah hei hi kae.

²⁴Gedaliah in anhnenga ahri, “Babylon hlamkakeihei kha ṭit sik heite om mak ti hi ṭong kapek che kae. Hiva ram shunga hin khō chōn ruh, Babylon rengpa kha razen ruh, khana heirakip nangni sik ṭhatna kachang sik.”

²⁵Tâk-kha khava kum a thla 7 na, reng innkō shunga mi Elishama tupa, Nethaniah sapa Ishmael in mihring 10 leh inṭhōia Mizpah a jōng kasea Gedaliah kha ahong buhlua aleiṭhat jo. Ama leh aleika-omsap Israel mi leh Babylon mihei kha’m athatsa hei.

²⁶Khava sōa Israel rakip, sara heisa, remi hlamkakeihei leh Egypt a katlân jo hei, ajârchu Babylonhei anṭit jo heia kae.

²⁷Evilmerodach in Babylon reng ajōng chang shunga, Judah rengpa Jehoiachin kha lungset arôna khuma inphut aleimasō jo. Hiva omchen hi Jehoiachin khuma a-om kum 37 tlukna, thla 12 tlukna, ni 27 ning khan aleikasōk kae.

²⁸Evilmerodach in ama kha kaṭha nenga atlopek, khana Babylona sura ka-om reng ralak-hei hnenga atlo kanek a ama kha inshângdet a kajana apek a kae.

²⁹Khava jâra Jehoiachin kha kurkhum pōn leh der athlengsōt a rengpa dokhânga ahringkhō katlung bit a bu asâk a kae.

³⁰Ani katai, ahring kârseng, arangei sêr leh sum injônjet a aleipek a kae.