Read Komrem RENGHEI INHNINA 5 Bible Online

RENGHEI INHNINA 5 - Komrem bible

RENGHEI INHNINA 5

¹Syria rehlam kakeipa Naaman kha Syria rengpa’n kajana leh maritna aleinei hêr ajârchu, Naaman jâra RŌNGPU’n Syria remihei kha torna aleipek hei. Ama kha sepei kalen inkhat leikae, tâk-kha akakhôk tak vunnat a leikana a kae.

²Israelhei chunga re anvatuklai Syria he’n rehringa anta heisur nuhmeinai inkhat Naaman nuhmei sōk a le’nṭanga kae.

³Amanu khan akapunu hneng hing’hin ahri, “Samaria ka-om sânkathem hnenga kapu hi avase tor inchu tia kamandon! Ama’n chu anat hi amandam tor sik a kae.”

⁴Hiva ṭong hi Naaman in athei pha, rengpa hneng vakasea, naipangnu tahri kha avahri jo.

⁵Rengpa’n ati, “Israel rengpa hneng vase roh, khana hiva chithi hi vapek roh.” Khava jâra Naaman in dangka 30,000, sana ahar 6,000 khana pōnret akaṭha 10 achoia leikase.

⁶Achithi choi khan hinga inzet: “Hiva chithi hin kei ṭōnpui karônpa hme malârna anei sik. Anat hi nahei mandam sik a kamadu.”

⁷Israel Rengpa’n chithi kha atei pha, apōn akei hlera amalung inhmakban joa kaṭongsōt jo, “Syria rengpa’n heikhong inmo ke’n hiva mipa mandamna sik a angeitō eng? Hringna leh thina ratha kanei Pathen inkhat a mo amandon jo eng? Hivahi ama’n kei leh innâk phutna sik a atlo jo kae, inhret jo!”

⁸Omchen kasōk kha sânkathem Elisha’n athei pha rengpa hneng ṭong hi amanrôn: “Heisik a mo namalung khangtuk a namandong? Pasepa kha kahnenga heitir roh, Israel shunga sânkathem ka-om ti hi kamanhmu sik!”

⁹Khan chu Naaman in ashakor leh gârihei leh kase jo, khana Elisha inn kekot a inhnga jo.

¹⁰Elisha’n asōk inkhat ama hneng atira Jordan Tuidunga vōi 7 ahlut a a’nsôp inthengna sik, khana anat kha adam petna sik avamanhri jo.

¹¹Tâk-kha Naaman in ahnuk anat rei jâra hinga ahri, “Ke’nchu ama kha heikasōk sik a kha apathen RŌNGPU hneng aderpek sik eng, kanatna bihei hi akut a anikachi pek sik eng khana amandam pek sik eng tia kaleimandon kae!

¹²Khava chung nôk a, Damascus kahnungtinga Abana leh Pharpar tuidunghei kha’n Israel shunga tuidung rakip hei kanek a ṭhadet mak hei mo? Khavahei khan leikahlut thei eng khana kanat hi leikadam thei enga kae!”

¹³Asōk he’n ahnenga kase heia anleihri, “Oja, sânkathem in heikhat a’ntak tlo sik a amanthei che’nchu, khavakha natlosōt sik kae. Tûnhin heisa mo tui shunga akahlutmak sik che khana a’nthengsōt mak sik che?”

¹⁴Khan chu Elisha mansena kapōa, Naaman in Jordana vakaṭuma vōi 7 vakahlut a kae, khana ama kha kadampet jo. Atak vun kha naite vun kapōa angaia hong kaṭha jo.

¹⁵Ama’n amihei seng leh Elisha hneng ansor nôk a anvahri, “Tûnchu Israel Pathen tei loa pathen ralak om mak tia kamanhret jo; achang jâra Oja, kei kutchoi hi arahlâng pek roh.”

¹⁶Elisha’n amasôn, “Ke’n karazen akahring RŌNGPU rahminga, kei a’ntep eng hi kae, ke’n kutchoi inkhatbek rahlâng mak ning.” Naaman in arahlângna sik a rahnak a ahri, tâk lopek mak jo.

¹⁷Khana Naaman in ati, “Kei kutchoi hi nalopek mak jo eng inchu, ka-innting karôn sik a hiva hmun a inphut ralei pi shakōrtung 2 tarôn tor sik apek roh, ajârchu tûnna inphut chu RŌNGPU hneng tei loa pathen ralak-hei hneng inthoina a-emak leh romanvâm tōkna ke’n tlomak jo ning.

¹⁸Tâk-kha Syria pathen Rimmon bek-inna kei rengpa leh inṭhōia kase pha khana kanva kamuk pha chu RŌNGPU’n kei hi arangei mandam sik eng tia inhōr eng. Sôilo jen a RŌNGPU’n arangei mandam sik eng!”

¹⁹Elisha’n ati, “Kamōnga se jo roh.” Khana Naaman kha kasesōt jo. Ama kha hlam bongkhat lim lakase,

²⁰Elisha sōkpa Gehazi’n abinga aleimandon, “Naaman in ka-oja hneng heite pek loa amanse jo! Syria mipa pekna so arahlâng sik kae. Akahring RŌNGPU rahminga, akahnung kathlur sik khana heikhat ahnenga inphut kalo sik.”

²¹Khang’khan Naaman kahnung athlur jo. Mi inkhat in akahnunga ahei katlân kha Naaman in aheihmu pha, ama intōpui sik a ashakor gâria inphut kaṭum jo, khana ader, “Heimo akadik mak aka-om jo?”

²²Gehazi’n amasôn, “Khanga changmak, tâk-kha Ephraim tlânga ka-om sânkathemhei kâra mi 2 kahong hei, dangka 3,000 leh pōn arabo 2 nantapek sik heia akahri sik a ka-oja’n ahei tir eng kae.”

²³Naaman in amasôn, “Dangka 6,000 hi lo roh.” Alona sik rahnak a ahria, dangka kha mârsha inhnia athōna pōn 2 leh inṭhōia asōk 2 hneng apek hei, Gehazi hmating amanse jo hei.

²⁴Elisha omna bung kha antlung pha Gehazi’n mârsha 2 kha aloa innshunga achoi manhlut jo. Hivasōa Naaman sōk-hei kha atir male jo hei.

²⁵Gehazi kha innshunga kahlut jo, Elisha’n aleider, “Nang khon mo avakase che?” Ama’n amasôn, “Khonte vasesōt mak eng, oja.”

²⁶Tâk-kha Elisha’n ahri, “Pasepa khan nang inhmupui sik ashakor gâria inphut aṭumsuk pha kei rathla a khava hmun a aka-om eng changmak enga mo? Hivahi dangka, pōn, olive thei, khana thei rahōn, kemōng leh sehrat khana sōk-hei rahlâng phat changmak a kae!

²⁷Khana tûnchu Naaman nat kha nang chunga hong kakop sik jo, nang leh nasōnhei chunga ahei tik a nanrôn sik jo!” Gehazi khan vâng asōk pha nat kha arôn jo, ataksa vun kha kavur kapōa kabang pet jo.