Read Komrem RENGHEI INHNINA 7 Bible Online

RENGHEI INHNINA 7 - Komrem bible

RENGHEI INHNINA 7

¹Elisha’n amasôn, “RŌNGPU’n heimo ati hi rangei roh! Jîng kania hiva phatak a hin Samaria shunga akaṭhapen Gehu kilograme 3 a achangmak leh satun kilograme 6 a dangka cheng khat a nanrachôk thei sik jo.”

²Rengpa taheiṭhōi akahrungpa inkhat khan Elisha hneng, “Khavakha sōk theimak ning, RŌNGPU khet in inrangtak a sâng leh be ahei tir inum ethei mak ning!” ati. Elisha’n amasôn, “Khava akasōk khachu nahmu sik, tâk-kha nang chu thlai inkhatbek kha sâk hêrmak tin che.”

³Samaria sōngkung kekot a vunnat kakhôk akarôn pase 4 leika-om hei, anmani khat leh khat le’nbek hei, “Hiva hmun a hin nithi mak kârseng heisik a mo aka-om sik me?

⁴Khōpuia vase sik um rangei mak, ajârchu khana khan vonṭâma kathi sik me; khana hinahin ni-om inum kathi sik me. Khava jâra Syria rephōra vase rih, kakhôktak a anta heitlo sik inkhat khachu eini thina kha kae sik, kha’num anmani’n nihringkhō ṭhensōt thei um aja a kae.”

⁵Khana khō jōng inthim rong ati pha, anmani’n Syriahei rephōra leikase hei, tâk-kha ahmun kha antlung pha tûte’m leiom mak jo hei.

⁶RŌNGPU’n Syriahei kōr a Shakor leh shakor gâri katamtak kachōng remihei anhong rasa aleimanthei hei; khana Syriahei khan Israel reng in Hit leh Egypt renghei khana anremihei ankabuhlu sik a aheinek jo hei kae tia anleimandon.

⁷Khava jâra khova khōhleia Syriahei kha ahringna sik a katlânsōt jo hei, anpōn-inn, anshakor, anshakortung hei, khang’khan anrephōr anleidahlon jo hei.

⁸Pase 4 hei khan rephōr hmor antlung pha, pōn-inn inkhat shunga kahlut hei, khana aleika-om thlai ansâk an-in jo, dangka, sana, khana pōn leh der antahmu kha anlo jo, khana kasesōt heia anvathup jo hei; khana hong inle nôk heia pōn-inn inkhat kahlut hei, khang tlit a anleitlo nôk a kae.

⁹Khan chu anmani khat leh khat inbek hei, “Eini’n hinga nitlo mak sik kae! Eini’n ṭong kaṭha nithei pha, nibing rōk sik a nithup mak sik kae. Eini’n ajîng katlunga nihrisōt mak inchu, sôilo jen a karâkna nichen sik kae. Inrangtak a se me son, reng ṭōnpui karônhei hneng vahri jo rih!” anti.

¹⁰Khava jâra anmani’n Syria rephōr kha andahlona Samariating inle heia kekot kahngâk-hei anbek heia anhri, “Keini Syriahei rephōra vakase ung, tûte hmumak hei ung, rasa um theimak ung, shakor leh shakōrtung hei inkhit mak hei rephōr kha Syria he’n antadahlon jo ka-ang.”

¹¹Kot kahngâk he’n khōtlâng an-ôn jo, reng-innpuia thang anvakōi jo.

¹²Khava pha kha jân lakae, tâk-kha rengpa kha ajekhuma inphut kathōia ahlam kakeihei hneng ahri, “Syria remihei ṭōnmantluk kha hripek chei rong! Hiva hmun a sâk tâng hi anmanhret, khava jâra anmani’n rephōr andahlona ram thōia inthup sik a akase hei kae. Anmani tamandon chu, eini’n khōpui nihei dahlona sâk kajonga nisōk pha rehringa ansur sik me khana khōpui hi lo sik tia antamandon kae.”

¹³Aṭōn karôn inkhat in ahei hri, “Khōpuia ka-om mihei hi akathisa hei leh in-anghrep a a’nhmang jo hei kae. Achang jâra mi ṭhahrep shakor 5 alaka-om hei hi inṭhōi hei sona tir hei rih, hei omchen mo akasōk manhretna nei rih.”

¹⁴Anmani’n pase ajing ankadeisōt hei, khana rengpa’n anmani kha shakor gâri inhnia Syria remihei chunga heimo akasōk va-en ruh tia atirsōt jo hei.

¹⁵Mihei khan Jordan tuidung katlunga kase hei, hlamlen dunga khan Syria remihei hmangchâk khana pōn leh der hei antlânsōt laia antadahlon hei anhmusōt hei. Khava sōa anmani hong inle heia rengpa hnenga thang ankōi jo.

¹⁶Samaria mihei kha kasōk heia Syria rephōr kha anvachom joa kae. Khana RŌNGPU taleihri kapōa akaṭhapen gehu kilograme 3 achangmak leh satun kilograme 6 a dangka cheng khat rōk a anjōr joa kae.

¹⁷Hing’hin leikasōk, khachu khōpui kot kha Israel rengpa’n ama kahrungpa ṭongpek thōia alei manhngâk hei. Khana Rengpa’n Elisha inhmupui sik a aleiselai, Elisha’n aleisânsōt kapōhrep a, mipui he’n akahrungpa kha anchōn rachi pha anthat jo.

¹⁸Elisha’n rengpa hnenga khava pha khan chu Samaria shunga gehu akaṭhapen kilograme 3 a-emak leh satun kilograme 6 kha dangka cheng khat a a’njōr sik kae aleitipek,

¹⁹khava ṭong kha ṭōnkarônpa khan amasôn, “Khavakha sōk theimak ning, RŌNGPU khet in inrangtak a sâng leh be ahei tir sik inum changthei mak jo ning!” aleitia kae. Khana Elisha’n amasôn, “Nang in khava omchen akasōk khachu nahmu sik, tâk-kha thlai inkhatbek sâk hêrmak tin che.”

²⁰Khavatak kha ahnenga akasōk jo kae, ama kathi jo, khōpui kalen kekot a mipui in anchōn that joa kae.