Read Komrem RENGHEI INHNINA 4 Bible Online

RENGHEI INHNINA 4 - Komrem bible

RENGHEI INHNINA 4

¹Sânkathemhei kâra sânkathem inkhat nuhmei renghmei inkhat in Elisha hneng kasea avahri, “Apu, kapuise kathi jo! Nang in namanhret kae, ama kha Pathen kaṭit mi kae, tâk-kha kapuise’n ahring lai misêr ajing aleibatna mi khan kasapa 2 hi sōk manchang sik a ankaṭhōi sik kahong sik a kae.”

²Ama’n ader a, “Nang sik a heimo katlo pek sik che? Na-inna heimo nanei, amanthei roh? “ Olive thaitui dana bephu inkhat tei loa alak heite inkhatbek om mak,” tia amanu’n aleimasôn.

³“Nasir navena ka-om hei hneng se ina anbe karōk nator chen a heivai roh,” tia Elisha’n amanthei.

⁴“Khava sōa nang leh nasapahei na-inn shunga hlut ina nakot khâr ruh, thai kha be karōk heia khan sun ruh. Asip pha leh khavakha asira da ruh,” ati.

⁵Khava jâra nuhmei khan asapahei leh a-innshunga kahlut heia kot akam jo, asapahei khan behei kha ahnenga anheichoi pha olive thai bete kha aloa be karōk heia khan asun jo hei.

⁶Be senghei kha anmansip jo pha, amanu’n bephu alaka-omsa mo tia ader hei. Asapa inkhat in, “Khavakha achaina jo kae,” ati. Khava pha olive thai lōng kha inhnga jo.

⁷Nuhmei kha sânkathem Elisha hneng inle nôk a sânkathem khan ama hneng ahri, “ Olive thai kha jōr ina nasêrbat rakip kha sinna jo roh khana a’nhlei kha nang leh nasahei sâk sik katluk sik.”

⁸Ni khat hin Elisha kha mikanei nuhmei inkhat omna Shunema leikase. Nuhmei khan Elisha kha bukasâk aleibek, khava ninga inloa Elisha’n Shunema kasea nuhmeinu inna bu aleisâk ṭhak a kae.

⁹Nuhmei hin apuise hneng ati, “Hina akahong ṭhak pasepa hi mi intheng kae tia kamanhret.

¹⁰Eini inn chunga dente inkhat ama sik sak pek rih, khava khan jekhum inkhat, dokhâng inkhat, in-ongna inkhat khana thaihmei inkhat dapek rih, ama’n aheiphâk me akaia a-omtheina sik.”

¹¹Ni khat Elisha’n Shunema ajōng inle pha a-inn den a khan châm inhnga sik a leikaketou.

¹²Ama’n asōkpa Gehazi hneng nuhmeinu kabek a asena sik amanthei. Nuhmei khan ahong pha,

¹³ama’n Gehazi hneng ahri, “Eini sik a rangei kachang rakip pekna sik a ama’n khōdengthei adena rakip jâra khan heimo katlo pek tor sik der roh. Rengpa hnenga achangmak leh rehlam kakeipa hnenga kei kase leh ama sik a ṭong kaṭha inkhatbek um amanhri hnōm thei sik enga kae.” Nuhmei khan ahei masôn, “Kamihei kâra hin kei tarangei rakip katluk a kanei.”

¹⁴Elisha’n Gehazi hneng ahri, “Khan chu ama sik heimo katlo pek thei ka-om?” Ama’n ahei masôn, “Kaṭha, nuhmei hi sapa neimak, apuise’m kater jo.”

¹⁵Elisha’n ṭong apek a, “Nuhmei kha hin ahongna sik ti roh.” Nuhmei kha kahonga kot khâra kangira ka-om,

¹⁶Elisha’n amanu hneng ahri, “Akumting hiva phatak a hin nang in sapa inkhat napom sik.” Nuhmei kha ka-ônga, “Oh! Oja, nasōk kei hneng ahōn mak roh. Nang chu Pathen mi che kae!”

¹⁷Tâk-kha Elisha’n aleihri kapōa, akumtinga khava pha khan sapa inkhat anei jo.

¹⁸Kum ṭhahrep sōa, savōk pha, jîngkâr inkhat a sakakhôm hei leh hleipuk a aka-om apa hneng naipangpa kha leikase.

¹⁹Manhret phâkloa naipang khan apa hneng, “Kalu intôn jo! Kalu intôn jo eng!” aleiti. Apa’n asōk inkhat hneng, “Naipang kha anu hneng vathak roh,” ati.

²⁰Sōkpa khan naipangpa kha anu hneng avathak, anu’n kani sûnṭim katlunga apom khava pha kathi jo.

²¹Nuhmei khan naipang kha Elisha den a aṭhōitoua jekhuma amanjea kot khâr akirtlit a aheidahlon jo.

²²Khana amanu’n apuise abek a ahri, “Sōk inkhat shakōrtung inkhat leh hin heitir roh. Elisha sânkathem hneng se sik kasōk jo. Tor chenna inranga hong inle sik eng.”

²³Apuise’n ader, “Heisik a mo, tuning avakase sik che? Tuning hi Châmhngat kani ning um changmak khana thlalir ninga revei um changmak.” Nuhmei in amasôn, “Heite timak.”

