Read Komrem RENGHEI INHNINA 3 Bible Online

RENGHEI INHNINA 3 - Komrem bible

RENGHEI INHNINA 3

¹Judah reng Jehoshaphat in kum 18 reng ajōng chang pha, Ahab sapa Joram in Israelhei reng le’nṭang, ama’n Samaria a kum 12 vai aleirôn.

²RŌNGPU kadōia setna aleitlo, tâk apa leh anu Zezebel kapōa mikaṭhamak chu leichang mak; apa’n aleisyem Baal limsyem kamukna kha akei mathlâk a kae.

³Kha’num, ama mak hma Nebat sapa Reng Jeroboam kapōa Israel sahei setna hlam a aleiṭhōi hei, leihai mak a kae.

⁴Moab a Reng Mesha kha kemōng aleivei khana akum katai ama’n Israel rengpa hneng kemōngte 100,000 ṭim, khana kemōng 100,000 a inphut sahme aleipek.

⁵Tâk-kha Ahab rengpa thisō kahnunga chu Mesha’n Israel chunga re aleitlo jo.

⁶Khava phatak a Joram in Samaria adahlona aremihei aleikhôm mantûp hei.

⁷Ama’n Judah Reng Jehoshaphat hneng ṭong inkhat atir, “Moab rengpa’n kachunga re avatuk jo; ama dōina najōng inthōpui sik eng mo?” Reng Jehoshaphat in amasôn, “Kei nang kabôm sik ka-om eng, karemi khana kashakor ka-om hei.

⁸Re sōna sik a khova lang intong mo nijui sik?” Joram in amasôn, “Hlam kasei kha nijui sik, Edom ramhâng intongtinga.”

⁹Khang’khan Reng Joram leh inṭhōia Judah leh Edom renghei kasesōt jo hei. Anmani’n ni 7 anse kahnunga tui hmumak jo hei. Anmani tuirôn hei kha anran leh mihei sik a heite om mak jo.

¹⁰Reng Joram in ka-ônga, “Eini inhmang jo me! RŌNGPU’n eini 3 hi Moab rengpa kut a apek sōt jo me,” ati.

¹¹Khava pha Jehoshaphat in ader, “Hinahin RŌNGPU hneng akadertor sânkathem inkhat om mak a mo?” Reng Joram rehlam kakei inkhat in amasôn, “Shaphat sapa Elisha kha hin ka-om. Ama hi Elijah inthōpui mi kae.”

¹²Rn Jehoshaphat in ahria, “Ama chu akadiktak sânkathem kae.” Khava jâra reng 3 hei kha Elisha hneng leikase hei.

¹³Elisha’n Israel rengpa hneng aleiti, “Heisa mo ka’nthōpui sik che? Se ina nanu leh napa hei taleider sânkathemhei kha vader hei roh.” Joram in aleimasôn, “Changmak! Keini reng 3 ung hi Moab rengpa kut a anikapek sōt kha RŌNGPU kha kae.”

¹⁴Elisha’n aleimasôn, “Ke’n karazen akahring RŌNGPU rahminga a’ntep eng kae, Judah rengpa Jehoshaphat kha ke’n kalei kajamak a achang inchu nang leh heite inmatna leinei mak me.

¹⁵Tûn mahring katumthei mi heijong roh.” Mahring katumpa’n bunglir aheitum pha RŌNGPU ratha hratna kha Elisha chunga hei ka-om jo,

¹⁶khana ama’n ahri, “RŌNGPU ṭonghri kha hi kae: ‘Hiva kavadung kachâr shunga khur chosōt hei ruh.

¹⁷Thli leh khōsûr nanhmu mak inum khurhei kha tui kasip phet hei sik, khana nangni leh nanranhei ta-in sik a hingja ka-om sik.’”

¹⁸Elisha’n ahri manjōm a, “RŌNGPU sik a chu hiva tlo sik hi kabei hêr, ama’n Moab-hei kha torna amannei sik chei.

¹⁹Anmani rekur kaṭha inkhâr khōpui rakip nangni’n nantor sik hei; anmani theikara rakip nantuktan sik hei, antuiripût rakip nanmanchâr sik hei, khana ram thai kanei anhleipuk hei hlung makhu sia nandapek sik hei.”

²⁰Ajînga jîngkâra, angaia inthoina pha, Edom tinga inphut tui jōng kalōng inphut a ralei akachûm pet jo.

²¹Moab he’n anmani re kasō sik a reng 3 kahong jo hei ti hi anthei pha, re hmangchâk kachoi thei seng upa inphut naipang katlung anlei beksōt heia anramria repa anleihngâk jo.

²²Ajînga jîngkâra anmani anhei thō pha, kani khan tui chunga asat manvâr kha thisen kapōhrep a kasen a inhmu jo.

²³Anmani’n ka-ông heia, “Hiva hichu thisen kae,” anti. “Reng 3 hei remihei inkhat leh inkhat a’ntha jo hei kachang sik! Vase me son anrephōr vachom rih!” anti.

²⁴Tâk-kha anmani’n rephōr hmun kha anvatlung pha chu Israel he’n anmani anhlō heia anhnong male jo hei. Israel he’n khanga anhnong heia Moab-hei kha anleithat jo hei

²⁵ankhōpuihei kha ansuk manhmang jo hei. Anmani ram thai ka-om hleipuk anpetana anse pha Israel he’n hleipuk kha asipna katlunga hlung inkhat ṭim anhlon mathlâk a andahlon; anmani’n tuisi hei tui manpût mak jo hei, khana theikung hei antuk thlek heia kae. Achaina pena reng-innpui Kir Heres rōk kha andahlon jo; hlung hlon kathem he’n akimvea ankakekhum tlit a hivahi’m andeng manset jo.

²⁶Moab rengpa’n re intuk kha tor mak jo eng ti kha aheimanhret pha ama’n chem kachoi remi 700 aṭhōi heia inrepuihei sukkhōi heia Syria rengpa hnenga tlân sik a aleitlo jo, tâk-kha leitor mak jo.

²⁷Khava jâra asapa upapen, arengchang kathleng sik kha aṭhōia, Moab pathen hnenga atōk a, khōpui bang hnenga inthoina anei jo. Khavakha anhmu pha Israel mihei kha kaṭi jo heia anrama inle jo hei.