²⁴Amanu’n shakōrtung kha achōnga sōkpa hneng ṭong apek, “Shakōrtung kha inranga manse roh, kei in jâmdet a manse roh katimak hma seng man-êng mak roh.”

²⁵Amanu kasesōt jo, Elisha omna Carmel tlânga kaketou jo. Akahlajap a ahonglai Elisha khan nuhmei kha aheihmu, asōkpa Gehazi hneng ahri, “Enroh, Shunema nuhmei kha kahong!

²⁶Inranga se ina apuise leh asapa, khana heirakip akadam hei mo vader roh.” Nuhmei khan Gehazi hneng heirakip kaṭhapet tia amasôn,

²⁷tâk-kha amanu’n Elisha hneng ahong pha ahmai kunga inkuna ake kha akakō tlit a ka-om jo. Gehazi’n amanu kha namsōt sik a aleitlo, tâk Elisha’n ahri, “Abinga dahlon roh. Amanu inrimna inhnaktak hi hmumak che mo? RŌNGPU’n hiva chungchânga amanthei mak a kae.”

²⁸Nuhmei khan ahnenga ahri, “Oja, ke’n sapa kaleider che mo? Hiva kapō inhōrna amannei mak roh kati che changmak a mo?”

²⁹Elisha’n Gehazi hnengting inhea ahri, “Inrang roh! Kakhōnghre hi choi ina se roh. Nang in hlam a mi na’ntōpui hei kha rakôkna sik ngirmak roh, mihe’n anrakôk che’num anmani masônna sik a pha manhmang mak roh. Inna khan vasehrek inna kakhōnghre hi naipangpa chunga vada roh.”

³⁰Nuhmei khan Elisha hneng ahri, “Akahring RŌNGPU leh nang chunga kataksena chei vânga khan intep eng, khachu nang dahlon mak che ning!” Khana anmani 2 kahong sōm jo heia kae.

³¹Gehazi’n hma aleikeia kasea naipangpa chunga khōnghre kha avada jo, tâk-kha naipangpa kha ahei hring nôkna rasa a-emak leh mêrchîkna heite inhmu mak a kae. Khava jâra Gehazi’n Elisha inhmupui sik a he’nlea ahei hri, “Naipangpa kha thōimak jo.”

³²Elisha kha aheitlung jo pha, abing rōk a den shunga kahlut a jekhum chunga naipangpa akathia a-om kha avahmu jo.

³³Ama’n kot aleikhâr a RŌNGPU hneng aleider.

³⁴Khava sōa naipangpa chunga inbok a abei, ahmit, akut-hei leh naipangpa bei, hmit leh kut chunga amantōk chak heia ada hei. Naipangpa taksa chunga a’nbok khum achang jâra, naipang taksa kha hong kalum jo.

³⁵Elisha kha kaṭhōisōt a den shunga khan kase lelea, hong inle nôk a naipangpa takchunga inthlong nôk a kae. Naipangpa kha vōisari hong inthia, ahmit-hei ahei mahlang jo.

³⁶Elisha’n Gehazi abek a naipangpa nu kha ahei bekna sik amanthei. Amanu aheihlut pha ama’n ahnenga ati, “Nasapa hin ka-om jo.”

³⁷Amanu Elisha ke kunga katlu jo, ahmai in ralei amantôn jo; khana asapa kha a’nṭhōia kasōk jo.

³⁸Pha khat a, ram pumpuia ṭâm leika-om, Elisha’n Gilgal a he’nle jo. Sânkathem rup khat hei amanthei hei lai, anmani hei sik a bephu kalentak inkhat hmei chunga manchōnga hme leh anse-hleina sōngna sik asōkpa hneng amanthei.

³⁹Ankâra mi inkhat in hlei laia vakasea anse-hleina ajing ahei ṭhōt. Ama khan hrui injâm aleiratō, khana ûmkha ahei rôn tor seng ahei choi. Ahei rôn heia, a-ât heia an sōngna anhapsa jo hei, heimo kae ti chu leimanhret mak.

⁴⁰An kha mihei tasâk sik a anheithur jo pha, anhong mantemlim leh anmani’n Elisha hneng heika-ông heia, “Hivahi tûr inhapsa jo!” antia sâk mak jo hei.

⁴¹Elisha’n thlai kha ajing ader hei, ama’n be shunga khan asun mathlâk jo khana ati, “Anmani sik a akatamdet thurpek hei ruh.” Khava sōa chu ansâk inum heite timak jo.

⁴²Pha khat nôk a, Baal Shalisha inphut mi inkhat kahong, khava kum a ahma kakeipen sânga inphut antasyem buhlom apheng 20 leh sabor anta-ât therbi ajing leh Elisha sik a ahei choi. Elisha’n asōkpa hneng sânkathem rup-hei kha aveina sik a amanthei,

⁴³tâk-kha ama’n amasôn, “Hivahi mi 100 sik a katluk sik tia namandon mo?” Elisha’n ahei masôn, “Antasâk sik a pek hei roh, ajârchu RŌNGPU’n ati kae anmani’n ansâk sik khana a’nhlei um laka-om sik.”

⁴⁴Khava jâra sōkpa khan thlai kha anmani hmaikunga adônpek jo hei, khana RŌNGPU’n ahrina kapōa ankheng in ansâk a ajing um la’nhleia a kae.